Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Deuteronomium 8:1-20

8  Sorgu taki unu gi yesi na ala den komando di mi gi unu tide.+ Te unu du dati, dan unu o tan na libi,+ unu o kon furu, èn unu o teki a kondre di Yehovah pramisi den afo fu unu.+  Un no musu frigiti den fotenti yari di Yehovah un Gado meki un waka na ini a sabana.+ A du dati fu leri unu fu abi sakafasi.+ A tesi+ unu fu luku san ben de na ini un ati.+ A ben wani luku tu efu unu ben o gi yesi na den komando fu en, noso efu unu no ben o du dati.  Fu leri unu fu abi sakafasi, a libi unu meki angri kiri unu.+ Ne a gi unu mana,+ wan nyanyan di unu nanga den afo fu unu no ben sabi. Na so a leri unu taki sma no e libi fu brede wawan, ma fu ibri wortu di Yehovah mofo taki.+  Ala den fotenti yari disi, un krosi tan bun èn unu futu no ben e sweri.+  Un sabi heri bun taki Yehovah un Gado ben e gi unu leri neleki fa wan papa e gi en pikin leri.+  Un musu libi soleki fa Yehovah un Gado wani+ èn un musu lespeki en.+ Te unu o du dati, dan unu o hori den komando fu en.  Bika Yehovah un Gado e tyari unu go na ini wan bun kondre+ di abi lagipresi nanga bergikontren pe liba, kriki, nanga furu watra de.+  A kondre lai sani soleki aleisi, groto, droifibon, figa, granaki-apra,+ olèif fu meki oli, nanga oni.+  Na ini a kondre dati angriten no o de èn unu no o mankeri noti. Den ston na ini a kondre abi isri na ini, èn kopro de fu feni na den bergi. 10  Te un nyan un bere furu,+ un musu prèise+ Yehovah un Gado taki a gi unu a bun kondre disi.+ 11  Sorgu taki unu no frigiti+ Yehovah un Gado èn taki un gi yesi na den komando, den krutubosroiti, nanga den wèt di mi taigi unu tide.+ 12  Te un nyan un bere furu, unu bow moi oso fu tan na ini+ 13  èn un kon kisi furu kaw, skapu, solfru, gowtu, nanga tra gudu, 14  dan un no musu kisi bigifasi+ èn un no musu frigiti Yehovah un Gado di tyari unu komoto na Egepte pe unu ben de srafu.+ 15  Na en tyari unu pasa na ini a bigi sabana di e meki sma frede,+ wan sabana pe takru sneki+ èn kruktutere de. Na ini a drei sabana dati pe nowan watra de, a meki watra komoto na ini wan stonbergi fu unu dringi.+ 16  Na ini a sabana a ben gi unu mana,+ wan nyanyan di un afo no ben sabi. A du dati fu leri unu fu abi sakafasi+ èn a tesi unu fu meki unu kon moro bun na ini a ten di e kon.+ 17  Un no musu kisi a denki taki nanga un eigi krakti unu kon gudu.+ 18  Un musu tan memre Yehovah un Gado, bika na en gi unu a krakti, so taki unu kon gudu.+ A du ala den sani disi, fu di a wani hori a frubontu di a meki nanga den afo fu unu. Na dati a du te na a dei fu tide.+ 19  Mi e warskow unu taki efu unu frigiti Yehovah un Gado èn unu drai go dini tra gado, sobun unu e boigi fu anbegi den, dan unu o dede trutru.+ 20  Efu unu no gi yesi na Yehovah un Gado, dan unu o dede neleki den pipel di Yehovah kiri gi unu.+

Futuwortu