Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Deuteronomium 25:1-19

25  Te tu man abi trobi nanga makandra+ èn den go na fesi krutu fu lusu a trobi,+ dan den krutuman musu krutu sani na wan reti fasi. A wan di no fowtu musu kisi reti, èn a wan di du ogri musu kisi strafu.+  Efu a krutuman taki dati na ogriman musu kisi fonfon,+ dan a musu meki na ogriman didon langalanga na gron èn den musu fon en.+ A krutuman musu luku sortu ogri na ogriman du, dan a musu taki omeni leisi den musu naki en fu na ogri di a du.  Unu kan naki en fotenti leisi nomo. Un no musu naki en moro leki dati, noso un kondreman o kisi syen.+  Un no musu tai a mofo fu wan mankaw te a e masi aleisi.+  Kon meki wi taki dati wan tu brada e tan na wan presi èn wan fu den kon dede sondro fu kisi wan manpikin. A wefi fu en no musu trow nanga wan sma di no de famiri fu en masra. Wan fu den brada fu a dede man, musu trow nanga na uma disi. A brada abi a plekti fu trow nanga en swagri.+  A fosi pikin di na uma o kisi nanga a brada disi, o tyari a nen fu a brada di dede.+ Na so a nen fu a brada di dede no o lasi gowe na ini Israel.+  Efu a man no wani trow nanga a wefi fu en brada di dede kaba, dan a wefi musu go taki nanga den owru man+ di e sidon na a portu fu a foto. A musu taigi den: ’A brada fu mi masra no wani taki a nen fu en brada tan na ini Israel. A no wani trow nanga mi, aladi a abi a plekti fu du dati.’  Dan den owru man fu a foto musu kari a brada kon. Na fesi ala den owru man a brada musu taki: ’Mi no wani trow nanga en.’+  Baka dati a wefi fu a dede man musu waka miti a brada, èn na fesi den owru man a musu puru a brada en susu na en futu,+ dan a musu spiti na ini en fesi.+ A musu taki: ’Disi na san musu pasa nanga wan man di no wani kisi wan manpikin gi en brada.’+ 10  Dan sma na ini Israel o taki fu na osofamiri fu a man disi: ’Dati na a osofamiri fu a man di den puru a susu na en futu.’ 11  Kon meki wi taki dati tu man e feti. Efu a wefi fu a wan man kon yepi en masra èn a grabu a syenpresi fu a tra man,+ 12  dan un musu koti na uma en anu puru. Un no musu sari en.+ 13  Un no musu abi tu sortu wegiston na ini un saka.+ Sobun, un no musu abi wan pikin wegiston nanga wan bigi wegiston. 14  Un no musu abi tu sortu baki fu marki sani.+ Sobun, un no musu abi wan bigiwan nanga wan pikinwan. 15  Ala ten un musu abi wegiston di e wegi sani soifri èn bigi baki di e marki sani soifri. Efu unu du dati, dan unu o libi langa na ini a kondre di Yehovah un Gado o gi unu.+ 16  Yehovah un Gado e tegu gi iniwan sma di e du den sani disi, sobun iniwan sma di e du kruktu sani.+ 17  Un no musu frigiti san den Amalèksma du nanga unu di unu ben e komoto na Egepte.+ 18  No frigiti san den du di den miti unu na pasi. Den kon feti nanga unu di unu ben weri srefisrefi èn den kiri ala sma di ben de na bakasei fu a grupu fu unu. Den no ben frede Gado srefi.+ 19  Fu dati ede, te Yehovah un Gado sorgu taki den feanti na un lontu no kon feti nanga unu moro na ini a kondre di Yehovah un Gado gi unu,+ dan un musu figi ala den Amalèksma puru na grontapu.+ Nowan sma o memre den moro. Un no musu frigiti disi.

Futuwortu