Go na content

Go na table of contents

Yehovah Kotoigi

Tongo Sranantongo

Lukas 18:1-43

18  Baka dati, a fruteri den wan agersitori fu sori den taki a de fanowdu fu begi ala ten èn fu no kon weri fu dati.+  A taki: „Na ini wan foto yu ben abi wan krutuman di no ben e frede Gado èn a no ben abi lespeki gi nowan sma.  Ma wan uma di en masra ben dede kaba, ben de na ini a foto dati tu. Ala yuru a ben e go+ na a krutuman èn a ben e taki: ’Yepi mi, so taki mi kan kisi reti na ini a krutu-afersi di mi abi nanga wan tra sma.’  We, wan heri pisi ten a krutuman no ben wani yepi en. Ma bakaten a prakseri: ’Mi no e frede Gado èn mi no abi bisi nanga nowan sma.  Ma fu di na uma disi e kon dyaso ala ten fu trobi mi,+ meki mi o sorgu taki a kisi en reti. Dan a no o kon fruferi mi moro èn a no o tan aksi+ mi fu du sani gi en.’”  Ne Masra taki: „Yere san a krutuman taki aladi a no ben de wan reti-ati sma!  A no de so dan, taki Gado sa sorgu taki den wan di a kari èn di e bari kari en dei nanga neti, kisi reti?+ A o abi furu pasensi+ nanga den tu.  Mi e taigi unu: A sa sorgu taki den o kisi reti esi-esi.+ Ma te a Manpikin fu libisma doro, a sa feni sma na grontapu di e sori a srefi bribi disi?”  Ma sonwan fu den sma ben e si densrefi leki bun sma+ èn den ben e si tra sma leki noti.+ Ne Yesus fruteri den na agersitori disi: 10  „Tu man ben go na a tempel fu begi. A wan ben de wan Fariseiman èn a trawan ben de wan sma di e teki belasting-moni gi lanti. 11  A Fariseiman go tanapu,+ dan a bigin begi+ na ini en ati: ’Ke, mi Gado, mi e taki yu tangi taki mi no de leki den tra sma, den sma di e kwinsi trawan, den sma di no bun, den sutaman, noso srefi leki a man disi di e teki belasting-moni gi lanti.+ 12  Tu tron wan wiki mi e faste* èn mi e gi a di fu tin pisi fu ala san mi e kisi.’+ 13  Disiten a man di ben e teki belasting-moni gi lanti ben e tanapu farawe. A no ben wani opo en ai srefi fu luku go na hemel. Na presi fu dati a ben tan naki na tapu en borsu+ èn a ben e taki: ’Ke, mi Gado, abi sari-ati nanga wan sondari leki mi.’+ 14  Mi e taigi unu: Di a man disi go na en oso, a ben de moro bun+ leki a tra man. Bika den o saka a sma di e hei ensrefi, ma den o hei a sma di e saka ensrefi.”+ 15  Baka dati, sma tyari den pikin fu den kon gi Yesus, so taki a ben kan fasi den. Ma di den disipel si disi, den bari den sma.+ 16  Toku Yesus kari den pikin kon na en èn a taki: „Meki den pikin kon na mi èn no pruberi fu tapu den. Bika den sma di de leki den pikin disi sa kisi a Kownukondre fu Gado.+ 17  Fu tru, mi e taigi unu: Efu wan sma no e teki a Kownukondre fu Gado leki wan yongu pikin, dan a no sa go na ini a Kownukondre kwetikweti.”+ 18  Baka dati, wan tiriman kon aksi en: „Bun Leriman, san mi musu du fu kisi têgo libi?”+ 19  Yesus taigi a man: „Fu san ede yu e taki dati mi bun? Nowan sma bun. A wan-enkri sma di bun, na Gado.+ 20  Yu sabi den komando:+ ’No du sutadu,+ no kiri sma,+ no fufuru,+ no lei gi sma,+ lespeki yu papa nanga mama.’”+ 21  Dan a man taki: „Ala den sani disi mi e du sensi di mi ben de wan pikin.”+ 22  Di Yesus yere disi, a taigi en: „Ma toku wan sani de ete di yu no e du: Go seri ala den sani di yu abi èn prati a moni gi den pôti sma, dan yu sa kisi wan gudu na hemel. Kon, tron wan bakaman fu mi.”+ 23  Di a man yere disi, a sari trutru, bika a ben gudu srefisrefi.+ 24  Yesus luku en èn a taki: „Gi den sma di abi moni, a o muilek trutru fu go na ini a Kownukondre fu Gado!+ 25  Iya, a moro makriki gi wan kameili fu pasa na ini wan nanai-olo, leki gi wan guduman fu go na ini a Kownukondre fu Gado.”+ 26  Den sma di yere disi taki: „Dan suma man kisi frulusu?” 27  A taki: „Den sani di libisma no man du, na dati Gado man du.”+ 28  Ma Petrus taki: „Wi gowe libi den sani fu wi èn wi kon waka na yu baka.”+ 29  Yesus taigi den: „Fu tru mi e taigi unu: Ibri sma di gowe libi en oso, en wefi, en brada, en papa nanga mama, noso en pikin fu a Kownukondre fu Gado ede,+ 30  o kisi moro leki dati na ini a ten disi. Ma na ini a ten di e kon a o kisi têgo libi.”+ 31  Baka dati, a kari den twarfu disipel kon na wan sei èn a taigi den: „Luku, wi de na pasi fu go na Yerusalem èn ala den sani di den profeiti skrifi+ fu a Manpikin fu libisma o kon tru.+ 32  Fu eksempre, den o tyari en go na den trakondre sma, den o spotu en,+ den o du en ogri,+ èn den o spiti+ na en tapu. 33  Baka te den wipi+ en, den o kiri+ en. Ma a o opo baka na a di fu dri dei.”+ 34  Toku den disipel no ben sabi san den sani disi ben wani taki. Den sani di Yesus ben taki ben muilek fu frustan. Den no ben sabi fu san Yesus ben taki.+ 35  We, di a ben de krosibei fu Yerikow, wan breni man ben sidon na seipasi fu begi sma sani.+ 36  Fu di a man yere taki wan heri ipi sma ben e waka pasa, meki a aksi den san e pasa. 37  Den sma taigi en: „Na Yesus fu Nasaret e pasa!”+ 38  Di a man yere disi, a bari: „Yesus, Manpikin fu David, abi sari-ati nanga mi!”+ 39  Ma den sma di ben e waka na fesi, bari a man taki a ben musu tapu en mofo. Toku a man bari moro tranga: „Manpikin fu David, abi sari-ati nanga mi!”+ 40  Dan Yesus tan tanapu èn a taigi sma fu tyari a man kon na en.+ Di a man kon na Yesus, Yesus aksi en: 41  „San yu wani mi musu du gi yu?”+ A man taki: „Masra, meki mi si baka.”+ 42  Dati meki Yesus taigi en: „Yu musu si. A bribi fu yu meki yu kon betre.”+ 43  Wantewante a man ben man si baka.+ Ne a bigin waka na Yesus baka aladi a ben e prèise Gado.+ Ala den sma di si disi bigin prèise Gado tu.

Futuwortu

Luku „Moro sani”, nr. 24.