Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Lukas 9:1-62

9  Baka dati, a kari den twarfu apostel kon na wán èn a gi den a makti fu puru ogri yeye na sma tapu. A gi den a makti tu fu meki sma kon betre.+  Dan a seni den go fu preiki fu Gado Kownukondre èn fu meki sma kon betre.  A taigi den tu: „Un no musu tyari noti te unu e gowe, nowan tiki, nowan nyanyan-saka, nowan brede, nowan solfru moni. Sosrefi, un no musu tyari tra krosi.+  Efu wan sma teki unu na ini oso, dan tan drape teleki unu komoto fu drape.+  Efu wan presi de pe sma no wani teki unu, dan un musu komoto na ini a foto dati+ èn un musu naki a doti puru na un futu. Dati musu de wan buweisi taki den du wan sani di no bun.”+  Baka dati, den waka na ini ala den dorpu na ini a heri kontren fu fruteri a bun nyunsu na ala presi èn fu meki sma kon betre.+  Ma di Herodes, a tiriman fu a kontren, yere ala den sani di ben e pasa, a skreki srefisrefi, bika son sma ben e taki dati Yohanes kisi wan opobaka.+  Tra sma ben taki dati na Elia kon, èn trawan ben taki dati en na wan fu den owruten profeiti di opo baka.  Herodes taki: „Mi koti Yohanes ede puru.+ Dan suma na a sma di mi yere someni sani fu en?” Fu dati ede a ben e suku wan okasi+ fu si Yesus. 10  Di den apostel drai kon baka, den fruteri Yesus ala san den du.+ Baka dati, a tyari den go na wan presi pe den ben kan de den wawan+ na ini wan foto di nen Betsaida. 11  Ma di den sma kon sabi disi, den kon na en baka. Nanga prisiri a meki den sma kon na en èn a bigin taki nanga den fu Gado Kownukondre.+ A ben meki den siki sma kon betre tu.+ 12  Di a dei kon na wan kaba, den twarfu apostel kon na en èn den taigi en: „Seni den sma gowe, meki den go na den pikin foto èn na den dorpu na ini a birti, fu feni wan presi fu tan èn fu suku nyanyan, bika a presi pe wi de fara.”+ 13  Ma a taigi den: „Gi den wan sani fu nyan.”+ Den taki: „Wi abi soso feifi brede nanga tu fisi,+ noso kande wisrefi musu go bai nyanyan gi ala den sma disi.”+ 14  Den ben de nanga sowan feifi dusun man.+ Ma a taigi den disipel: „Meki den go sidon na ini grupu fu feifitenti sma.”+ 15  Na dati den disipel du èn den meki ala den sma go sidon. 16  Dan a teki den feifi brede nanga den tu fisi, a luku go na hemel, èn a taki Gado tangi gi a brede nanga den fisi. A broko den èn a gi den disipel so taki den ben kan gi den sma.+ 17  Na so ala den sma nyan den bere furu, dan den go piki san tan abra èn den furu twarfu baskita nanga pisipisi brede.+ 18  Bakaten di a ben de en wawan e begi, den disipel kon na en. Dan a aksi den: „San den sma e taki fu mi? Suma den e prakseri taki mi de?”+ 19  Den piki en: „Son sma e taki Yohanes a Dopuman. Ma trawan e taki Elia èn trawan baka e taki dati yu na wan fu den owruten profeiti di opo baka.”+ 20  Dan a aksi den: „Ma san unu e taki?” Petrus piki en:+ „Yu na a Krestes+ di kon fu Gado.” 21  Baka dati, a taigi den krin fu no taigi nowan sma a sani disi.+ 22  A taki: „A Manpikin fu libisma musu nyan furu pina èn den owru man, den edeman fu den priester, nanga den leriman fu Wèt no sa wani teki a Manpikin kwetikweti. Den o kiri en,+ ma a o kisi wan opobaka na a di fu dri dei.”+ 23  Dan a taigi den alamala: „Efu wan sma wani kon na mi baka, dan a no musu teri ensrefi moro,+ ma a musu teki en pinapostu ibri dei baka èn a musu tan waka na mi baka.+ 24  Bika a sma di wani kibri en libi, o lasi en. Ma a sma di e lasi en libi fu mi ede, o kibri en.+ 25  Iya, sortu bun a e du wan sma efu a abi heri grontapu, ma a e lasi en libi noso ogri e miti en?+ 26  Efu wan sma e syen gi mi èn gi den sani di mi e taki, dan a Manpikin fu libisma o syen tu gi a sma dati te a doro nanga a glori fu en, a glori fu a Tata, èn a glori fu den santa engel.+ 27  Ma trutru mi e taigi unu: Sonwan fu unu di e tanapu dyaso no sa dede kwetikweti fosi den si a Kownukondre fu Gado.”+ 28  Sowan aiti dei baka di a taki den sani disi, a tyari Petrus, Yohanes, nanga Yakobus go na tapu a bergi fu go begi.+ 29  We, di a ben e begi, en fesi+ kon kenki èn den krosi fu en kon weti so te, taki den ben brenki.