Go na content

Go na table of contents

Yehovah Kotoigi

Tongo Sranantongo

Mateyus 6:1-34

6  Te unu e du bun,+ un musu luku bun taki unu no e du dati fu sma ai ede. Bika te unu e du dati, unu no o kisi pai fu un Tata di de na hemel.  Fu dati ede, te unu e du pôti sma wan bun,+ dan no panya a tori na ala sei+ leki fa den hoigriman e du na ini den snoga èn na tapu strati fu sma prèise den. Fu tru, mi e taigi unu: Den kisi a pai fu den kaba.  Ma te yu e du pôti sma wan bun, dan no meki yu kruktu-anu sabi san yu reti-anu e du.  Sma no abi fu sabi taki yu du pôti sma wan bun. Yu Tata di e si ala sani aladi yu no man si en, o pai yu baka.+  Sosrefi, te unu e begi, un no musu de leki den hoigriman. Bika den lobi tanapu e begi+ na ini den snoga èn na tapu den uku fu den bigi strati, so taki sma kan si den.+ Fu tru, mi e taigi unu: Den kisi den pai kaba.  Ma te yu wani begi, go na ini yu kamra,+ tapu yu doro, dan yu begi yu Tata di sma no man si.+ Yu Tata di e si ala sani aladi yu no man si en, o pai yu baka.  Te yu e begi, no taki den srefi sani ibri leisi baka+ leki fa den grontapusma e du, bika den e prakseri taki Gado o arki den efu den e taki furu sani.  Sobun, no tron leki den, bika Gado un Tata sabi san unu abi fanowdu,+ srefi bifo unu aksi en.  Fu dati ede un musu begi so:+ ’Wi Tata na hemel, meki yu nen+ de santa.+  10  Meki yu Kownukondre+ kon. Meki yu wani+ pasa na grontapu+ soleki fa a e pasa na hemel. 11  Gi wi a brede di wi abi fanowdu gi a dei disi.+ 12  Gi wi pardon fu den sondu* fu wi leki fa wi e gi pardon na sma di du wan sondu teige wi.+ 13  No meki wi kisi tesi,+ ma frulusu wi fu na ogriwan.’+ 14  Efu unu e gi sma pardon fu den sondu fu den, dan un Tata na hemel o gi unu pardon tu.+ 15  Ma efu unu no e gi sma pardon fu den sondu fu den, dan un Tata no o gi unu pardon fu den sondu fu unu.+ 16  Te unu e faste,*+ dan no poti wan sari fesi moro, leki fa den hoigriman e du, bika den e masi den fesi so taki sma kan si taki den e faste.+ Fu tru, mi e taigi unu: Den kisi den pai kaba. 17  Ma te yu e faste, dan lobi yu ede nanga oli èn wasi yu fesi,+ 18  so taki sma no abi fu si taki yu e faste. Na soso yu Tata di sma no man si,+ musu sabi dati. Yu Tata di e si ala sani aladi yu no man si en, o pai yu baka. 19  No kibri yu gudu+ moro na grontapu pe woron nanga frustu kan pori en èn pe fufuruman kan kon fufuru en. 20  Ma kibri yu gudu na ini hemel+ pe woron nanga frustu no man pori en+ èn pe fufuruman no man go fufuru en. 21  Pe yu gudu de, na drape yu ati o de tu. 22  A lampu fu a skin na a ai.+ Fu dati ede, efu yu ai krin, dan yu heri skin o brenki. 23  Ma efu yu ai e luku sani di no bun,+ dan yu heri skin o dungru. Efu a faya na ini yu dede, dan yu o de na dungru trutru!+ 24  Nowan sma kan dini tu masra leki srafu. Bika a o teige a wan masra èn lobi a trawan,+ noso a o horibaka gi a wan èn wisiwasi a trawan. Unu no kan dini Gado èn dini Gudu+ na a srefi ten. 25  Mi e taigi unu: No broko un ede moro nanga un libi,*+ nanga san unu o nyan noso san unu o dringi noso san unu o weri na un skin.+ A libi prenspari moro leki nyanyan èn a skin prenspari moro leki krosi,+ a no so? 26  Luku den fowru+ di e frei na loktu bun. Den no e sai siri, den no e koti nyanyan èn den no e kibri nyanyan na ini maksin. Toku un Tata na hemel e gi den nyanyan. Unu no warti moro den?+ 27  Suma fu unu di e broko en ede nanga sani, kan meki en libi kon pikinso moro langa?+ 28  Sosrefi, fu san ede unu e broko un ede nanga san unu o weri? Leri wan sani fu den leilibromki+ na ini a sabana èn luku fa den e gro. Den no e wroko tranga èn den no e meki krosi. 29  Ma mi e taigi unu taki srefi Kownu Salomo+ di ben abi someni glori no ben weri so moi leki wan fu den bromki disi. 30  Gado e meki den sani di e gro na ini a sabana weri so moi, aladi den na sani di de tide, ma tamara sma e trowe den go na ini na onfu. Efu dati de so, dan a de seiker taki a o gi unu di no e bribi nofo,+ sani fu weri, a no so? 31  Fu dati ede, noiti un musu broko un ede+ nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ 32  Ala den sani disi na san den grontapusma e feti fu kisi. Ma un Tata na hemel sabi taki unu abi ala den sani disi fanowdu.+ 33  Fu dati ede, tan suku fosi a Kownukondre nanga Gado en retidu,+ dan unu o kisi ala den tra sani tu.+ 34  Sobun, noiti un musu broko un ede nanga tamara,+ bika tamara o abi en eigi broko-ede. Ibri dei abi nofo fu en eigi ogri.

Futuwortu

Grikitongo: „paiman.”
Luku „Moro sani”, nr. 24.
Griki wortu: psuke. Luku „Moro sani”, nr. 8.