Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Numeri 24:1-25

24  Di Bileam si taki Yehovah feni en bun taki Israel kisi blesi, a no gowe moro+ fu luku efu ogri ben o miti Israel,+ ma a drai luku a sabana.  Di Bileam si taki ibriwan fu den lo fu Israel seti kampu na den eigi presi,+ dan a yeye fu Gado kon na en tapu.+  Ne a bigin taki a puwema disi:+ „Disi na san Bileam, a manpikin fu Beor taki, Iya, disi na den wortu fu wan man di man si ala sani.+   Disi na den wortu fu wan sma di yere san Gado taki,+ Wan sma di si wan fisyun fu na Almaktiwan.+ Den ai fu en ben opo di a ben e fadon. A taki:+   Ai Yakob, den tenti fu yu moi fu tru! Ai Israel, luku fa den kampu fu yu moi!+   Den kon bradi leki den lagipresi pe liba e lon,+ Leki moi dyari na sei liba.+ Leki aluwe-bon di Yehovah prani, Leki sedrebon na watrasei.+   Watra e dropu komoto fu den tu emre fu en, En siri de na furu presi pe watra de.+ A kownu fu en+ o hei moro Agak,+ Èn a kownukondre fu en o kon tranga.+   Gado e tyari en komoto na Egepte. A e lon esi-esi leki wan mankaw fu a sabana.+ A o nyan den pipel di e kwinsi en,+ A o kawkaw den bonyo fu den,+ èn a o sutu den kiri nanga den peiri fu en.+   A hari lesi, a go didon neleki wan lew. Suma abi a deki-ati fu wiki en?+ Den wan di blesi yu, o kisi blesi,+ Èn den wan di fluku yu, o kisi fluku.”+ 10  A sani disi meki Balak ati bron nanga Bileam srefisrefi. A naki anu,+ dan a taigi Bileam: „Mi ben kari yu kon fu fluku+ den feanti fu mi, ma ala den dri leisi yu blesi den pasa marki. 11  Gowe fu dya, go baka na a presi pe yu komoto. Mi ben taki dati mi ben o gi yu grani,+ ma Yehovah meki taki yu no kisi grani.” 12  Dan Bileam taigi Balak: „Yu no e memre san mi ben taigi den boskopuman di yu seni kon na mi? Mi ben taigi den: 13  ’Srefi efu Balak ben o gi mi en heri oso di lai solfru nanga gowtu, toku mi no ben o man trangayesi Yehovah, awinsi na wan bun sani noso wan ogri sani mi ben wani du gi yu. Ala san Yehovah taki, na dati mi o taki.’+ 14  Ma now mi o go baka na mi pipel. Kon meki mi fruteri yu+ san a pipel disi o du nanga yu pipel na ini den lasti dei.”+ 15  Dan a taki a puwema disi:+ „Disi na san Bileam, a manpikin fu Beor taki, Iya, disi na den wortu fu wan man di man si ala sani.+ 16  Disi na den wortu fu wan sma di yere san Gado taki,+ Èn di kisi sabi fu a Moro Heiwan. A si wan fisyun fu na Almaktiwan.+ Den ai fu en ben opo di a fadon. A taki:+ 17  Mi sa si en,+ ma a no now. Mi sa si en, ma a no o de krosibei. Wan stari+ sa komopo fu Yakob, Èn wan kownutiki sa komopo na ini Israel.+ A o masi Moab na en sei-ede+ Èn a o broko na edekrabasi fu ala den manpikin di e go na feti. 18  Edom o kon de fu den,+ Iya, Seyir+ o kon de fu den feanti fu en,+ Aladi Israel e sori deki-ati. 19  Wan bakapikin fu Yakob o tiri sma,+ A o kiri iniwan sma fu a foto di de na libi ete.”+ 20  Di a si Amalèk, dan a go doro nanga a puwema fu en:+ „A pipel fu Amalèk ben de den fosiwan,+ Ma den sa kisi pori te fu kaba.”+ 21  Di Bileam si den Kenietsma,+ dan a go doro nanga a puwema fu en: „Yu oso tranga èn a bow na tapu wan stonbergi. 22  Ma wan sma o kon fu bron Kayin+ teleki noti no tan abra. Omeni ten musu pasa ete, fosi Asiria tyari yu gowe na ini katibo?”+ 23  Ne a go doro nanga a puwema fu en: „Helu! Suma o tan na libi te Gado e du a sani disi?+ 24  Sipi o komoto na a sesyoro pe Kitim de.+ Den o pina den sma fu Asiria,+ Èn den o pina den sma fu Heiber. Ma te fu kaba, ensrefi o lasi gowe tu.” 25  Baka dati, Bileam opo èn a drai go baka na a presi pe a ben komoto.+ Balak srefi gowe tu.

Futuwortu