Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Mika 3:1-12

3  Dan mi taki: „Arki, un edeman fu den sma fu Yakob èn un fesiman fu Israel.+ A no unu musu sabi san na retidu?+  Unu no lobi san bun.+ Na soso ogri unu lobi.+ Unu e hari sma buba puru na den skin èn unu e hari a meti puru na den bonyo fu den.+  Boiti dati, unu e nyan a meti fu mi pipel+ èn unu e hari a buba puru na den skin. Unu naki den bonyo fu den na pisipisi. Unu masi den leki sani di de na ini wan bradimofo patu èn leki meti di de na ini wan patu fu bori.+  Na a ten dati unu o bari kari Yehovah, ma a no o piki unu.+ Na a ten dati a o drai baka gi unu,+ fu di unu e du wan lo ogri.+  Sonwan fu den profeiti e meki a pipel lasi pasi.+ Den e beti nanga den tifi+ èn den e bari: ’Ala sani e go bun!’+ Ma te wan sma no gi den wan sani fu nyan, dan den wani feti nanga a sma dati.+ Disi na san Yehovah taigi den:  ’Na fu den sani disi ede a o de neti gi unu,+ so taki unu no o man kisi fisyun.+ Unu o de na ini dungru, so taki unu no o man taki sani na fesi. Son o dongo gi den profeiti èn deiten musu kon dungru gi den.+  Den sma di e si fisyun+ o kisi syen+ èn den sma di e taki sani na fesi+ o firi brokosaka. Den alamala o abi fu tapu a snor+ fu den, bika Gado no e piki den.’”+  Ma na a tra sei, mi kisi furu makti, fu di a yeye fu Yehovah kon na mi tapu. Mi o du san reti èn mi o abi deki-ati+ fu taigi Yakob sortu ogri a e du èn fu taigi Israel sortu sondu a e du.+  Un edeman fu den sma fu Yakob èn un fesiman fu Israel,+ un arki grantangi. Unu no lobi retidu kwetikweti èn ala sani di reti unu e meki kon kruktu.+ 10  Unu e kiri sma fu bow Sion èn unu e du kruktu sani fu bow Yerusalem.+ 11  Den edeman fu a foto disi e koti krutu, soso te den kisi tyuku.+ Den priester drape e gi leri, soso te sma pai den.+ Den profeiti drape e taki sani na fesi, soso te den e kisi moni.+ Ma toku den e taki dati Yehovah e horibaka gi den. Den e taki: „Yehovah de na wi mindri, a no so?+ Nowan rampu o miti wi.”+ 12  Na fu unu ede sma o plugu Sion leki wan gron èn Yerusalem o tron wan brokopresi.+ A bergi pe a tempel de o tron leki wan bergi na ini busi.

Futuwortu