Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Efeisesma 6:1-24

6  Un pikin, gi yesi na un papa nanga mama+ soleki fa Gado wani,+ bika na dati Gado e feni bun.+  „Lespeki un papa nanga un mama.”+ Disi na a fosi komando di abi fu du nanga wan pramisi:+  „Dan sani sa go bun nanga yu èn yu sa libi langa na grontapu.”+  Un papa, no tanteri den pikin fu unu,+ ma tan kweki den+ nanga a leri+ èn nanga den rai+ fu Yehovah.  Un srafu, gi yesi na un basi na grontapu.+ Du dati nanga lespeki, nanga beifi+ èn nanga un heri ati, neleki unu e du dati gi Krestes.  No du disi soso fu plisi sma te den e luku unu,+ ma du en leki srafu fu Krestes di e du a wani fu Gado nanga den heri ati èn nanga ala den krakti.+  Du un wroko fayafaya èn nanga un heri ati, neleki na gi Yehovah+ unu e du en èn no gi libisma.  Bika unu sabi taki awansi sortu bun ibriwan fu unu e du, Yehovah o pai unu baka,+ a no abi trobi efu unu na srafu, noso fri sma.+  Sosrefi, unu di de basi fu srafu, musu libi na a srefi fasi nanga un srafu. No tapu skreki gi den moro,+ bika unu sabi taki a Basi fu unu ala tu+ de na hemel èn a no lobi a wan sma moro a trawan.+ 10  Te fu kaba mi wani gi unu a deki-ati disi: un musu kon tranga moro nanga moro,+ fu di unu de wán nanga Masra èn fu di a krakti fu en bigi srefisrefi.+ 11  Un musu sorgu taki unu abi ala den sani di Gado gi unu fu feti,+ so taki unu kan tanapu kánkan te Didibri e kon nanga den triki+ fu en. 12  Bika wi no e feti+ nanga libisma, ma nanga den tirimakti,+ nanga den wan di abi makti,+ nanga den tiriman+ fu a dungru grontapu disi, nanga den ogri yeye+ na hemel. 13  Dati meki un musu teki ala den sani di Gado gi unu fu feti,+ so taki unu o man kakafutu na a ogri dei èn unu o man tanapu kánkan fu di unu du ala sani di unu ben musu du.+ 14  Fu dati ede, tanapu kánkan èn meki ala sani di tru+ de leki wan leribuba di tai lontu un mindribere.+ Retidu musu de leki wan sani di unu e weri fu kibri un borsu.+ 15  A faya di un abi fu preiki a bun nyunsu fu freide+ musu de leki susu na un futu.+ 16  Awinsi san e pasa, un bribi musu de leki wan bigi skelt.+ Nanga dati unu o man kiri a faya fu ala den peiri di na ogriwan e sutu kon na un tapu.+ 17  Weri a hèlm+ fu frulusu na tapu un ede èn teki a feti-owru+ fu a yeye,+ dati na Gado Wortu.+ 18  Tan begi na ala sortu fasi+ èn begi fayafaya na ibri okasi aladi unu e meki a yeye tiri unu.+ Dati meki un musu tan na ai doronomo èn begi fayafaya gi ala den santawan. 19  Begi gi mi tu, so taki te mi opo mi mofo, mi man fruteri+ a santa kibritori fu a bun nyunsu+ sondro fu frede.+ 20  Bika mi na wan boskopuman+ fu a bun nyunsu di tai nanga keti. Un begi gi mi, so taki mi kan taki fu a bun nyunsu disi sondro fu frede, soleki fa mi musu taki.+ 21  Tikikus,+ wan lobi brada di e dini Masra fayafaya, o fruteri unu ala sani, so taki unu kan kon sabi tu san mi e du èn fa a e go nanga mi. 22  Fu dati ede mi e seni en kon gi unu, so taki unu kan sabi fa sani e go nanga wi èn so taki a kan trowstu unu.+ 23  Meki Gado a Tata èn Masra Yesus Krestes gi den brada freide, lobi, nanga bribi. 24  Meki Gado sori bun-ati+ gi ala den wan di lobi wi Masra Yesus Krestes trutru.

Futuwortu