Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Ester 3:1-15

3  Baka wan pisi ten Kownu Ahasferos gi bigi grani na Haman,+ a manpikin fu Hamedata, wan bakapikin fu Agak.+ Kownu ben gi en biginen+ èn a ben poti en moro hei leki ala den tra heihei man na ini a kownukondre.+  Te Haman ben e pasa, dan ala den futuboi fu Kownu di ben de na a portu fu Kownu+ ben e saka kindi gi en èn den ben e boigi nanga den fesi go na gron, bika na dati Kownu ben taigi den fu du. Ma Mordekai no ben e saka kindi gi Haman èn a no ben e boigi nanga en fesi go na gron.+  Ne den futuboi fu Kownu di ben de na a portu fu Kownu, taigi Mordekai: „Fu san ede yu no e gi yesi na a komando fu Kownu?”+  Ala dei den ben e taigi Mordekai a sani disi, ma a no ben e arki den. Dati meki den taigi Haman fu luku o langa Mordekai ben o man tyari ensrefi na a fasi disi,+ bika Mordekai ben taigi den taki en na wan Dyu.+  Di Haman si taki Mordekai no ben e saka kindi gi en èn taki a no ben e boigi nanga en fesi go na gron,+ dan Haman kisi bigi atibron.+  Dati meki a ben wani kiri Mordekai. Ma fu di sma ben fruteri Haman fu a pipel fu Mordekai, meki a no ben wani kiri Mordekai wawan, ma a ben wani kiri a heri pipel fu en tu.+ Na so Haman bigin suku wan fasi fu kiri a pipel fu Mordekai, iya, ala den Dyu na ini a kondre fu Ahasferos.+  Na ini a fosi mun+ Nisan, na ini a di fu twarfu yari+ di Kownu Ahasferos ben e tiri, wan sma iti Pur+ (noso lòt)+ gi Haman, fu di a ben wani sabi na sortu dei èn na ini sortu mun a ben kan du san a abi na prakseri. Te fu kaba a lòt sori go na Adar, a di fu twarfu mun.+  Dan Haman taigi Kownu Ahasferos: „Na mindri den sma di e tan na ini ala den kontren+ na ini yu kondre,+ wan pipel de di no e moksi nanga den tra pipel. Den wèt fu den de heri tra fasi leki den di fu ala den tra pipel, èn den no e hori den wèt di Kownu srefi poti.+ A no bun taki Kownu libi a pipel disi fu du san den wani.  Efu Kownu feni en bun, dan meki sma skrifi wan wèt, taki den musu kiri a pipel disi. Dan mi o pai den wrokoman+ fu Kownu dri hondro fotenti na tu dusun+ kilo solfru fu tyari dati na a presi pe sma e kibri a moni fu Kownu.” 10  Ne Kownu puru en linga+ na en finga èn a gi dati na Haman,+ a manpikin fu Hamedata, a bakapikin fu Agak,+ iya, a srefi Haman di ben abi bita-ati gi den Dyu.+ 11  Dan Kownu taigi Haman: „Mi e gi yu primisi fu du san yu wani+ nanga a solfru+ èn nanga a pipel.” 12  Na a di fu tinadri dei fu a fosi mun, den kari den sekretarsi+ fu Kownu kon fu skrifi brifi+ gi den satrap nanga den granman di ben e tiri den difrenti kontren na ini a kondre fu Kownu, èn gi den edeman fu den difrenti pipel na ini ibriwan fu den kontren.+ Den sekretarsi skrifi ala san Haman ben wani. Ibriwan fu den brifi ben skrifi na a fasi fa den sma fu den kontren ben gwenti skrifi,+ èn den brifi ben skrifi tu na ini den tongo di den sma ben e taki. Nanga a linga di Kownu Ahasferos gi Haman, den poti wan stampu na tapu den brifi fu sori taki na Ahasferos seni den brifi disi.+ 13  Ne den meki boskopuman+ tyari den brifi go na ala den kontren na ini a kondre fu Kownu. Na so den seni boskopu taki sma ben musu kiri den Dyu. Den ben musu puru den alamala na pasi. Nowan fu den ben musu tan na libi. Ala yongu man, ala owru man, ala pikin, nanga ala uma ben musu dede na ini wán dei.+ Dati ben de a di fu tinadri dei fu a di fu twarfu mun Adar.+ Sma ben kan teki ala den gudu fu den.+ 14  Den sani di skrifi na ini den brifi disi, ben musu tron wèt+ na ini ala den difrenti kontren na ini a kondre.+ Ala sma ben musu kon sabi a tori disi, so taki den ben kan sreka densrefi gi a dei disi. 15  Den boskopuman ben musu go esi-esi,+ bika na Kownu ben taki so. A wèt disi ben meki na a fortresi na a foto Susan.+ Ne Kownu nanga Haman go sidon fu dringi.+ Disiten bruya+ ben de na ini a foto Susan.+

Futuwortu