+ 30  Tu man ben e taki nanga en. Den ben de Moses nanga Elia.+ 31  Den kon nanga glori èn den bigin taki fu a ten te Yesus ben o gowe, wan sani di ben musu fu pasa na Yerusalem.+ 32  Disiten Petrus nanga den wan di ben de nanga en ben e sribi. Ma di den wiki, den si a glori+ fu Yesus èn den si den tu man di ben e tanapu nanga en. 33  Di den tu man disi ben o gowe fu Yesus, dan Petrus taigi Yesus: „Leriman, a bun taki wi dya. Meki wi bow dri tenti, wán gi yu, wán gi Moses, èn wán gi Elia.” A ben taki disi sondro fu sabi san a e taki.+ 34  Ma di a ben e taki den sani disi, dan wan wolku kon na tapu den èn den bigin frede.+ 35  Dan wan sten+ ben de fu yere na ini a wolku èn a ben taki: „Disi na mi Manpikin, a wan di mi teki.+ Un arki en.”+ 36  Di den yere a sten, den kon si taki Yesus ben de en wawan.+ Ma den tan pî èn na a ten dati den no taigi nowan sma san den si.+ 37  A tra dei, den saka fu a bergi, èn wan heri ipi sma waka kon miti en.+ 38  Dan wan man na ini a grupu bari: „Leriman, mi e begi yu fu luku a boi fu mi, bika na a wan pikin dati nomo mi abi.+ 39  Wan yeye+ e kon na en tapu, dan wantronso a boi e bari. A yeye e meki a boi kisi stoipi, dan en mofo e puru skuma. A e gi a boi mankeri èn nofo tron a no wani gowe libi a boi. 40  Mi begi den disipel fu yu fu yagi a yeye puru na a boi tapu, ma den no ben man.”+ 41  Ne Yesus piki: „Ke, un sondu sma di no abi bribi,+ o langa mi musu tan nanga unu èn frudrage unu ete? Tyari yu manpikin kon dya.”+ 42  Di a boi kon moro krosibei, na ogri yeye naki en trowe na gron èn a meki a boi kisi hebi stoipi. Ma Yesus piri-ai gi na ogri yeye, a meki a boi kon betre, èn a gi en baka na en papa.+ 43  Ala sma ben fruwondru fu a tumusi bigi krakti+ fu Gado. Di den alamala fruwondru fu ala den sani di a ben e du, a taigi den disipel fu en: 44  „Un arki bun èn hori den sani disi di mi taki bun na prakseri, bika den o gi a Manpikin fu libisma abra na den feanti fu en.”+ 45  Ma den no ben frustan san a ben taki. Iya, den no ben man frustan en èn den ben frede fu aksi en san a taki.+ 46  Baka dati, den bigin haritaki nanga makandra suma fu den ben de a moro bigiwan.+ 47  Fu di Yesus ben sabi san den ben e prakseri, meki a teki wan yongu pikin, dan a poti en na en sei.+ 48  A taigi den: „Efu wan sma e teki a yongu pikin disi na ini mi nen, dan a sma dati e teki mi tu. A sma di e teki mi, e teki sosrefi a sma di seni mi kon.+ Bika a sma di e tyari ensrefi leki a moro lagiwan+ fu un alamala, na a sma dati bigi.”+ 49  Ne Yohanes taki: „Leriman, wi si wan man di ben yagi ogri yeye puru na sma tapu+ èn a ben gebroiki yu nen. Ma wi ben pruberi fu tapu en,+ bika a no e waka nanga wi.”+ 50  Ma Yesus taigi en: „Un no musu pruberi fu tapu en, bika a sma di no de teige unu, e horibaka gi unu.”+ 51  A ben de nomonomo fu go na Yerusalem, fu di a ten ben e doro taki a ben o opo go na hemel.+ 52  Dati meki a seni boskopuman go na en fesi. Den gowe èn den doro na wan fu den dorpu fu den Samariasma+ fu sreka sani gi en. 53  Ma den Samariasma no ben wani en drape, fu di a ben de nomonomo fu go na Yerusalem.+ 54  Di den disipel Yakobus nanga Yohanes+ si disi, den taki: „Masra, yu wani taki wi meki faya+ fu hemel saka kon na den tapu fu kiri den?” 55  Ma a drai luku den èn a piri-ai gi den. 56  Dati meki den go na wan tra dorpu. 57  Di den ben de na pasi, wan sma taigi en: „Mi sa waka na yu baka, awansi pe yu e go.”+ 58  Ne Yesus taigi en: „Krabudagu abi olo pe den e tan èn den fowru di e frei na loktu abi nesi, ma a Manpikin fu libisma no abi nowan presi fu sribi.”+ 59  Baka dati, a taigi wan tra sma: „Tron wan bakaman fu mi.” A man taki: „Gi mi na okasi fosi fu go beri mi papa.”+ 60  Ma a taigi a man: „Meki den dedewan+ beri den dedewan fu den, ma yu musu go fruteri sma fu Gado Kownukondre na ala sei.”+ 61  Wan tra sma taigi en: „Masra, mi o waka na yu baka, ma gi mi na okasi fosi fu taki den sma na ini mi oso adyosi.”+ 62  Yesus taigi en: „Efu wan sma e bigin plugu a gron+ èn a e luku go na den sani di de na en baka,+ dan a sma dati no fiti gi a Kownukondre fu Gado.”

Futuwortu