Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Fileimon 1:1-25

 Mi, Paulus, nanga wi brada Timoteyus+ e skrifi Fileimon, a lobiwan fu wi di e wroko makandra nanga wi.+ Mi de na strafu-oso+ fu di mi e bribi na ini Krestes Yesus.  Mi e skrifi Apfia di de wi sisa, nanga Arkepus+ di e feti makandra nanga wi+ èn mi e skrifi a gemeente di gwenti kon makandra na ini yu oso:+  Meki Gado wi Tata èn Masra Yesus Krestes, sori unu bun-ati. Meki a freide fu den de nanga unu.+  Ala ten mi e taki mi Gado tangi te mi e taki fu yu na ini den begi fu mi,+  bika doronomo mi e yere fa yu e bribi na ini Masra Yesus èn fa yu lobi en nanga ala den santawan.+  Mi e begi taki a bribi di yu nanga den trawan abi,+ kan meki yu kon frustan taki ala bun sani di wi abi na fu di wi de wán nanga Krestes.  Di mi yere fu a lobi fu yu, a gi mi furu prisiri nanga trowstu,+ bika na yu, mi brada, meki den santawan kisi nyun krakti baka.+  Dati meki mi no o taigi+ yu na ini a nen fu Krestes taki yu musu du san bun, aladi mi abi a reti fu du dati.  Ma mi wani begi yu fu du san bun fu di yu abi lobi,+ spesrutu fu di yu e si taki mi, Paulus, grani kaba èn mi de na strafu-oso+ now fu di mi e bribi na ini Krestes Yesus. 10  Mi e begi yu gi Oneisimus+ di kon de leki mi eigi pikin.+ Na strafu-oso, mi kon de leki wan papa+ gi en. 11  Fosi a no ben de wan yepi gi yu, ma now a de wan bigi yepi gi mi nanga yu.+ 12  Mi e seni en kon baka gi yu, iya, en di mi lobi trutru.+ 13  Mi ben sa wani meki a tan dya nanga mi, so taki a kan tan dini mi na presi fu yu,+ now di mi de na strafu-oso+ fu a bun nyunsu ede. 14  Ma solanga yu no gi mi primisi, mi no wani du noti. Na so fasi den bun di yu e du, no o de fu di sma dwengi yu, ma fu di yu srefi wani.+ 15  Kande na fu dati ede meki a no ben de nanga yu wan syatu pisi ten, so taki a kan de nanga yu baka fu ala ten, 16  no leki wan srafu moro,+ ma leki wan sma di de moro leki wan srafu,+ iya, leki wan lobi brada.+ A de wan lobi brada spesrutu gi mi. Ma gi yu a de moro leki dati, bika a de wan srafu nanga wan lobi brada di e dini Masra. 17  Fu dati ede efu yu e si mi leki wan bribiman+ neleki yu, dan gi en wan switikon+ soleki fa yu ben o gi mi wan switikon. 18  Boiti dati, efu a du yu wan ogri, noso a musu pai yu wan sani, dan poti a paiman dati na tapu mi nen. 19  Na mi, Paulus, e skrifi yu. Nanga mi eigi anu mi e skrifi+ yu taki mi o pai a paiman baka. Mi no abi fu taigi yu taki yu abi wan paiman na mi tu èn dati na yu srefi. 20  Iya, brada, fu di yu nanga mi na bakaman fu Masra, meki mi wani aksi yu fu yepi mi na a fasi disi: meki mi ati firi bun baka,+ fu di mi na wan bakaman fu Krestes tu. 21  Mi sabi taki yu o du san mi aksi yu. Dati meki mi e skrifi yu èn mi sabi taki yu o du moro srefi leki san mi taki.+ 22  Ma boiti dati, sreka wan presi gi mi fu tan,+ bika mi howpu taki den begi+ fu unu o meki taki mi o kon fri,+ so taki mi kan de nanga unu baka. 23  Epafras,+ di de na strafu-oso nanga mi fu Krestes Yesus ede, e seni taki yu odi, 24  sosrefi Markus, Aristarkus,+ Deimas,+ nanga Lukas di e wroko makandra nanga mi. 25  Meki Masra Yesus Krestes sori unu bun-ati, fu di unu abi a yoisti fasi fu denki.+

Futuwortu