Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Numeri 19:1-22

19  Yehovah taigi Moses nanga Aron:  „Yehovah gi unu wan wèt. A taki: ’Taigi den Israelsma taki den musu tyari wan rediredi kaw gi unu. A no musu abi nowan mankeri+ èn a musu de wan meti di no weri wan tyatyari noiti.+  Un musu gi en na Priester Eleasar, dan a musu tyari en go srakti na dorosei fu a kampu.  Nanga en finga, Priester Eleasar musu teki pikinso brudu fu a kaw èn a musu natinati a gron na fesi a konmakandra-tenti seibi leisi nanga a brudu.+  Den musu bron a kaw leti na en fesi. Den musu bron a buba, a meti, a brudu, nanga a kunkun fu a kaw.+  Dan a priester musu teki sedre-udu,+ taki fu hisop-bon,+ nanga redi titei+ èn a musu trowe den na ini a faya pe a kaw e bron.  A priester musu wasi en krosi èn en skin nanga watra. Baka dati a kan kon na ini a kampu, ma a no o de krin teleki mofoneti.  A sma di bron a kaw musu wasi en krosi èn en skin nanga watra.+ A no o de krin teleki mofoneti.  Wan man di krin musu teki na asisi+ fu a kaw èn a musu trowe dati na wan krin presi dorosei fu a kampu. Na asisi musu tan drape fu den Israelsma gebroiki en gi a watra di e meki sma kon krin.+ A de wan sondu-ofrandi. 10  A man di tyari na asisi fu a kaw go trowe, musu wasi en krosi èn a no o de krin teleki mofoneti.+ Disi na wan wèt di den Israelsma nanga den trakondre sma di e tan na den mindri, musu hori ala ten.+ 11  Efu wan sma fasi wan dede sma,+ dan a no krin seibi dei langa.+ 12  Na a di fu dri dei,+ a musu krin ensrefi nanga a watra di e meki sma kon krin, dan a o de krin na a di fu seibi dei. Ma efu a no krin ensrefi na a di fu dri dei, dan a no o de krin na a di fu seibi dei. 13  Efu wan sma fasi wan dede sma èn a no wani krin ensrefi baka dati, dan a du wan sani di meki taki a tabernakel fu Yehovah no santa moro.+ A sma dati musu dede.+ A no krin, fu di den no natinati en nanga a watra di e meki sma kon krin.+ A o tan wan sma di no krin.+ 14  Disi na san un musu du te wan sma dede na ini wan tenti: Iniwan sma di kon na ini a tenti èn iniwan sma di de na ini a tenti kaba, no o de krin seibi dei langa. 15  Ala prapi+ di no tapu bun, no krin tu. 16  Efu wan sma de na dorosei èn a fasi wan sma di trawan kiri nanga feti-owru,+ a fasi a skin noso a bonyo+ fu wan dede sma, noso a fasi wan grebi, dan a no o de krin seibi dei langa. 17  Fu meki so wan sma kon krin, den musu teki pikinso asisi fu a sondu-ofrandi èn den musu poti en na ini wan prapi di abi krin watra. 18  Dan wan man di krin+ musu teki wan tu taki fu wan hisop-bon+ èn a musu dopu den na ini a watra. A musu natinati a tenti, ala den prapi, nanga ala sma di ben de na ini a tenti. Boiti dati, a musu natinati a sma di ben fasi a bonyo noso a skin fu wan dede sma, noso wan sma di trawan kiri, noso wan grebi. 19  Na a di fu dri dei èn na a di fu seibi dei, a man di krin musu teki a watra fu natinati a sma di no krin. Na so a sma o kon krin fu en sondu na a di fu seibi dei.+ A musu wasi en krosi èn en skin nanga watra, dan a o de krin na mofoneti. 20  Ma efu wan sma no krin èn a no wani krin ensrefi, dan un musu kiri en+ puru na mindri a pipel, fu di a du wan sani di meki taki a santa presi fu Yehovah no krin moro. Den no ben natinati en nanga a watra di e meki sma kon krin. A sma no krin. 21  A sma di e natinati trawan nanga a watra musu wasi en krosi.+ A sma di fasi a watra musu wasi en krosi tu. A no o de krin teleki mofoneti. Ala ten den Israelsma musu hori a wèt disi. 22  Efu wan sma no krin èn a fasi wan sani, dan a sani dati no krin tu.+ Efu wan tra sma fasi a sani dati, dan ensrefi no o de krin tu teleki mofoneti.’”+

Futuwortu