Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Mateyus 15:1-39

15  Baka dati, den Fariseiman nanga den leriman fu Wèt komopo na Yerusalem+ fu kon na Yesus. Den taki:  „Fu san ede den disipel fu yu no e du san den sma fu fositen ben gwenti du? Fu eksempre, den no e wasi den anu fosi den e go nyan.”+  Yesus piki den: „Fu san ede unu srefi no e du san a komando fu Gado e taki, soso fu di unu wani hori den gwenti fu unu?+  Gado taki fu eksempre: ’Lespeki yu papa nanga yu mama.’+ A ben taki tu: ’A sma di e kosi en papa, noso mama, musu dede.’+  Ma unu e taki: ’Efu wan sma e taigi en papa noso mama: „Ala san mi abi fu ben kan yepi yu, mi gi spesrutu na Gado”,  dan a sma dati no abi fu lespeki en papa kwetikweti.’+ Na so unu meki a wortu fu Gado lasi krakti, soso fu di unu wani hori den gwenti fu unu.+  Un hoigriman,+ a profeiti Yesaya+ ben abi leti di a ben taki fu unu:  ’A pipel disi e gi mi grani nanga den mofo nomo, ma den ati de farawe fu mi.+  Na fu soso den e tan anbegi mi, bika na den komando fu libisma den e leri trawan.’”+ 10  Baka dati Yesus kari den sma kon na en èn a taigi den: „Un arki èn frustan san disi wani taki:+ 11  ’A no san e go na ini wan sma mofo, e doti en. Ma na san e komoto na en mofo, na dati e doti en.’”+ 12  Baka dati den disipel kon na en èn den taigi en: „Yu sabi taki den Fariseiman ati bron di den yere san yu taki?”+ 13  A piki den: „Ibri bon di mi hemel Tata no prani, a o hari puru.+ 14  Libi den. Den sma disi e sori trawan a pasi, ma den srefi breni. Fu dati ede efu wan breniman musu sori wan tra breniman a pasi, dan den ala tu o fadon go na ini wan peti.”+ 15  Petrus piki en: „Taigi wi san na agersitori wani taki.”+ 16  Ne a taki: „Unu srefi no e frustan ete?+ 17  Unu no sabi taki ala san e go na ini a mofo, e go na ini a bere, dan a e doro na ini wan gotro? 18  Ma san e komoto na a mofo e kon fu na ati èn na dati e doti wan sma.+ 19  Fu eksempre, disi na den sani di e kon fu na ati: ogri prakseri,+ kiri, sutadu, hurudu, fufuru, leitori, a taki di wan sma e taki ogri fu trawan.+ 20  Disi na san e doti wan sma. Ma te wan sma e nyan sondro fu wasi en anu, dan dati no wani taki dati a no krin.”+ 21  Baka di Yesus gowe fu drape, a go na den kontren Tirus nanga Sidon.+ 22  Drape wan Fenisia+ uma di ben libi na ini a birti, kon na en èn a bari: „Masra, Manpikin fu David, abi sari-ati nanga mi.+ Wan ogri yeye e pina mi umapikin kefalek.” 23  Ma a no piki na uma. Dati meki den disipel fu en kon begi en: „Seni en gowe, bika a e tan bari na wi baka.” 24  Yesus piki den: „Gado seni mi go soso na den lasi skapu fu a pipel fu Israel.”+ 25  Di na uma kon, a boigi gi Yesus èn a taki: „Masra, yepi mi!”+ 26  Yesus piki: „A no bun fu teki a brede fu den pikin èn trowe dati gi den pikin dagu.” 27  Na uma taki: „Iya mi Masra, ma toku den pikin dagu e nyan den pikin pisi brede di e fadon komoto na a tafra fu den basi fu den.”+ 28  Yesus piki na uma: „Ai uma, a bribi fu yu tranga. Meki a pasa soleki fa yu wani.” Wantewante na umapikin fu na uma kon betre.+ 29  Yesus komopo drape, dan a go krosibei fu a se fu Galilea+ èn baka di a kren a bergi,+ a go sidon drape. 30  Dan furu sma kon na en èn den tyari sma kon di ben lan, sosrefi malengri sma, breni sma, babaw sma, nanga furu trawan. Den poti den siki sma na Yesus futusei èn a ben meki den kon betre.+ 31  Dati meki den sma fruwondru di den si fa babaw sma ben man taki, fa sma di lan ben man waka, fa breni sma ben man si èn den gi a Gado fu Israel glori.+ 32  Ma Yesus kari den disipel fu en kon èn a taki:+ „Mi e sari+ den sma, bika na dri dei kaba den de nanga mi èn den no abi noti fu nyan. Mi no wani seni den gowe sondro fu den nyan fosi. Den kan flaw te den de na pasi.” 33  Ma den disipel taigi en: „Pe wi o feni nofo brede na a farawe presi disi fu gi someni sma nyanyan?”+ 34  Ne Yesus taigi den: „Omeni brede unu abi?” Den taki: „Seibi nanga wan tu pikin fisi.” 35  Sobun, baka di a taigi den sma fu go sidon na gron, 36  a teki den seibi brede nanga den fisi. Baka di a taki Gado tangi, a broko den brede, a prati den gi den disipel, dan den disipel prati den gi den sma.+ 37  Ala sma nyan den bere furu. Den disipel piki den pisi brede di ben tan abra èn den furu seibi baskita nanga dati.+ 38  Toku fo dusun man ben feni wan sani fu nyan, aladi den no teri den uma nanga den yongu pikin. 39  Te fu kaba, Yesus seni den sma gowe, dan a go na ini a boto èn a doro na a kontren Magadan.+

Futuwortu