Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Galasiasma 4:1-31

4  Mi e taigi unu taki solanga a sma di musu kisi wan gudu fu en papa, na wan pikin ete, a no e difrenti kwetikweti fu wan srafu,+ awansi en na masra fu ala sani.  A musu saka ensrefi ondro den sma di abi a frantwortu fu luku+ en èn ondro den futuboi di abi a frantwortu fu na oso, teleki a dei doro di en papa ben poti.  Na so a de nanga wi tu. Di wi ben de pikin, wi ben de srafu fu den sani di e tiri grontapu.+  Ma te fu kaba, di a ten di Gado poti doro,+ a seni en Manpikin kon+ di wan uma meki+ èn di ben musu gi yesi na a Wèt,+  so taki a ben kan bai+ den sma di ben gi yesi na a Wèt.+ Na so den kon fri fu a Wèt èn a ben kan teki wi leki en manpikin.+  We, fu di unu na manpikin, meki Gado poti a santa yeye+ di a gi en Manpikin, na ini wi ati tu. A santa yeye disi e meki wi bari: „Abba, Tata!”+  Sobun, unu a no srafu moro, ma unu na manpikin. Efu unu na manpikin, dan Gado meki unu tron pikin di musu kisi wan gudu tu.+  Ma di unu no ben sabi Gado,+ unu ben de srafu fu den gado di no de gado trutru.+  Ma now di unu kon sabi Gado, noso fu taki en leti, now di Gado kon sabi unu,+ fa a du kon dan taki unu e drai go baka na den soso sani di e tiri grontapu+ èn di no warti noti?+ Fu san ede unu wani dini den baka leki srafu?+ 10  Unu abi spesrutu dei,+ mun,+ ten nanga yari di unu e memre ala ten. 11  Mi e frede taki na fu soso mi du so furu muiti+ gi unu. 12  Brada, mi e begi unu fu kon de leki mi,+ bika misrefi ben de leki unu.+ Unu no du mi nowan ogri.+ 13  Ma unu sabi taki na fu di mi ben siki meki mi kisi na okasi fu fruteri unu a bun nyunsu a fosi leisi.+ 14  A siki fu mi ben de wan tesi gi unu, ma toku unu no ben fisti gi mi èn unu no ben spiti leki a ben de wan tegu sani gi unu. Ma unu teki mi leki wan engel+ fu Gado, leki Krestes Yesus.+ 15  San pasa nanga a prisiri di unu ben abi fosi?+ Mi de seiker taki efu unu ben man, unu ben o diki un ai puru èn unu ben o gi mi den.+ 16  Na tron mi tron un feanti+ fu di mi e taigi unu san tru?+ 17  Son sma de fayafaya fu kisi unu+ na den sei, ma den no e du dati nanga bun prakseri. Den wani tapu unu fu bumui nanga mi, so taki unu o wani waka na den baka.+ 18  Ma te sma de fayafaya fu kisi unu na den sei fu du bun,+ dan ala ten dati bun gi unu. A sani disi no musu pasa nomo te mi de nanga unu.+ 19  Mi lobi pikin,+ fu unu ede mi e firi pen baka neleki te wan uma de fu kisi en pikin, èn a pen disi o tan teleki unu kisi den fasi fu Krestes.+ 20  Mi e winsi taki mi ben kan de nanga unu nownowde+ èn taki mi ben kan taki tra fasi nanga unu, bika mi no sabi moro san mi musu du nanga unu.+ 21  Unu di wani du san a Wèt e taki, piki mi:+ Unu no e yere san a Wèt e taki?+ 22  Fu eksempre, Gado Buku taki dati Abraham ben abi tu manpikin. Wán a meki nanga na umasrafu+ èn a trawan a meki nanga a fri uma.+ 23  Ma a wan di a meki nanga na umasrafu, gebore leki ala tra libisma,+ èn a trawan di a meki nanga a fri uma gebore fu di Gado ben pramisi en.+ 24  Den sani disi di pasa de leki wan agersitori,+ bika den uma disi e agersi tu frubontu.+ Wan fu den frubontu meki na tapu Sinai-bergi.+ A frubontu disi de leki Hagar, èn den pikin fu en na srafu. 25  Hagar e agersi Sinai-bergi+ di de na ini Arabia. Hagar e agersi sosrefi Yerusalem fu a ten disi, bika Yerusalem nanga den pikin fu en de na ini katibo.+ 26  Ma a Yerusalem di de na tapusei+ de fri, èn en na wi mama.+ 27  Bika Gado Buku taki: „Ai, uma di no abi pikin èn di no man kisi pikin, yu musu prisiri. Bari fu prisiri, yu di no sabi a pen di wan uma e kisi te a musu meki wan pikin. Bika na uma di en masra gowe libi en, kisi moro pikin leki na uma di abi masra.”+ 28  We brada, wi na pikin fu a pramisi, neleki Isak.+ 29  Ma neleki fa a ben de na a ten dati, na so a de tu na ini a ten disi taki a sma di gebore leki ala tra libisma bigin frufolgu+ a sma di gebore nanga yepi fu a yeye.+ 30  Ma san Gado Buku e taki? „Yagi na umasrafu nanga en manpikin, bika noiti a manpikin fu na umasrafu o kisi den gudu di a manpikin fu a fri uma musu kisi.”+ 31  Fu dati ede, brada, wi a no pikin fu wan umasrafu,+ ma wi na pikin fu a fri uma.+

Futuwortu