Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Numeri 21:1-35

21  A kownu fu a foto Arad+ ben de wan Kanansma di ben tan na Negeb-sabana.+ Di a yere taki den Israelsma ben e waka kon na a pasi fu Atarim, a go feti nanga den èn a tyari wan tu fu den go na ini katibo.  Dan den Israelsma sweri gi Yehovah:+ „Efu yu meki wi wini a pipel disi, dan wi o pori den foto fu den krinkrin.”+  Yehovah arki den Israelsma èn a meki den wini den Kanansma. Den kiri den Kanansma èn den pori den foto fu den. Dati meki den kari a presi dati Horma.+  Di den komoto fu Hor-bergi,+ dan den teki a pasi fu a Redi Se, fu di den ben wani waka lontu a kondre Edom.+ Bakaten den Israelsma kon weri fu waka a pasi.  Ne den bigin krutu nanga Gado+ èn nanga Moses.+ Den taki: „Fu san ede unu puru wi na Egepte fu kon dede na ini a sabana?+ Nowan brede èn nowan watra no de.+ Wi e tegu fu a fisti nyanyan disi.”+  Fu dati ede, Yehovah seni ogri sneki+ gi a pipel fu beti den èn furu Israelsma dede.+  Te fu kaba, a pipel kon na Moses èn den taigi en: „Wi sondu+ fu di wi krutu nanga Yehovah èn nanga yu. Begi Yehovah fu puru den sneki gi wi.”+ Dan Moses begi Gado gi a pipel.+  Yehovah taigi Moses: „Meki wan ogri sneki èn poti en na wan postu fu den si en. Te wan sneki beti wan sma, dan a musu luku a sneki na a postu èn a o tan na libi.”+  Wantewante Moses meki wan sneki fu kopro+ èn a poti en na wan postu fu sma kan si en.+ Te wan sneki ben beti wan sma èn a ben e luku+ a kopro sneki, dan a ben tan na libi.+ 10  Baka dati, den Israelsma hari gowe, dan den seti kampu na Obot.+ 11  Di den komoto na Obot, den go tan na Iye-Abarim,+ wan presi na ini a sabana di de abrasei fu Moab, na a sei pe son e opo. 12  Di den gowe fu drape, den go tan na Sered-lagipresi.+ 13  Baka dati den go tan na a kontren fu Arnon,+ wan presi na ini a sabana na a lanki fu a kondre fu den Amorietsma. Arnon de na mindri Moab nanga a kondre fu den Amorietsma. 14  Dati meki a skrifi na ini a buku di e taki fu den feti fu Yehovah: „Waheb de na ini Sufa. Arnon-lagipresi 15  èn den liba fu en e doro te na a presi Ar+ èn a lanki fu Moab.” 16  Baka dati, den go na Beyer+ pe wan peti ben de. Yehovah taigi Moses: „Tyari a pipel kon makandra meki mi gi den watra.”+ 17  Ne den Israelsma singi a singi disi:+„Peti, spoiti watra kon! Un piki, un pipel! 18  Na heihei man diki a peti disi. Den heihei sma di lobi fu gi sani, diki enNanga a tiki fu wan tiriman,+ iya, nanga den eigi tiki den diki en.” Fu a sabana, den go na Matana. 19  Fu Matana, den go na Nahaliyel èn baka dati den go na Bamot.+ 20  Fu Bamot den go na a lagipresi di de na ini a kontren fu Moab+ na a ede fu Pisga-bergi.+ A presi Yesyimon+ ben de na ondrosei fu a bergi dati. 21  Dan den Israelsma seni boskopuman go na Sihon,+ a kownu fu den Amorietsma. Den taki: 22  „Meki wi pasa na ini yu kondre. Wi no o go na den gron nanga den droifidyari. Wi no o dringi a watra fu den peti. Wi o waka na a pasi fu a kownu, teleki wi pasa a kondre fu yu.”+ 23  Ma Sihon no gi den Israelsma primisi fu pasa na ini en kondre.+ Na presi fu dati a kari en heri pipel, dan den waka go miti den Israelsma na ini a sabana. Di den doro Yahas,+ den bigin feti nanga den Israelsma. 24  Den Israelsma kiri den nanga feti-owru+ èn den teki a kondre fu den.+ Den teki a heri kontren fu Arnon+ te na Yabok+ di de krosibei fu a tanpresi fu den Amonsma. Yaeser+ de na a lanki fu a kondre fu den Amonsma.+ 25  Na so den Israelsma teki ala den foto fu den Amorietsma+ èn den go tan drape. Den tan na ini Hesbon+ èn na ini ala den tra foto na ini a birti drape. 26  Hesbon ben de a foto pe Kownu Sihon+ fu den Amorietsma+ ben e tan. Na Sihon ben go feti nanga a kownu fu Moab, dan a teki a heri kondre fu en te na a presi Arnon.+ 27  Dati meki sma ben e spotu taki:„Kon na Hesbon.Bow a foto fu Sihon èn meki a kon tranga. 28  Bika faya komoto na Hesbon,+ iya, wan faya kon fu a foto fu Sihon.A bron Ar+ fu den Moabsma di abi den hei presi na Arnon. 29  Helu fu yu, Moab! Un pipel fu Kamos,+ unu o dede seiker!A o meki den manpikin fu en tron loweman, èn den umapikin fu en o tron katiboman fu Kownu Sihon fu den Amorietsma. 30  Sobun, meki wi sutu den.A heri kontren fu Hesbon te na Dibon o pori,+Ala den uma nanga den man fu Nofa te go miti Medeba+ o dede.” 31  Na so den Israelsma tan na ini a kondre fu den Amorietsma.+ 32  Dan Moses seni wan tu man fu go luku fa a foto Yaeser+ tan. Ne den teki a foto dati nanga den tra foto na ini a birti èn den yagi den Amorietsma di ben e tan drape.+ 33  Baka dati, den drai go na a pasi fu Basan.+ Ne Kownu Ok+ fu Basan kon nanga en heri pipel fu feti nanga den na Edrei.+ 34  Dan Yehovah taigi Moses: „No frede a kownu,+ bika mi sa meki yu wini en nanga a heri pipel fu en, èn yu sa kisi a kondre fu en.+ A srefi sani di yu du nanga Sihon, a kownu fu den Amorietsma di ben e tan na Hesbon, na dati yu musu du nanga a kownu disi tu.”+ 35  Ne den go feti nanga a kownu, nanga den manpikin fu en, èn nanga a heri pipel fu en. Den Israelsma kiri den alamala+ èn den teki a kondre fu en.+

Futuwortu