Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Lukas 20:1-47

20  Wan dei di a ben e gi a pipel leri na ini a tempel èn a ben e fruteri den a bun nyunsu, dan den edeman fu den priester, den leriman fu Wèt nanga den owru man kon na en.+  Nanga wan tranga sten den aksi en: „Taigi wi suma gi yu a reti fu du den sani disi èn suma gi yu a makti dati.”+  A piki den: „Mi o aksi unu wan sani tu, dan un musu piki mi:+  Fu pe Yohanes kisi a makti fu dopu sma? Fu hemel, noso fu libisma?”+  Ne den taki nanga makandra san den ben denki fu a tori. Den taki: „Efu wi taki: ’Fu hemel’, dan a o taki: ’Fu san ede unu no bribi en?’+  Ma efu wi taki: ’Fu libisma’, dan a heri pipel o trowe ston na wi tapu teleki wi dede,+ bika den e bribi taki Yohanes+ ben de wan profeiti.”+  Dati meki den taki dati den no sabi fu pe Yohanes kisi a makti fu dopu sma.  Dan Yesus taigi den: „Dan mi no e taigi unu tu suma gi mi a reti fu du den sani disi.”+  Baka dati, a bigin fruteri a pipel na agersitori disi: „Wan man ben prani droifi na wan gron,+ a yuru a gron gi gronman, èn a go na wan tra kondre fu tan wan langa ten.+ 10  Ma di a ten fu koti droifi doro, a seni wan srafu+ go na den gronman+ fu den gi en wan tu froktu fu a droifidyari.+ Ma baka di den gronman fon a srafu, den seni en gowe nanga soso-anu.+ 11  Dan a seni ete wan srafu go. Den fon a wan dati tu, den du sani nanga en fu gi en syen èn den seni en gowe sondro wan sani.+ 12  Toku a seni ete wan srafu go.+ Den gi a srafu disi mankeri tu èn den trowe en go na dorosei. 13  Ne a sma di abi a droifidyari taki: ’San mi o du? Mi o seni mi lobi manpikin go.+ Kande den o lespeki en.’ 14  Di den gronman si a manpikin, den taigi makandra: ’Disi na a wan di o kisi a droifidyari fu en papa. Kon meki wi kiri en, dan wi kan teki a droifidyari di a o kisi.’+ 15  Ne den trowe en go na dorosei+ fu a droifidyari, dan den kiri en.+ We, san a sma di abi a droifidyari o du nanga den?+ 16  A o kon kiri den gronman, dan a o yuru a droifidyari gi tra sma.”+ Di den sma yere disi, den taki: „Noiti a sani dati musu pasa!” 17  Ma Yesus luku den èn a taki: „Gado Buku taki: ’A ston di den bowman no ben wani,+ na dati tron a moro prenspari ukuston.’+ San a sani disi wani taki? 18  A sma di fadon na tapu a ston dati, o panya.+ Efu a ston dati fadon na tapu wan sma,+ dan a sa masi a sma krinkrin.”+ 19  Na a srefi momenti dati, den leriman fu Wèt nanga den edeman fu den priester bigin suku wan fasi fu kisi en, fu di den ben kon frustan taki na fu den Yesus ben taki di a fruteri na agersitori.+ Ma den ben frede a pipel. 20  Baka di den luku bun san Yesus du, den pai wan tu sma tyuku fu du neleki den na bun sma. Ne den seni den sma disi fu pruberi fu meki Yesus taki wan sani di no bun,+ so taki den ben kan tyari en go gi den tiriman fu lanti èn gi a granman.+ 21  Sobun, den sma aksi en: „Leriman, wi sabi taki yu e taki èn e leri sma bun sani. Yu no lobi a wan sma moro a trawan èn yu e leri sma a pasi fu Gado soleki fa a de trutru.+ 22  We, a fiti fu pai Grankownu belasting-moni, noso a no fiti fu du dati?”+ 23  Fu di a si taki den ben lai triki, meki a taigi den:+ 24  „Sori mi wan solfru moni.* Suma prenki èn suma nen de na en tapu?” Den taki: „A di fu Grankownu.”+ 25  A taigi den: „We, dan pai Grankownu san na fu Grankownu,+ ma pai Gado san na fu Gado.”+ 26  Den no ben man kisi en nanga a sani disi di a ben taigi a pipel. Fu di den ben fruwondru fu a piki di a gi, meki den no taki noti moro.+ 27  Ma sonwan fu den Saduseiman di e taki dati wan opobaka no de, ben kon na en,+ dan den aksi en: 28  „Leriman, Moses+ ben skrifi gi wi: ’Efu wan man trow èn a dede sondro fu kisi pikin, dan en brada+ musu trow nanga na uma èn a musu kisi pikin gi en dede brada nanga na uma dati.’+ 29  We, seibi brada ben de. A fosiwan teki wan wefi, ma a dede sondro fu kisi pikin.+ 30  Na dati pasa tu nanga a di fu tu brada, 31  dan a di fu dri brada trow nanga na uma. Na so a go nanga ala den seibi brada: Den dede sondro fu kisi pikin.+ 32  Te fu kaba, na uma dede tu.+ 33  Fu dati ede, suma fu den brada o kisi na uma leki wefi na a ten fu na opobaka? Bika a ben de a wefi fu ala den seibi brada.”+ 34  Yesus taigi den: „Den man nanga uma na ini a grontapu disi e trow.+ 35  Ma den man nanga uma di warti+ fu libi na ini a grontapu di o kon+ èn di o kisi wan opobaka,+ no o trow. 36  Fu taki en leti, den no o man dede+ moro, bika den o de leki engel èn den o de Gado pikin, fu di den kisi wan opobaka.+ 37  Na ini a tori fu Moses nanga a makabusi,+ Moses srefi ben sori taki dede sma o kisi wan opobaka. Drape a e kari Yehovah ’a Gado fu Abraham, a Gado fu Isak, èn a Gado fu Yakob.’+ 38  A no de wan Gado fu den dede sma, ma wan Gado fu den wan di de na libi, bika gi en den alamala e libi.”+ 39  Ne sonwan fu den leriman fu Wèt piki en: „Leriman, yu taki bun.” 40  Den ben taki so, fu di den no ben abi a deki-ati moro fu aksi en ete wan sani. 41  Ne Yesus taigi den: „Fa a kan taki sma e taki dati Krestes na a manpikin fu David?+ 42  Bika David srefi e taki na ini a buku fu den Psalm: ’Yehovah taigi mi Masra: „Sidon na mi reti-anusei 43  teleki mi poti yu feanti leki wan bangi gi yu futu.”’+ 44  Sobun, David e taki dati a sma disi na ’Masra’. Fa a kan de en manpikin dan?” 45  Ne a taigi den disipel aladi ala den sma ben e arki:+ 46  „Luku bun nanga den leriman fu Wèt di lobi waka nanga langa krosi èn di lobi te sma na wowoyo e gi den odi. Den lobi sidon na fesisei na ini den snoga èn na den moro prenspari presi na den fesa.+ 47  Den e fufuru den gudu fu den uma di den masra dede,+ èn den e begi langa begi soso fu sma kan si den. Den sma disi o kisi wan moro hebi krutu.”+

Futuwortu

Griki wortu: denari. Luku „Moro sani”, nr. 15.