Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Krutuman 14:1-20

14  Baka wan pisi ten Simson go na Timna.+ Drape a si wan Filistea uma.  Dati meki a go taigi en papa nanga mama: „Mi si wan Filistea uma na Timna. Mi wani taki un musu teki en leki wefi gi mi.”+  Ma en papa nanga mama taigi en: „Na feni yu no man feni wan uma na ini yu famiri, noso na mindri a pipel fu wi,+ taki yu musu go teki wan uma na mindri den Filisteasma di no besnèi?”+ Toku Simson taigi en papa: „Na a uma dati yu musu teki gi mi, bika na en mi wani.”  Ma en papa nanga mama no ben sabi taki na Yehovah ben wani taki Simson du a sani disi,+ fu di Simson ben e suku wan okasi fu du wan sani nanga den Filisteasma. Na a ten dati den Filisteasma ben e tiri Israel.+  Na so Simson go na Timna,+ makandra nanga en papa nanga mama. Di a doro na den droifidyari fu Timna, dan a si wan yongu lew e waka kon miti en. A lew bigin bari di a si en.  Dan a yeye fu Yehovah kon na Simson tapu+ èn nanga en soso anu a priti a lew na tu, neleki a lew ben de wan yongu krabita. Ma a no taigi en papa nanga mama san a du.  Baka dati Simson waka go moro fara. Te fu kaba a miti na uma. Di a bigin taki nanga na uma, a si taki na a uma disi a ben wani trutru.+  Baka wan pisi ten, Simson go baka na a uma fu teki en tyari kon na oso.+ Di a ben de na pasi, a koti komoto fu a pasi fu go luku a dedeskin fu a lew. Ne a si wan lo wasiwasi na ini a dedeskin èn a si oni tu.+  Sobun, a krabu na oni puru nanga en anu èn a ben e nyan en, aladi a ben e waka.+ Di a doro baka na en papa nanga mama, dan a gi den pikinso fu na oni tu èn den bigin nyan. Ma a no taigi den taki a krabu na oni puru na ini a dedeskin fu a lew. 10  Dan en papa waka go na a presi pe na uma ben de. Drape Simson hori wan fesa,+ bika na dati den yonkuman ben gwenti du, fosi den trow. 11  Di den sma si en, dan wantewante den kari dritenti yonkuman kon fu hori en fisiti, fu di a ben o trow. 12  Ne Simson taigi den: „Meki mi gi unu wan raitori.+ Efu na ini den seibi fesadei+ disi, unu man taigi mi san a wani taki, dan mi o gi unu dritenti empi nanga dritenti dyakti.+ 13  Ma efu unu no man taigi mi san a raitori wani taki, dan na unu musu gi mi dritenti empi nanga dritenti dyakti.” Ne den taigi en: „Taki, meki wi yere san na a raitori fu yu.” 14  Dati meki a taigi den: „Wan nyanyan-sani komoto fu a nyanman,+ èn wan switi sani komoto fu a trangawan.”+ Dri dei langa nowan fu den ben man taki san a raitori wani taki. 15  Na a di fu fo dei den go na a uma fu Simson èn den taigi en: „Korikori yu masra, meki a taigi wi san a raitori wani taki.+ Noso wi o bron yu nanga a heri oso fu yu papa.+ Na fu teki den gudu fu wi,+ meki unu kari wi kon dyaso?” 16  Dati meki na uma fu Simson bigin krei gi en+ èn a taki: „Yu no lobi mi, yu no wani si mi na ai srefisrefi.+ Yu gi den sma fu mi wan raitori,+ ma yu no fruteri mi san a wani taki.” Ne Simson piki en: „Mi no fruteri mi eigi papa nanga mama san a raitori wani taki,+ dan mi musu fruteri yu?” 17  Ma na uma tan krei gi en ala den seibi dei fu a fesa. Te fu kaba, na a di fu seibi dei, Simson fruteri na uma san a raitori wani taki, fu di na uma tan dwengi.+ Dan na uma go fruteri den sma fu en san a raitori wani taki.+ 18  Na a di fu seibi dei, fosi Simson ben kan go na ini a kamra fu na uma, den man fu a foto taigi en:+ „San switi moro oni, èn san tranga moro wan lew?”+ Ne a piki den: „Efu unu no ben go plugu nanga a yongu kaw fu mi,+ dan unu no ben o sabi san a raitori fu mi wani taki.”+ 19  Ne a yeye fu Yehovah kon na en tapu+ èn a go na Askelon.+ Drape a naki dritenti man kiri, a puru den krosi na den skin, dan a tyari den go gi den man di ben taigi en san a raitori wani taki.+ Nanga bigi atibron a drai go baka na en papa oso. 20  Dan den gi na uma fu Simson+ na wan fu den man di ben kon hori Simson fisiti.+

Futuwortu