Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Lukas 21:1-38

21  Baka dati, Yesus opo en ede, dan a si fa den guduman ben e poti moni na ini den monikisi.+  Ne a si fa wan pôti uma di en masra ben dede, poti tu sensi* di no ben warti furu, na ini a kisi.+  Fu dati ede Yesus taki: „Fu tru, mi e taigi unu: Aladi na uma disi pôti, toku a poti moro leki ala den sma disi.+  Ala den sma disi poti san tan abra fu a moni fu den. Ma na uma disi pôti èn toku a teki ala san a abi fu sorgu ensrefi, dan a poti en na ini a kisi.”+  Bakaten, son sma ben e taki fa a tempel meki so moi nanga moimoi ston èn nanga sani di sma ben gi Gado.+  Dati meki Yesus taki: „Ala den sani di unu e si dya, no o de moro. Wan dei sa kon te nowan ston sa tan na tapu a trawan, ma den sa broko den puru.”+  Dan den sma aksi en: „Leriman, o ten den sani disi o pasa trutru èn san o de a marki di o sori taki den sani disi o pasa?”+  A taki: „Luku bun taki sma no kori unu.+ Bika furu sma o gebroiki mi nen èn den o taki: ’Mi na a sma’, èn ’A reti ten de krosibei kaba’.+ Un no musu waka na den baka.  Sosrefi, no skreki te unu e yere taki feti e feti èn taki dyugudyugu de.+ Bika den sani disi musu pasa fosi, ma a kaba no o kon wantewante.” 10  Ne a taigi den sosrefi: „A wan pipel o go feti nanga a tra pipel,+ èn a wan kownukondre o go feti nanga a tra kownukondre.+ 11  Bigi gronseki o de, èn takru siki di e kiri ipi-ipi sma nanga angriten o de na ini a wan presi baka a trawan.+ Sma o si kefalek ogri sani èn den o si bigi sani fu hemel.+ 12  Ma fosi ala den sani disi o pasa, sma o grabu unu, den o frufolgu+ unu, den o tyari unu go na den snoga èn na strafu-oso, èn den o srepi unu go na fesi kownu nanga granman, fu mi nen ede.+ 13  Ma dati o de wan okasi gi unu fu preiki gi den.+ 14  Ma unu no abi fu prakseri na fesi fa unu o opo taki gi unsrefi,+ 15  bika mi o meki unu taki nanga koni. Nowan fu un feanti sa man sori taki unu fowtu èn den no sa man piki unu baka.+ 16  Boiti dati, srefi papa nanga mama,+ brada, famiriman, nanga mati o tyari unu go na krutuman èn den o kiri sonwan fu unu.+ 17  Ala sma o teige unu fu mi nen ede.+ 18  Ma toku nowan wiwiri+ na un ede o lasi gowe. 19  Te unu horidoro, dan unu o kisi libi.+ 20  Te unu e si taki legre seti kampu lontu Yerusalem,+ dan un musu sabi taki a ten doro te a foto o kisi pori.+ 21  Dan meki den sma di de na Yudea, bigin lowe go na den bergi, meki den sma di de na ini Yerusalem hari gowe fu drape, èn meki den sma di de na den boitipresi no go na ini a foto.+ 22  Bika disi na a ten te a foto o kisi strafu, so taki ala sani di skrifi na ini Gado Buku, sa kon tru.+ 23  Helu fu den uma di de nanga bere na a ten dati èn den wan di abi pikin di de na bobi ete!+ Bika wan bigi nowtu o kon na ini a kondre èn Gado o strafu a pipel disi. 24  Sma o kiri den nanga feti-owru èn den o tyari den go na tra kondre leki strafuman.+ Trakondre sma o masi Yerusalem, teleki a reti ten+ fu den trakondre sma pasa. 25  Boiti dati, marki o de fu si na a son,+ a mun, nanga den stari. Sma na grontapu o frede kefalek èn den no o sabi fa fu lon komoto fu feni kibri, fu di a se+ o meki babari èn a o rigeri.+ 26  Sma o lasi-ati krinkrin, fu di den o frede+ te fu dede èn fu di den no sabi san o pasa nanga grontapu,+ bika den krakti fu hemel o seki.+ 27  Dan den o si a Manpikin fu libisma+ e kon na ini wan wolku nanga krakti èn nanga bigi glori.+ 28  Ma te den sani disi e bigin, dan opo tanapu leti-opo èn opo un ede luku go na loktu, bika a frulusu fu unu de krosibei.” 29  Baka dati, a fruteri den wan agersitori: „Luku a figabon nanga ala den tra bon.+ 30  Te unu e si taki den e bigin gi bromki, dan unu sabi taki a waran ten fu a yari de krosibei.+ 31  Na so a de tu taki te unu e si den sani disi e pasa, dan un musu sabi taki a Kownukondre fu Gado de krosibei.+ 32  Fu tru, mi e taigi unu taki den sma fu a ten disi no o dede kwetikweti, fosi ala den sani disi pasa.+ 33  Hemel nanga grontapu o pasa gowe,+ ma den sani di mi taki, no o pasa gowe kwetikweti.+ 34  Luku bun taki noiti unu nyan pasa marki, taki unu no dringi tumusi furu,+ noso taki unu no broko un ede+ nanga na aladei libi, so taki un ati kon hebi. Noso a dei dati o kon na unu tapu wantronso, sondro taki unu fruwakti dati.+ 35  A o kon leki wan trapu+ na tapu ala den sma di e libi na grontapu.+ 36  Fu dati ede, tan na ai+ èn begi+ ala ten taki unu man lowe gi ala den sani di musu pasa, èn taki unu kan tanapu na fesi a Manpikin fu libisma.”+ 37  Na so Yesus ben e gi leri na ini a tempel+ na deiten, ma te neti a ben go na doro èn a ben e sribi na tapu na Olèif-bergi.+ 38  Fruku mamanten ala den sma+ ben gwenti fu kon na en na ini a tempel fu arki en.

Futuwortu

Griki wortu: lepton. Luku „Moro sani”, nr. 15.