Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Hosea 13:1-16

13  „Te Efrayim ben e taki, sma ben e beifi. A ben abi furu makti na ini Israel.+ Ma dan a sondu, fu di a bigin anbegi Bâal.+ Ne a dede.+  Now den sma fu Efrayim e du moro sondu. Den tyari ala a solfru+ fu den go na wan smeti fu a meki wan popki gi den,+ soleki fa den wani.+ Den taki: ’Meki den sma di e tyari ofrandi, bosi pikin kaw.’+  Dati meki den sma disi o tron leki wolku na mamanten-yuru+ èn leki dow di e gowe esi-esi. Den o tron leki aleisibuba di e wai gowe fu a gron pe sma e masi aleisi,+ èn leki smoko di e komopo na den daki fu den oso.  Ma mi na Yehovah un Gado. Sensi a ten di unu ben de na ini a kondre Egepte+ mi ben de nanga unu. Unu no ben sabi nowan tra Gado èn nowan tra frulusuman, boiti mi.+  Na mi ben e sorgu unu na ini a sabana,+ a presi pe unu ben kisi hebi korsu.+  A pipel nyan den bere furu+ nanga a nyanyan di den gron fu den ben gi. Ne den kisi heimemre.+ Dati meki den frigiti mi.+  Mi o tron leki wan yongu lew+ gi den. Mi o luru den+ leki wan penitigri na seipasi.  Mi o kon na den tapu leki wan beer di lasi en pikin+ èn mi o priti den borsu opo. Leti drape mi o nyan den leki wan lew.+ Wan ogri busimeti o priti den na pisipisi.+  Un Israelsma, unu o kisi pori,+ bika unu opo unsrefi teige mi, a sma di ben yepi unu.+ 10  We dan, pe a kownu fu unu de? Meki a frulusu unu na ini ala den foto fu unu.+ Pe den krutuman fu unu de? Unu ben taki fu den: ’Gi wi wan kownu èn gi wi granman+ fu tiri wi.’ 11  Mi ben mandi,+ ma toku mi gi unu wan kownu. Now mi o figi a kownu puru nanga bigi atibron.+ 12  Den fowtu fu Efrayim tai na ini wan bondru. Den sondu fu en kibri leki gudu.+ 13  A o kisi pen leki wan uma di de fu meki wan pikin.+ A de wan don manpikin,+ bika te a ten doro fu en mama meki en, dan a no wani komoto na ini en mama bere.+ 14  Na ini Grebi* mi o puru den.+ Mi o puru den na dede.+ Dede,+ pe den maka fu yu de? Grebi,+ yu man tyari pori kon ete? Ma toku mi no o abi sari-ati nanga mi pipel.*+ 15  Te Efrayim kon de leki wan warimbo di e gro bun,+ dan wan winti fu owstusei, wan winti fu Yehovah, o wai kon.+ A o wai kon fu a sabana, èn a o drei a watra-olo+ èn a peti fu en. A o fufuru ala den gudu, sobun ala den diri sani.+ 16  Den sma fu Samaria o kisi strafu,+ bika den opo densrefi teige a Gado fu den.+ Nanga feti-owru sma o kiri den.+ Sma o kiri den pikin fu den na wan ogri-ati fasi,+ èn den o priti a bere opo fu den uma fu den di de nanga bere.”+

Futuwortu

Hebrew wortu: syeol. Luku „Moro sani”, nr. 10.
A ben o du disi, fu di den ben e sondu ete. Luku vers 12.