Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Lukas 14:1-35

14  Wan leisi na wan Sabat-dei, a go nyan na a oso fu wan edeman fu den Fariseiman+ èn den sma ben luku finifini san a ben o du.+  Dan wan man ben de na en fesi di ben abi wan siki di ben meki en skin sweri.  Dati meki Yesus aksi den sma di ben sabi a Wèt bun èn den Fariseiman: „Sma kan meki trawan kon betre na Sabat-dei?”+  Ma den no taki noti. Ne a hori a man, a meki en kon betre, dan a seni en gowe.  Ne a taigi den sma: „Te un manpikin noso un mankaw fadon go na ini wan peti+ na Sabat-dei, dan suma fu unu no o hari en puru wantewante?”+  We, den no ben man piki en.+  Baka dati, a fruteri den sma di ben kisi wan kari fu kon drape, wan agersitori, fu di a ben si taki den ben go sidon na den moro bun presi. A taigi den:+  „Te wan sma kari yu kon na wan trow-oso, dan yu no musu go sidon na a moro bun presi.+ Kande a sma disi kari wan trawan kon tu di de prenspari moro yu  èn a sma di gi yu nanga a trawan wan kari, o kon taigi yu: ’Meki a man disi sidon na a presi disi.’ Dan nanga syen yu sa musu opo go sidon na a moro lagi presi.+ 10  Ma te yu kisi wan kari, go sidon na a moro lagi presi,+ dan a sma di gi yu a kari o kon taigi yu: ’Mati, go sidon na wan moro bun presi.’ Dan yu o kisi grani na fesi ala den tra sma di drape.+ 11  Bika ibriwan sma di e hei ensrefi, den o saka en èn a sma di e saka ensrefi, den o hei en.”+ 12  Baka dati, a taigi a sma di ben gi en a kari: „Te yu o aksi sma fu kon nyan na brekten noso na neti, dan no kari den mati fu yu, yu brada, yu famiri, noso den guduman di e libi na ini yu birti. Kande wan ten o de taki den o gi yu wan kari baka, dan a o de leki den pai yu baka. 13  Ma te yu o sreka wan fesa, dan kari den pôti sma kon, nanga den malengri sma, den lan sma, nanga den breni sma.+ 14  Dan yu o de koloku, bika den no abi noti fu pai yu baka. Na Gado o pai yu baka te den sma di du san reti o opo baka.”+ 15  Di wan fu den sma di ben kon drape tu yere den sani disi, a taigi Yesus: „Koloku fu a sma di o nyan na ini a Kownukondre fu Gado.”+ 16  Yesus taigi en: „Wan man ben sreka wan bigi neti-nyanyan èn a ben kari wan lo sma kon.+ 17  Di a yuru doro fu nyan, a seni en srafu go taigi den sma di kisi wan kari: ’Un kon, bika ala sani sreka kaba.’+ 18  Ma ala den sma taki dati den no man kon.+ A fosiwan taki: ’Mi bai wan gron èn mi musu go luku en. Mi e aksi yu: Gi mi pardon fu di mi no man kon.’+ 19  Wan trawan taki: ’Mi bai tin kaw èn mi o go luku den fosi. Mi e aksi yu: Gi mi pardon fu di mi no man kon.’+ 20  Wan trawan taki tu: ’Didyonsro mi trow+ nanga wan uma èn dati meki mi no man kon.’ 21  Sobun, a srafu kon fruteri en masra den sani disi. Ne a masra fu na oso ati bron srefisrefi èn a taigi a srafu: ’Go esi-esi na den bigi strati èn na den pikin pasi fu a foto, dan yu tyari den pôti sma, den malengri sma, den breni sma nanga den lan sma kon.’+ 22  Baka wan pisi ten a srafu taki: ’Masra, mi du san yu taigi mi, ma presi de ete.’ 23  Dan a masra taigi a srafu: ’Go na den pasi+ èn na den presi di tapu nanga skotu èn dwengi den sma fu kon na inisei, so taki mi oso kan kon furu.+ 24  Bika mi e taigi unu: Nowan fu den sma di kisi wan kari o tesi a neti-nyanyan fu mi.’”+ 25  Wan heri ipi sma ben e waka nanga Yesus, dan a drai luku den èn a taigi den: 26  „Wan sma di e kon na mi, no musu lobi en papa, en mama, en wefi, en pikin, en brada, nanga en sisa, iya, a no musu lobi en eigi libi*+ srefi, noso a no man de wan disipel fu mi.+ 27  Efu wan sma no e tyari en pinapostu èn a no e waka na mi baka, dan a no man de wan disipel fu mi.+ 28  Suma fu unu di wani bow wan toren, no sa go sidon fosi fu teri den kostu,+ so taki a kan si efu a abi nofo moni fu klari a wroko? 29  Efu a no du dati, a kan taki a poti a fondamenti fu en, ma a no man klari a wroko èn ala sma di e tanapu e luku o bigin spotu en. 30  Den o taki: ’A man disi bigin bow, ma a no ben man klari a wroko.’ 31  Efu wan kownu di abi tin dusun srudati o go feti nanga wan kownu di abi tutenti dusun srudati, dan a o go taki nanga den raiman fu en fosi fu luku efu a o man wini a tra kownu, a no so?+ 32  We, efu a no o man wini, dan te a tra kownu de farawe ete, a o seni boskopuman go begi a tra kownu fu no feti.+ 33  Sobun, yu kan sabi taki nowan fu unu kan de wan disipel fu mi efu a no e libi den sani di a abi.+ 34  A tru taki sowtu na wan bun sani. Ma efu a sowtu srefi no abi tesi moro, dan san sa man gi en tesi baka?+ 35  A no bun srefi fu gebroiki en leki doti noso leki mèst. Sma e trowe en go na dorosei. A sma di abi yesi fu arki, meki a arki.”+

Futuwortu

Griki wortu: psuke. Luku „Moro sani”, nr. 8.