Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Ester 8:1-17

8  A dei dati, Kownu Ahasferos gi en wefi Ester na oso fu Haman,+ a man di ben abi bita-ati gi den Dyu.+ Mordekai ben musu kon na fesi Kownu tu fu di Ester ben fruteri Kownu suma Mordekai ben de fu en.+  Dan Kownu puru en linga+ di a ben teki baka fu Haman èn a gi dati na Mordekai. Ne Ester poti Mordekai leki edeman fu na oso fu Haman.+  Baka dati Ester go taki nanga Kownu ete wan leisi.+ A saka kindi boigi na fesi Kownu èn a bigin krei. A begi Kownu fu du wan sani, so taki na ogri+ di Haman, a bakapikin fu Agak, ben wani du nanga den Dyu, no pasa.+  Ne Kownu langa en gowtu tiki+ gi Ester èn Ester opo tanapu na fesi Kownu.  Ester taki: „Efu Kownu feni en bun èn Kownu e prisiri nanga mi,+ iya, efu a de wan bun sani gi Kownu èn Kownu lobi mi trutru, dan meki Kownu skrifi taki sma no musu du moro san skrifi na ini den brifi fu Haman,+ a manpikin fu Hamedata di de wan bakapikin fu Agak,+ bika Haman ben skrifi na ini den brifi taki sma musu kiri den Dyu+ na ini ala den difrenti kontren na ini a kownukondre.+  Mi no o man si fa rampu e miti mi pipel èn mi no o man si fa sma e kiri den famiri fu mi.”  Dati meki Kownu Ahasferos taigi en wefi Ester nanga a Dyu Mordekai: „Luku, mi gi Ester na oso fu Haman+ èn den anga Haman na wan postu,+ fu di a ben wani du ogri nanga den Dyu.  Sobun, skrifi wan wèt di musu yepi den Dyu. Skrifi ala sani di unu feni bun èn teki a linga fu Kownu, dan un poti wan stampu na tapu a papira pe un skrifi a wèt, bika te wan sani skrifi na ini a nen fu Kownu+ èn te a sani stampu nanga a linga fu Kownu, dan nowan sma man kenki dati.”+  Sobun, na a di fu tutenti na dri dei fu a di fu dri mun, dati na a mun Sifan, sma kari den sekretarsi+ fu Kownu kon fu skrifi ala sani di Mordekai ben abi fu taki. Dan den seni brifi gi den Dyu, den satrap,+ den granman, nanga den edeman di ben e tiri den wán hondro tutenti na seibi kontren,+ fu India te go miti Etiopia. Ibriwan fu den brifi ben skrifi na a fasi fa den sma fu den kontren ben gwenti skrifi+ èn den ben skrifi na ini den tongo di den sma ben e taki.+ Den brifi gi den Dyu ben skrifi na a fasi fa den Dyu ben e skrifi èn na ini den eigi tongo.+ 10  Mordekai meki den sekretarsi skrifi den brifi na ini a nen fu Kownu+ Ahasferos, dan a teki a linga fu Kownu+ èn a poti stampu na tapu den brifi.+ Baka dati a meki boskopuman di e rèi asi, tyari den brifi gowe.+ Den asi ben de spesrutu asi fu Kownu èn den ben man lon esi-esi. 11  Den brifi ben e taki dati Kownu gi primisi taki den Dyu na ini ala den difrenti foto ben kan kon makandra+ fu feti gi den libi, fu kiri ala den sma+ di ben kon na den tapu nanga fetisani fu du den ogri, awinsi na ini sortu kontren den ben e libi. Iya, den ben musu puru den alamala na pasi, srefi den pikin nanga den uma. Nowan fu den ben musu tan na libi. Den ben kan teki den gudu fu den tu.+ 12  Na ini ala den kontren di Kownu Ahasferos ben e tiri, den sani disi ben musu pasa na ini wán dei.+ A dei dati ben de a di fu tinadri dei+ fu a di fu twarfu mun Adar.+ 13  Den sani di skrifi na ini den brifi+ ben musu tron wan wèt na ini ala den difrenti kontren. Ala sma ben musu kon sabi a tori disi, so taki te a dei ben o doro, den Dyu ben o de srekasreka fu du a srefi sani+ di den feanti fu den ben wani du nanga den. 14  Sobun, den boskopuman+ di ben e rèi den spesrutu asi fu Kownu, gowe. Den rèi esi-esi+ èn den hasti densrefi, fu di Kownu ben taki so. A wèt disi ben meki bekènti tu na a fortresi na a foto Susan.+ 15  Dan Mordekai gowe fu Kownu. A ben weri den krosi di wan kownu gwenti weri.+ Den krosi disi ben meki fu blaw titei nanga linnen titei, wan bigi kownu-ati fu gowtu èn wan dyakti fu fini krosi+ di meki fu skapu-wiwiri di ferfi kon redi.+ Den sma fu a foto Susan ben breiti èn den ben e bari fu prisiri.+ 16  Ala den Dyu drape ben e firi leki wan hebi komoto na den tapu. Den ben breiti+ srefisrefi èn den ben e bari fu prisiri. Sma ben e lespeki den. 17  Na ini ala den difrenti kontren èn na ini ala den difrenti foto pe sma yere san Kownu taki èn sortu wèt a meki, den Dyu ben breiti srefisrefi èn den ben e bari fu prisiri. Den hori wan bigi fesa.+ Furu nyanyan ben de èn a ben de wan prisiri dei. Baka dati furu sma+ fu a kondre ben taki dati den na Dyu,+ fu di den ben kon frede+ den Dyu.

Futuwortu