Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Maleaki 3:1-18

3  „Luku, mi e seni mi boskopuman+ na mi fesi fu sreka a pasi gi mi.+ Wantronso a tru Masra+ o kon na En tempel.+ En na a sma di unu e suku, a boskopuman+ fu a frubontu,+ èn a sma di unu e wakti fayafaya.+ Iya, a o kon trutru”, na so Yehovah di e tiri den legre taki.+  „Ma suma o de srekasreka na a dei te a o kon?+ Suma o tan tanapu te a o de fu si?+ Bika a o de leki a faya di wan sma e gebroiki fu meki gowtu kon soifri,+ èn leki a sopo+ fu wan wrokoman di e wasi krosi.+  A o sidon leki wan sma di e krin solfru,+ dan a o meki den Leifisma kon krin.+ A o krin den leki gowtu+ èn leki solfru, dan den o tyari wan ofrandi+ gi Yehovah nanga wan reti ati.  Yehovah o lobi na ofrandi di Yuda o tyari gi en èn na ofrandi di Yerusalem o tyari gi en.+ A o de neleki fa a ben de langa ten pasa kaba, èn neleki fa a ben de fositen.+  Mi o kon na unu fu krutu unu.+ Wantewante mi o krutu+ den bonuman,+ den sutaman,+ den wan di e meki sweri aladi den e lei,+ den wan di e bedrigi den wrokoman fu den te den musu pai den,+ den wan di e kwinsi den uma di masra dede kaba+ èn den pikin di no abi papa,+ nanga den wan di e pusu den trakondre sma go na wan sei.+ Den sma disi no e lespeki mi”,+ na so Yehovah di e tiri den legre taki.  „Mi na Yehovah. Mi no kenki.+ Unu na den bakapikin fu Yakob. Dati meki unu de na libi ete.+  Sensi a ten fu den afo fu unu, unu trangayesi den wèt fu mi èn unu no hori den.+ Ma efu unu drai kon baka na mi, dan mi o drai kon baka na unu”,+ na so Yehovah di e tiri den legre taki. Dan unu aksi: „Fa wi kan drai kon baka na yu?”  „Libisma sa fufuru wan sani fu Gado? Ma toku unu e fufuru sani fu mi.” Dan unu aksi: „San wi fufuru fu yu?” „Unu no e gi mi a di fu tin pisi fu den sani di unu abi èn den tra sani di unu musu gi mi.  Boiti dati, unu e fluku+ mi èn unu e fufuru sani fu mi. Iya, a heri pipel e du dati. 10  Ma grantangi, un luku san mi o du+ te unu teki a di fu tin pisi+ fu ala den sani di un musu tyari gi mi èn unu poti dati na ini den maksin, so taki nyanyan kan de na ini mi oso+ baka. Unu o si fa mi o opo den sroisi fu hemel,+ so taki blesi fadon leki alen gi unu. Mi o blesi unu so te, taki unu no o mankeri nowan sani”,+ na so Yehovah di e tiri den legre taki. 11  „Mi o sorgu taki nowan pikinpikin meti+ kon nyan den sani fu unu di e gro na den gron. Mi o sorgu taki den droifibon e gi nyanyan”,+ na so Yehovah di e tiri den legre taki. 12  „Dan ala den pipel o taki fa unu de so koloku,+ fu di a kondre fu unu o de wan kondre fu prisiri”,+ na so Yehovah di e tiri den legre taki. 13  „Unu taigi mi hati sani”,+ na so Yehovah taki. Ne unu aksi: „Sortu sani wi taki di hati yu?”+ 14  „Un taki: ’Na fu soso wi e dini Gado.+ Sortu wini wi kisi di wi du san a taki? Sortu wini wi kisi di wi sori Yehovah di e tiri den legre taki wi e sari fu den sondu di wi du?+ 15  Wi e si taki den heimemre sma na den wan di de koloku.+ Sani e go bun nanga den wan di e du ogri.+ Den e du wan lo ogri, ma Gado no e du noti nanga den.’”+ 16  Disiten den wan di abi lespeki gi Yehovah+ ben e taki nanga makandra. Iya, ibriwan fu den ben e taki nanga wan trawan. Disiten Yehovah ben e poti prakseri na den èn a ben e arki den.+ Ne Yehovah gi a komando fu skrifi wan buku+ fu memre den wan di abi lespeki gi en èn di e hori en nen na prakseri.+ 17  Yehovah di e tiri den legre taki: „Den o kon de fu mi+ na a dei te mi meki den tron mi spesrutu gudu.+ Mi o sori sari-ati gi den neleki fa wan papa e sori sari-ati gi en manpikin di e gi yesi na en.+ 18  Dan unu o man si krin baka suma na wan reti-ati sma èn suma na wan ogri sma,+ suma e dini Gado èn suma no e dini en.”+

Futuwortu