Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Numeri 27:1-23

27  Selafeyad ben de wan manpikin fu Heifer, wan granpikin fu Gilead, èn wan bakapikin fu Makir di ben de a manpikin fu Manase.+ Sobun, Selafeyad ben komoto fu wan famiri na ini a lo fu Manase, a manpikin fu Yosef. Den umapikin fu Selafeyad+ ben nen Makla, Noa, Hokla, Milka, nanga Tirsa.+  Den umapikin disi ben go na Moses, Priester Eleasar,+ den edeman, èn ala sma di ben kon makandra na a mofodoro fu a konmakandra-tenti. Den taki:  „A papa fu wi dede na ini a sabana,+ ma a no ben de na ini a grupu fu Korak+ di ben opo ensrefi teige Yehovah. Na en eigi sondu meki taki a kon dede.+ Ma a no kisi nowan manpikin.  We dan fu san ede a nen fu wi papa musu lasi gowe na ini a lo fu den, soso fu di a no kisi manpikin?+ Grantangi, gi wi wan pisi gron na ini a kontren di den brada fu wi papa kisi.”+  Dan Moses go aksi Yehovah fa a ben musu krutu a tori disi.+  Yehovah taigi Moses:  „Den umapikin fu Selafeyad abi leti. Yu musu gi den wan pisi gron leki famirigudu na ini a kontren di den papa brada kisi. A famirigudu fu den papa musu kon de fu den.+  Dan yu musu taigi den Israelsma: ’Efu wan man dede sondro fu kisi wan manpikin, dan un musu gi a famirigudu fu en na en umapikin.  Efu a no abi umapikin, dan a famirigudu musu kon de fu den brada fu en. 10  Efu a no abi brada, un musu gi a famirigudu na den brada fu en papa. 11  Ma efu en papa no abi brada, dan un musu gi a famirigudu na a moro krosibei famiri fu en.+ A famirigudu o de fu a sma dati. Den Israelsma musu si a bosroiti disi leki wan wèt, bika na dati Yehovah taigi Moses.’” 12  Baka dati Yehovah taigi Moses: „Kren go na tapu a bergi di de na Abarim-bergikontren+ èn luku a kondre di mi o gi den Israelsma.+ 13  Baka te yu si a kondre, dan yu o go rostu neleki den afo fu yu.+ Iya, yu o go rostu neleki yu brada Aron,+ 14  fu di unu no ben gi yesi na a komando fu mi di a pipel ben e krutukrutu na Sin-sabana.+ Unu no ben gi mi grani na fesi a pipel èn unu no ben sori den taki mi santa+ di mi ben gi den watra na Meriba+ di de na ini Kades+ na Sin-sabana.”+ 15  Dan Moses taigi Yehovah: 16  „Yehovah, Gado di e gi libi+ na ibri sortu libisani,+ grantangi poti wan fesiman gi a pipel,+ 17  meki a teki fesi èn tiri den na ini ala den afersi fu den.+ Dan a pipel fu Yehovah no o de leki skapu di no abi skapuman.”+ 18  Ne Yehovah piki Moses: „Teki Yosua, a manpikin fu Nun èn poti yu anu na en tapu.+ A fasi fa a e tyari ensrefi o meki taki a o de wan bun fesiman. 19  Meki a tanapu na fesi Priester Eleasar nanga a heri pipel, èn meki den alamala si taki yu poti en leki fesiman.+ 20  Gi en wan tu fu den grani di yu abi,+ so taki a heri pipel fu Israel kan gi yesi na en.+ 21  Na fesi Priester Eleasar a musu tanapu, dan a priester o gebroiki na Urim+ fu aksi Yehovah san a musu du.+ Te a gi a komando, dan Yosua o teki fesi èn a o tiri a heri pipel fu Israel na ini ala den afersi fu den.” 22  Ne Moses du soleki fa Yehovah taigi en. A teki Yosua èn a meki a tanapu na fesi Priester Eleasar+ nanga a heri pipel. 23  Dan a poti en anu na tapu Yosua fu sori taki na en tron fesiman,+ soleki fa Yehovah ben taigi Moses.+

Futuwortu