Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Mika 1:1-16

1  Na ini a ten di Kownu Yotam,+ Kownu Akas,+ nanga Kownu Heskia+ ben e tiri Yuda,+ Yehovah sori Mika+ fu a foto Moreset wan fisyun di abi fu du nanga Samaria+ èn nanga Yerusalem.+ Disi na san Mika yere:  „Meki ala pipel arki èn meki grontapu nanga ala sani di de na ini poti prakseri.+ Meki a Moro Hei Masra Yehovah krutu unu.+ Yehovah de na ini en santa tempel.+  Yehovah o komoto na en presi,+ a o saka kon èn a o waka na tapu den hei presi fu grontapu.+  Den bergi o smèlter na ondro en futu+ èn den lagipresi o priti opo. A o de neleki te faya e bron kandrafatu+ èn neleki te wan sma di de na wan hei presi e kanti watra go na ondro.  Na fu di Yakob opo ensrefi teige mi èn fu di den sma fu Israel sondu, meki ala den sani disi o pasa.+ Suma meki Yakob opo ensrefi? A no Samaria du dati?+ Suma meki den hei presi na Yuda pe sma e anbegi tra gado?+ A no Yerusalem du dati?  Mi o meki Samaria tron wan brokopresi na ini a sabana.+ A o tron wan presi pe sma e prani droifi. Mi o trowe den ston fu en na ini a lagipresi èn den fondamenti fu en o de fu si.+  Ala den popki di a e anbegi leki gado, mi o naki panya.+ Ala den kado di Samaria kisi fu a wroko di a e du, mi o bron na ini faya,+ èn ala den falsi gado fu en mi o pori. Bika a ben kisi den sani disi leki pai fu a huruwroko di a e du. Ma mi o meki sma teki den sani disi tyari gowe fu pai tra huru-uma.”+  Dati meki mi o bari+ èn mi o krei. Mi o waka sosofutu èn sososkin.+ Mi o bari leki sabanadagu èn mi o bari leki uma-stroisifowru di e sari.  Bika a mankeri fu en no man dresi.+ A rampu doro te na Yuda,+ te na den portu fu a foto fu mi pipel èn te na Yerusalem.+ 10  „No taki a tori disi na ini Gat. No krei kwetikweti.+ Lolo na ini doti+ na ini Bet-Afra. 11  Ai, uma di e tan na Safir, yu o kisi syen, fu di yu o gowe libi yu kondre nanga sososkin.+ Na uma di e tan na Sanan no go na dorosei. Bet-Haesel ben de un kibripresi, ma now na soso sari babari de fu yere drape. 12  Na uma di e tan na Marot ben e wakti bun sani,+ ma ogri sani saka komoto fu Yehovah kon na a portu fu Yerusalem.+ 13  Ai, uma di e tan na Lakis,+ tai den asi na fesi na asiwagi. Na yu meki taki na umapikin fu Sion bigin sondu.+ Na a umapikin fu Sion meki taki Israel opo ensrefi.+ 14  Dati meki yu musu gi Moreset-Gat kado te a e gowe.+ Den oso fu Aksib+ kori den kownu fu Israel. 15  Ai, uma di e tan na Maresa,+ gi yu mi o tyari a sma di e teki sani fu trawan.+ A glori fu Israel o kon te na Adulam.+ 16  Koti un ede-wiwiri èn krebi un ede, fu di rampu o miti den lobi manpikin fu unu.+ Krebi un ede teleki a piri neleki na ede fu wan tingifowru, fu di sma o tyari un manpikin gowe na ini katibo.”+

Futuwortu