Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Nahum 2:1-13

2  Wan pipel o kon na unu fu yagi unu go na ala sei.+ Hori wakti na a fortresi. Luku a pasi bun. Sreka unsrefi fu go na feti.* Un meki unsrefi kon moro tranga.+  Fufuruman tyari ala sani fu Yakob gowe+ èn den pori den taki fu en.+ Ma Yehovah o meki a kisi glori baka+ neleki a glori fu Israel.  A skelt fu den tranga man fu en abi wan redi kloru. Den deki-ati man fu en weri redi krosi.+ Te den e go na feti, den isri sani na den fetiwagi fu den e brenki leki faya èn den peiri fu den di meki fu yaneifer-udu+ e seki.  Den fetiman e rèi den fetiwagi fu den leki lawman na tapu strati.+ Esi-esi den e rèi go-kon na tapu den pren fu a foto. Den gersi frambo. Den e rèi esi-esi leki faya di e koti na hemel.+  A kownu fu den o seni kari den moro bun fetiman fu en.+ Te den o waka den o stotu den futu.+ Den o go esi-esi na a skotu fu a foto èn den o abi fu meki a skotu kon moro tranga.  Den portu fu den liba o opo èn a kownu-oso srefi o fadon broko.  Disi na a bosroiti èn a no o kenki. Den sma fu a foto o de nanga sososkin èn sma o tyari den gowe.+ Den umasrafu fu a foto o geme leki doifi+ èn den o naki na tapu den borsu, fu di den e sari.+  Sensi di Ninefei de,+ a de leki wan watrapeti.+ Ma now den sma drape e lon gowe. Son sma e bari: „Un man, tan tanapu! Tan tanapu!” Ma nowan sma e drai kon baka.+  Un musu fufuru solfru èn un musu fufuru gowtu,+ bika sani de pasa marki. Ala sortu warti sani de fu teki bogobogo.+ 10  A foto leigi! Noti no de na ini en moro. A tron wan brokopresi.+ Den sma ati e smèlter,+ den kindi e beifi,+ èn ala den sma abi hebi pen na den dyonku.+ Na ala den sma fesi a de fu si taki den e bruya srefisrefi.+ 11  Pe a tanpe fu den lew de now? Den yongu lew ben e tan na ini wan bergi-olo. Na drape lew ben e waka èn go na ini.+ Na drape den pikin lew ben de èn nowan sma ben meki den frede.+ Ma pe a presi dati de now? 12  A lew ben e priti furu meti na pisipisi fu gi en pikin nyanyan teleki a sari den. A ben e kiri tra meti gi den umalew fu en. Den bergi-olo fu en ben furu nanga dede meti èn na den tanpe fu en a ben kibri furu meti di a ben priti na pisipisi.+ 13  „Mi o strafu unu”, na so Yehovah di e tiri den legre taki.+ „Mi o bron den fetiwagi fu unu nanga faya.+ Sma o kiri den yongu lew fu unu nanga feti-owru.+ Mi o kiri ala den tra meti di unu e onti na grontapu, èn sma no o yere a sten fu den boskopuman fu unu moro.”+

Futuwortu

Hebrewtongo: „Meki un dyonku kon tranga.”