Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Habakuk 1:1-17

1  A profeiti Habakuk yere wan boskopu na ini wan fisyun:  O Yehovah, o langa mi musu bari, fosi yu arki mi?+ O langa mi musu bari fu yu yepi mi? O langa yu o meki sma du ogri nanga mi, fosi yu frulusu mi?+  Fu san ede yu e meki mi si takrudu? Fu san ede yu e tan luku nomo fa sma e du ogri? Fu san ede mi musu si fa sma e fufuru sani èn fa den e pina trawan? Fu san ede sma e meki trobi nanga makandra? Fu san ede den e strei nanga makandra?+  Dati meki a wèt no abi krakti moro èn retidu no e teri srefisrefi.+ Sani no e pasa na wan reti fasi, fu di den ogri sma e lontu den reti-ati sma.+  „Un pipel, tan luku. Tan luku makandra nanga opo mofo.+ Un musu fruwondru, bika na ini a ten fu unu wan sma o du wan sani di unu no o bribi kwetikweti, awinsi sma fruteri unu dati.+  Mi o meki den Kaldeyasma kon.+ A pipel disi abi bita-ati èn den ati faya. Den e go na den bigi opo presi fu grontapu fu teki presi di no de fu den.+  Sma e beifi gi den èn sma e frede den srefisrefi. Den e meki den eigi wèt èn den e gi densrefi glori.+  Den asi fu den e lon moro penitigri. Den ogri moro busidagu di e onti na neti.+ Den asi fu den e stampu nanga den futu na tapu a gron èn den e kon fu farawe. Den e frei esi-esi leki wan aka di o grabu wan meti fu nyan.+  Nanga ala den sma fu den, den e kon fu du soso ogri.+ Te den kon leki wán man, den e tyari bun furu katiboman gowe, neleki fa a winti fu owstusei+ e tyari furu santi gowe. 10  Den e spotu kownu èn den e lafu heihei man.+ Den e lafu te den e si den foto fu tra sma di abi bigi skotu.+ Nanga santi den e meki wan pikin bergi, dan den e teki den foto disi abra. 11  Na a ten dati den o kon leki winti èn den o pasa na ini a kondre. Den musu kisi strafu, fu di den o du wan lo ogri.+ Na a gado fu den e gi den krakti.”+ 12  Sensi owruten yu de, o Yehovah.+ Mi Gado, mi Santawan, yu no e dede noiti.+ Yehovah, yu poti den fu strafu wi. Yu na wan Stonbergi.+ Yu seni den kon na wi fu piri-ai gi wi.+ 13  Yu ai soifri tumusi fu si san ogri èn yu no man si ogridu.+ We dan, fu san ede yu e tan luku den sma di e bedrigi trawan?+ Fu san ede yu e tan pî te wan ogri sma e swari wan sma di bun moro en?+ 14  Fu san ede yu e meki libisma kon de leki den fisi fu se èn leki den meti di e kroipi na gron èn di no abi tiriman?+ 15  Nanga wan fisi-aka nomo den Kaldeyasma fanga den alamala.+ Den e fanga den nanga den fisinèt,+ dan den e srepi den tyari gowe. Dati meki den breiti èn den e prisiri.+ 16  Dati meki den e tyari srakti-ofrandi gi den fisinèt èn den e bron switismeri gi den fisinèt. Bika na a fisinèt meki taki den abi bun nyanyan èn a nyanyan fu den gosontu.+ 17  Ma na fu dati ede den musu puru ala sani na a nèt? Na fu dati ede den musu kiri pipel doronomo sondro fu abi sari-ati?+

Futuwortu