Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Hebrewsma 1:1-14

1  Langa ten pasa kaba, Gado ben meki den profeiti+ fruteri den afo fu wi den boskopu fu en na furu okasi+ èn na furu fasi.  Ma now, na a kaba fu a ten disi,+ a meki en Manpikin+ fruteri wi den boskopu fu en. A poti a Manpikin disi leki a sma di o kisi ala sani.+ Nanga yepi fu en a meki+ den sani na hemel èn na grontapu.*  A glori fu en na a glori fu Gado.+ A de soifri leki fa Gado de.+ Den wortu fu en di abi krakti, e meki taki ala sani e tan leki fa den de.+ Baka di a krin wi fu den sondu+ fu wi, a go sidon na a reti-anu+ fu a Moro Heiwan di de na den moro hei presi.+  Na so fasi a kon hei moro den engel,+ fu di a kisi wan nen+ di bigi moro a nen fu den.  Fu eksempre, sortuwan fu den engel Gado taigi wan leisi: „Yu na mi manpikin. Tide mi tron yu papa”?+ Noso: „Misrefi o tron en papa èn en o tron mi manpikin”?+  Ma te Gado e tyari a Fosi Manpikin+ fu en kon baka na grontapu, a e taki: „Meki ala den engel+ fu Gado boigi gi en, fu gi en grani.”+  Fu den engel a e taki tu: „A e meki den engel fu en tron yeye di abi furu krakti èn a e meki den futuboi fu en de leki wan faya.”+  Ma fu a Manpikin a e taki: „Gado na yu kownusturu* fu têgo,+ iya, fu ala ten. Nanga a kownutiki fu yu Kownukondre+ yu e tiri na wan reti fasi.+  Yu ben lobi retidu èn yu no ben lobi kruktudu kwetikweti. Dati meki Gado, iya, a Gado fu yu, salfu+ yu nanga oli, so taki yu kan prisiri moro leki den tra kownu.”+ 10  A e taki tu: „Mi Masra, na a bigin yu seti den fondamenti fu grontapu. Nanga yu eigi anu yu meki hemel.+ 11  Den sani dati o lasi gowe, ma yu o tan fu ala ten. Den alamala o kon owru neleki wan krosi.+ 12  Yu o domru den kon na wán neleki wan dyakti.+ Yu o kenki den, neleki krosi. Ma yu e tan a srefi èn noiti a libi fu yu o kon na wan kaba.”+ 13  Ma fu sortuwan fu den engel Gado taki wan leisi: „Sidon na mi reti-anusei, teleki mi poti yu feanti leki wan bangi gi yu futu”?+ 14  A no den alamala na yeye+ di musu du santa wroko+ èn di Gado seni kon fu dini den sma di o kisi+ frulusu?

Futuwortu

Luku „Moro sani”, nr. 14.
Noso: „A fondamenti fu yu kownusturu seti na tapu Gado fu têgo, iya, fu ala ten.”