Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Numeri 35:1-34

35  Bakaten Yehovah taigi Moses na ini Moab-sabana na Yordan-liba,+ abrasei fu Yerikow:  „Gi den Israelsma a komando taki den musu gi den Leifisma wan tu foto+ na ini a kontren di den kisi. Boiti dati, den musu gi den Leifisma den weigron lontu den foto.+  Den Leifisma o tan na ini den foto, èn den weigron o de gi den osometi nanga den tra meti fu den èn gi den tra sani di den abi.  Den weigron di un musu gi den Leifisma, musu bigin na den skotu fu den foto èn den musu langa fo hondro fotenti nanga feifi meter. Den musu de lontu den foto.  Dorosei fu den foto un musu marki aiti hondro neigitenti meter gron na owstusei, aiti hondro neigitenti meter na zuidsei, aiti hondro neigitenti meter na west-sei, èn aiti hondro neigitenti meter na noordsei. A foto musu de na mindri. Den gron disi o de den weigron fu den foto fu den Leifisma.  Disi na den foto di un musu gi den Leifisma: siksi loweman-foto,+ so taki den sma di kiri trawan kan go kibri drape.+ Boiti dati, un musu gi den ete fotenti na tu tra foto.  Ala nanga ala, un musu gi den Leifisma fotenti na aiti foto nanga den weigron di de na den foto.+  Un musu teki den foto disi fu den tra lo fu Israel.+ Fu den lo di abi furu, un musu teki furu foto, èn fu den lo di no abi so furu, un musu teki wan tu foto nomo.+ Ibri lo musu gi den Leifisma wan tu foto.”  Dan Yehovah taigi Moses: 10  „Taigi den Israelsma: ’Te unu abra Yordan-liba fu go na ini a kondre Kanan,+ 11  dan un musu luku sortu foto bun fu de wan loweman-foto. Na den foto disi wan sma o lowe go kibri te a kiri wan trawan, ma no fu espresi.+ 12  A kan go kibri drape gi a sma di abi a reti fu kiri en,+ so taki a sma disi no kiri en fosi a go na fesi krutu.+ 13  Den siksi foto di unu gi, o de loweman-foto gi unu. 14  Dri fu den foto musu de na disi sei fu Yordan-liba,+ èn dri foto musu de na ini a kondre Kanan.+ Dati na den loweman-foto. 15  Na ini den siksi foto disi, den Israelsma nanga den trakondre sma di e tan nanga unu,+ kan go kibri te den kiri wan sma, ma no fu espresi.+ 16  Efu wan sma naki wan trawan nanga wan isri sani èn a trawan dede, dan a sma na wan kiriman.+ Un musu kiri a kiriman.+ 17  Efu wan sma naki wan trawan nanga wan ston di ben kan kiri en èn a trawan dede trutru, dan a sma dati na wan kiriman. Un musu kiri a kiriman. 18  Efu wan sma naki wan trawan nanga wan udu sani di ben kan kiri en èn a trawan dede trutru, dan a sma dati na wan kiriman. Un musu kiri a kiriman. 19  A sma di abi a reti fu kiri a kiriman,+ o kiri en te a miti en. 20  Kon meki wi taki dati wan sma abi so wan bita-ati gi wan trawan+ taki a pusu en, noso a trowe wan sani na tapu a trawan di a ben e luru fu kiri en.+ 21  Noso kande wan sma naki wan trawan, fu di a e teige en. Efu a trawan dede, un musu kiri a sma di kiri en. A sma dati na wan kiriman. A sma di abi a reti fu kiri a kiriman, musu kiri en te a miti en.+ 22  Ma kon meki wi taki dati a no bita-ati meki taki a sma pusu a trawan, noso a no ben luru fu trowe wan sani na tapu a trawan fu kiri en,+ 23  noso a no ben si a trawan di a meki wan ston fadon na en tapu. Efu a trawan dede, ma a sma no ben abi bita-ati gi en, noso a no ben suku fu du en ogri, 24  dan den krutuman musu gebroiki den wèt disi fu krutu a tori fu a kiriman nanga a sma di abi a reti fu kiri en.+ 25  Den krutuman+ musu sorgu taki a sma no kiri a kiriman. Den musu tyari a kiriman go baka na a loweman-foto pe a ben go, èn a musu tan drape teleki a granpriester di ben salfu nanga a santa oli, kon dede.+ 26  Ma efu a kiriman komoto na ini a loweman-foto pe a de 27  èn a sma di abi a reti fu kiri en+ miti en dorosei fu a loweman-foto èn a kiri en, dan a sma dati no abi brudu-paiman. 28  A kiriman musu tan na ini a loweman-foto teleki a granpriester dede.+ Baka dati a kan go na en eigi oso baka. 29  Na so unu nanga den bakapikin fu unu musu krutu den afersi disi na ala presi pe unu e tan. 30  Te sma taki na fesi krutu+ taki wan sma na wan kiriman, dan un musu kiri a kiriman.+ Ma un no musu kiri wan sma te wán sma nomo taki dati a de wan kiriman. 31  Te wan kiriman kisi dedestrafu, dan un no musu teki moni fu en efu a wani pai unu fu tan na libi.+ Un musu kiri a kiriman.+ 32  Te wan sma musu tan na ini wan loweman-foto, ma a wani pai wan sani so taki a kan go tan na en eigi oso bifo a granpriester dede, dan un no musu teki a moni fu en. 33  Un no musu pori a kondre pe unu e tan, bika te wan sma kiri wan trawan, dan a brudu fu a dede sma e pori a kondre.+ Soso nanga a brudu fu a kiriman, a kondre o kon bun baka.+ 34  Un no musu doti a kondre pe mi e tan nanga unu, bika mi, Yehovah, e tan nanga den Israelsma.’”+

Futuwortu