Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Deuteronomium 29:1-29

29  Boiti a frubontu di Yehovah meki nanga den Israelsma di den ben de na Horeb,+ a ben taigi Moses tu fu meki wan tra frubontu nanga den na ini a kondre Moab.  Moses kari ala den Israelsma kon makandra èn a taigi den: „Nanga un eigi ai unu si ala den sani di Yehovah du na ini a kondre Egepte. Unu si san a du nanga a kownu, den futuboi, èn a heri kondre fu en.+  Nanga unu eigi ai unu si fa Gado tyari tesi kon+ èn fa a du bigi sani nanga wondru.+  Ma te na a dei fu tide Yehovah no gi unu wan ati fu frustan sani. A no gi unu ai fu si èn yesi fu yere.+  Gado taki: ’Fotenti yari langa mi tyari unu na ini a sabana.+ A heri pisi ten dati un krosi nanga un susu no broko.+  Unu no ben e nyan brede+ èn unu no ben e dringi win nanga tra sopi. Toku mi sorgu unu, so taki unu ben o sabi taki mi na Yehovah un Gado.’  Te fu kaba unu doro na a presi disi. Ne Kownu Sihon fu Hesbon+ nanga Kownu Ok+ fu Basan kon feti nanga wi, ma wi wini den.+  Baka dati wi teki a kondre fu den èn wi gi a kondre na a lo fu Ruben, a lo fu Gad, nanga na afu lo fu Manase.+  Un musu hori a frubontu disi èn unu musu du san a taki. Dan ala sani di unu o du sa waka bun.+ 10  Tide un alamala e tanapu dyaso na fesi Yehovah un Gado. Iya, ala den edeman na ini den lo fu unu, den owru man, den fesiman, ibri mansma fu Israel,+ 11  den pikin nanga den wefi fu unu,+ èn den trakondre sma di e tan na un mindri,+ sobun, den sma di e koti udu èn di e syow watra gi unu,+ 12  e tanapu dyaso fu meki wan frubontu+ nanga Yehovah un Gado. Tide unu de dyaso, fu di Yehovah un Gado o meki wan sweri nanga unu.+ 13  Na so ala sma o sabi taki unu de en pipel+ èn taki en na un Gado,+ bika na dati a pramisi unu nanga un afo Abraham,+ Isak,+ nanga Yakob.+ 14  A no nanga unu wawan a meki a frubontu nanga a sweri disi,+ 15  ma a meki en tu nanga den tra sma di e tanapu dyaso nanga wi tide na fesi Yehovah wi Gado. A meki en tu nanga den sma di no de dyaso nanga wi tide.+ 16  (Unu sabi heri bun fa a ben de di wi ben e tan na ini a kondre Egepte èn di wi waka pasa na ini den kondre fu den tra pipel.+ 17  Unu si den tegu sani di den ben e du èn unu si den fisti gado+ fu den di meki fu udu, ston, solfru nanga gowtu.) 18  Sobun, nowan man, nowan uma, nowan famiri noso lo fu unu musu drai baka gi Yehovah un Gado fu go dini den gado fu den pipel dati.+ Efu unu du dati, dan unu o de leki a rutu fu wan bitabon èn wan bon di abi vergif.+ 19  Te sonwan fu unu yere a sweri disi,+ dan kande unu o kisi bigifasi èn unu o prakseri: ’Awinsi mi e du ala san mi ati wani,+ toku sani o waka bun gi mi.’+ Ma disiten unu e prakseri fu kiri ala sma neleki te wan sma e kiri ala bon. A no abi trobi efu na fatu bon noso drei bon. 20  Yehovah no o gi so wan sma pardon.+ Na presi fu dati, Yehovah en ati o bron+ nanga a sma disi,+ iya, a o de nanga bigi atibron.+ Ala den fluku di skrifi na ini a buku+ disi o kon na a sma tapu trutru. Yehovah o figi en puru na grontapu. 21  Yehovah o meki taki rampu miti en wawan+ na mindri ala den lo fu Israel. Bika ala den fluku fu a frubontu di skrifi na ini a wètbuku disi, o kon na en tapu. 22  Bakaten den bakapikin fu unu nanga den sma di kon fu farawe kondre o si den rampu nanga siki di Yehovah tyari na tapu a kondre disi+ èn den o taki fu a tori disi. 23  Ston di e bron,* sowtu,+ nanga faya+ o pori a heri kondre. Unu no o man prani noti. Nowan bon o sproiti èn nowan sani o gro na ini a kondre. A kondre o de leki Sodom nanga Gomora,+ èn leki Adma+ nanga Sebowim.+ Yehovah ben pori den kondre disi, fu di a ben de nanga bigi atibron.+ 24  Iya, ala den pipel o aksi: ’Fu san ede Yehovah du dati nanga a kondre disi?+ Fu san ede en ati bron so?’ 25  Dan sma o piki den: ’Na fu di den no hori a frubontu+ di Yehovah, a Gado fu den afo fu den, meki nanga den di a tyari den komoto fu Egepte.+ 26  Den go dini tra gado èn den boigi gi gado di den no ben sabi. A Gado fu den ben taigi den taki den no ben musu anbegi den tra gado disi.+ 27  Dati meki Yehovah en ati bron srefisrefi nanga a pipel, èn ala den fluku di skrifi na ini a wètbuku fu den kon na tapu a kondre dati.+ 28  Nanga bigi atibron+ Yehovah rutu den puru na ini a kondre èn a trowe den na ini wan tra kondre, soleki fa unu si tide.’+ 29  Na Yehovah wi Gado sabi den kibritori,+ ma te a tyari wan sani kon na krin,+ dan na wi nanga den bakapikin fu wi o sabi den sani disi. Ala ten disi o de so, so taki wi man du ala den sani di skrifi na ini a wèt disi.+

Futuwortu

Noso: „swarfu.”