Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Deuteronomium 23:1-25

23  Efu wan man abi wan mankeri na en koko,+ noso en syenpresi koti puru, dan a no musu de na mindri a pipel fu Yehovah.  Efu wan man meki wan manpikin nanga wan uma di no de en wefi,+ dan a manpikin dati no musu de na mindri a pipel fu Yehovah. Nowan fu den bakapikin* fu en musu de na mindri a pipel fu Yehovah.  Nowan Amonsma noso Moabsma musu de na mindri a pipel fu Yehovah.+ Srefi den bakapikin fu den no musu kon noiti na mindri a pipel fu Yehovah,  fu di den no ben yepi+ unu di unu ben de na pasi e komoto fu Egepte.+ Na presi fu gi unu brede nanga watra, den seni Bileam, a manpikin fu Beor di de fu a presi Peitor na ini Mesopotamia, fu fluku unu.+  Ma Yehovah un Gado no ben wani arki Bileam.+ Yehovah un Gado meki a fluku tron wan blesi gi unu,+ fu di Yehovah un Gado lobi unu.+  Un no musu du bun gi den sma disi, èn un no musu meki sani waka bun gi den solanga unu de na libi.+  Unu no musu abi bita-ati gi den Edomsma, bika den na un brada.+ Un no musu abi bita-ati gi den Egeptesma, bika unu ben e libi na ini a kondre fu den leki trakondre sma.+  Ma te den granpikin fu den meki pikin, dan den pikin dati kan kon na mindri a pipel fu Yehovah.  Te unu o go seti kampu lontu wan foto fu feti nanga den feanti fu unu, dan un no musu du nowan sani di o meki taki unu no krin.+ 10  Efu wan man na un mindri no krin, fu di a puru skiti na neti,+ dan a musu go na dorosei fu a kampu. A no musu tan na ini a kampu.+ 11  Na mofoneti a musu wasi en skin nanga watra, dan a kan kon baka na ini a kampu te son dongo.+ 12  Na dorosei fu a kampu, un musu abi wan presi pe sma kan go pupe. Na drape un musu go pupe. 13  Wan fu den wrokosani di unu musu abi ala ten, na wan pikin skopu. Un musu gebroiki dati fu diki wan olo te unu e go pupe dorosei fu a kampu. Te unu kaba, un musu tapu na olo pe unu ben pupe na ini.+ 14  Na so unu musu du, fu di Yehovah un Gado de na un mindri na ini a kampu. A o frulusu unu+ èn a o libi den feanti gi unu, so taki unu kan wini den.+ A kampu fu unu musu de santa+ èn Gado no musu si nowan morsu sani na un mindri, noso a o drai gowe libi unu.+ 15  Te wan srafu lowe fu en masra èn a kon na unu, dan un no musu tyari en go na en masra baka.+ 16  A srafu musu tan nanga unu na iniwan fu den foto pe a wani.+ Un no musu libi takru nanga en.+ 17  Nowan umapikin na ini Israel musu tron wan tempel huru-uma.+ Sosrefi, den manpikin na ini Israel no musu teki en leki wroko fu abi seks nanga trawan na ini a tempel.+ 18  Unu no musu tyari a moni fu wan huru-uma+ noso fu wan dagu*+ kon na a oso fu Yehovah un Gado fu meki wan sweri, bika Yehovah un Gado no lobi den sani disi, iya, a e tegu gi ibriwan fu den sani disi. 19  Te unu leni un kondreman moni, nyanyan,+ noso iniwan tra sani, dan un no musu meki a pai rente.+ 20  Unu kan meki wan trakondre sma+ pai rente, ma un no musu meki un kondreman pai rente.+ Te unu du disi, dan Yehovah un Gado o blesi ala sani di unu o du na ini a kondre pe unu o go tan.+ 21  Efu unu sweri Yehovah+ un Gado wan sani, dan un no musu draidrai fu du san unu sweri.+ Bika unu kan de seiker taki Yehovah un Gado o aksi unu fu gi en san unu sweri. A de wan sondu te unu no du san unu sweri.+ 22  Ma efu unu no ben meki wan sweri, dan unu no sondu.+ 23  Ala ten un musu du san unu pramisi+ èn san unu sweri Yehovah un Gado. Te unu meki wan sweri èn unu du san unu sweri, dan dati de leki wan ofrandi di unu firi fu tyari gi Gado.+ 24  Efu unu go na ini a droifidyari fu wan kondreman fu unu, dan unu kan nyan someni droifi leki unu wani. Ma un no musu poti droifi na ini wan saka fu tyari den gowe.+ 25  Efu unu go na ini wan aleisigron fu wan kondreman fu unu, dan nanga un anu unu kan piki soso na aleisi di lepi kaba. Un no musu teki wan nefi fu koti den aleisitiki puru na ini a gron fu en.+

Futuwortu

Hebrewtongo: „den trotropikin fu den trotropikin.”
Kande disi na wan man di abi seks nanga mansma èn spesrutu nanga pikin boi.