Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Ester 1:1-22

1  A tori di e kon now pasa na ini a ten fu Kownu Ahasferos+ di ben e tiri moro leki wán hondro tutenti na seibi kontren,+ fu India te go miti Etiopia.  Na a ten dati, Kownu Ahasferos ben de na en fortresi na a foto Susan.+ Na fu drape a ben e tiri+ a kownukondre fu en.  Na ini a di fu dri yari di a ben e tiri, a hori wan bigi fesa.+ Den edeman nanga den futuboi fu en, den legre-edeman fu Media+ nanga Persia,+ den heihei man,+ nanga den granman fu den kontren, ben de na a fesa makandra nanga en.+  Someni dei langa a sori sma den gudu+ fu a bigi kownukondre fu en. Iya, wán hondro aititenti dei langa a sori den ala sani di meki taki a kisi biginen nanga glori.+  Di den dei disi pasa, Kownu hori wan bigi fesa gi ala sma na ini a fortresi na a foto Susan, iya, gi ala prenspari sma nanga ala den tra sma di ben de drape. Seibi dei langa, Kownu Ahasferos hori a fesa na a fesidyari fu na oso fu en.  Fu moi a presi, sma anga garden fu fini katun, blaw krosi,+ nanga tra sortu diri krosi. Den ben tai den krosi kon na wán nanga diri titei èn nanga titei fu redi skapu-wiwiri.+ Den ben fasi den titei disi na solfru linga èn na pilari fu marmer-ston. Den ben abi sosrefi langa gowtu nanga solfru bangi.+ A gron pe den bangi disi ben e tanapu ben meki fu wan spesrutu sortu redi ston, weti marmer-ston, periston,* nanga blaka marmer-ston.  Na a fesa, den ben e prati win na ini gowtu kan.+ Nowan fu den kan ben de a srefi. A win fu Kownu+ ben de bogobogo na a fesa. Na soso wan kownu ben kan prati so furu win.  Na a okasi dati, nowan sma ben e dwengi trawan fu hori a wèt di abi fu du nanga a dringi fu win, bika Kownu ben taki dati ibri prenspari man di ben e wroko gi en, ben kan prati win gi iniwan sma, someni leki a sma dati ben wani.  Na uma fu Kownu ben nen Fasti.+ Ensrefi ben hori wan fesa tu gi den uma na a oso fu Kownu Ahasferos. 10  Na a di fu seibi dei, Kownu Ahasferos firi prisiri, fu di a ben dringi furu win.+ Dati meki Kownu kari Mehuman, Bista, Harbona,+ Bikta, Abakta, Seitar, nanga Karkas. Ne Kownu taigi den seibi man disi di ben e wroko gi en+ 11  fu tyari en uma Fasti kon na en. A ben wani taki sma ben musu si fa Fasti moi, bika a ben moi fu tru. Fasti ben musu weri a spesrutu tai-ede di fiti na uma fu wan kownu.+ 12  Wan tu leisi Kownu seni den man di ben e wroko gi en fu kari Fasti kon. Ma Fasti no ben wani kon kwetikweti.+ Dati meki Kownu mandi srefisrefi èn a kisi bigi atibron.+ 13  Ne Kownu taki nanga den koniman+ di ben sabi sani fu a kondre.+ (Na so Kownu ben gwenti tyari den afersi fu en na fesi ala den man di ben sabi a wèt nanga tra sani di abi fu du nanga a wèt. 14  Den raiman di Kownu ben gwenti kari ben de Karsena, Setar, Admata, Tarsis, Meres, Marsena, nanga Memukan. Dati na den seibi+ moro prenspari man fu Persia nanga Media, di ben kan go na fesi Kownu+ èn di ben e yepi Kownu fu tiri a kondre.) Kownu taigi den: 15  „Kownu Ahasferos ben seni den man di e wroko gi en, fu kari Fasti kon, ma Fasti no ben wani kon. Sobun, san a wèt e taki fu a tori disi? San musu pasa nanga Fasti?” 16  Ne Memukan+ taigi Kownu nanga den tra prenspari man: „Fasti no opo ensrefi teige Kownu wawan.+ A opo ensrefi tu teige ala den tiriman nanga ala sma di e libi na ini ala den kontren di Kownu Ahasferos e tiri. 17  Te ala den tra uma na ini a kondre kon yere a tori disi fu na uma fu Kownu, dan den o wisiwasi+ den masra fu den.+ Den o taki: ’Kownu Ahasferos srefi seni kari Fasti, ma Fasti no go.’ 18  Te den wefi fu den tiriman fu Persia nanga Media yere san na uma fu Kownu du, dan den o gi den masra fu den bigitaki. Disi o meki taki den tiriman nanga den wefi fu den no o abi lespeki gi makandra moro èn taki den ati o bron srefisrefi nanga makandra.+ 19  Efu Kownu feni en bun,+ dan meki Kownu poti wan wèt+ di e taki dati Fasti no musu kon na fesi Kownu Ahasferos moro. Dan wi o skrifi a wèt dati pe den tra wèt fu Persia nanga Media skrifi, so taki a no kan kenki noiti.+ Na presi fu Fasti, Kownu musu teki wan tra uma di bun moro en. 20  A wèt di Kownu o poti, musu meki bekènti na ini a heri kondre fu en (bika a kondre bigi). Dan ala den tra uma na ini a kondre o sori lespeki+ gi den masra fu den,+ awinsi den de prenspari sma, noso sma di no prenspari.” 21  Kownu nanga den tra prenspari man ben feni a sani disi bun.+ Dati meki Kownu du soleki fa Memukan taki. 22  Ne Kownu seni brifi+ go na ala den kontren+ na ini a kondre fu en. Ibriwan fu den brifi ben skrifi na a fasi fa den sma fu den kontren disi ben gwenti skrifi èn den brifi ben skrifi tu na ini den tongo di den sma ben e taki. Na so fasi, sma ben o lespeki ibri masra leki edeman fu en eigi osofamiri èn na a mamatongo fu a masra, den sma ben o taki na ini en oso.+

Futuwortu

Bakratongo: „Parelmoer.” Wan sani di teki puru fu na inisei fu skropu. Luku „peri” na „Moro sani”, nr. 24.