Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Deuteronomium 21:1-23

21  Kon meki wi taki dati wan sma kiri wan trawan èn bakaten den feni a dede sma na wan presi na ini a kondre di Yehovah un Gado gi unu fu tan. Efu nowan sma sabi suma kiri en,+  dan den owru man nanga den krutuman+ fu unu musu luku sortu foto de lontu a presi pe a dedeskin de. Dan den musu marki o fara den foto de fu a presi  èn den musu luku sortu foto de moro krosibei fu a dedeskin. Den owru man fu a foto dati musu teki wan yongu kaw di no du nowan wroko ete èn di no weri wan tyatyari noiti,  dan den musu tyari en go na wan lagipresi pe wan liba de. A musu de wan presi pe sma no gwenti wroko noso prani sani. Drape na ini a lagipresi den musu broko a neki fu a yongu kaw.+  Dan den priester, sobun den Leifisma, musu kon drape. Na den Yehovah un Gado teki fu wroko gi en+ èn fu blesi+ sma na ini a nen fu Yehovah. Na den musu koti krutu te wan sma du wan ogri.+  Ala den owru man fu a foto di de moro krosibei fu a dedeskin, musu wasi den anu,+ so taki a watra fadon na tapu a yongu kaw di den kiri na a lagipresi.  Dan den musu taki: ’A no wi anu kiri a sma disi èn wi no si suma kiri en.+  Ke Yehovah, no meki yu pipel Israel di yu frulusu,+ tyari a frantwortu fu a sani disi. No strafu yu pipel Israel, fu di sma kiri a sma disi fu soso.’+ Te den du ala den sani disi, dan a pipel no o abi brudu-paiman.  Fu di unu o du san Yehovah feni bun,+ meki unu o puru brudu-paiman na un mindri.+ 10  Kon meki wi taki dati unu go feti nanga un feanti èn Yehovah un Gado meki unu wini den,+ dan unu tyari den gowe leki katiboman.+ 11  Kande yu si wan moi uma na den mindri èn yu kon lobi en.+ Efu yu wani teki en leki wefi, 12  dan yu musu tyari en go na yu oso. Na uma musu krebi en ede+ èn a musu koti en nangra. 13  A no musu weri den krosi moro di a ben weri a dei di unu teki en tyari gowe. Meki a tan na ini yu oso. Wan heri mun langa a musu sari fu en papa nanga en mama ede.+ Dan yu musu trow nanga en. A musu kon de yu wefi èn yu musu didon nanga en. 14  Ma efu yu no lobi en moro, dan yu musu seni en gowe+ efu a wani. Noiti yu musu seri en. Yu no musu pina en,+ bika yu ben dwengi en kaba fu tron yu wefi. 15  Kon meki wi taki dati wan man abi tu wefi, ma a lobi a wan moro a trawan. Ne ala tu uma meki manpikin gi en. Ma na a uma di a no lobi so furu kisi a fosi manpikin.+ 16  Efu a dei doro taki a man musu prati a famirigudu gi den manpikin fu en, dan a no musu si a manpikin fu na uma di a lobi, leki en fosi manpikin. En fosi manpikin na a wan fu na uma di a no lobi so furu.+ 17  Sobun, a musu si a manpikin fu na uma di a no lobi so furu, leki en fosi manpikin. Dati meki a musu gi a manpikin dati tu tron moro leki san a o gi den tra manpikin.+ A manpikin disi na a fosiwan fu ala den pikin di a kisi.+ Na en abi a reti fu a fosi manpikin.+ 18  Kon meki wi taki dati wan man abi wan tranga-ede manpikin di gwenti opo ensrefi teige+ en èn a no e arki te en papa noso mama e taki nanga en.+ Kande en papa nanga mama piri-ai gi en, ma toku a no wani arki den.+ 19  We, dan en papa nanga mama musu tyari en go na den owru man di de na a portu fu a foto pe a e tan.+ 20  Den musu taigi den owru man fu a foto: ’A manpikin fu wi tranga-ede èn a e opo ensrefi teige wi. A no e arki san wi e taki,+ a gridi,+ èn a de wan drunguman.’+ 21  Dan ala den man fu a foto musu trowe ston na en tapu teleki a dede. Na so un musu puru ala ogri na un mindri. Dan ala sma na ini Israel o kon frede te den yere san pasa.+ 22  Kon meki wi taki dati wan sma kisi dedestrafu fu wan sondu di a du. Te unu kiri+ en èn unu anga en na wan postu,+ 23  dan un no musu meki en dedeskin anga drape heri neti.+ Awinsi fa a no fa, un musu beri en a srefi dei dati, fu di wan sma di anga na wan postu, na wan sma di Gado fluku.+ Un no musu doti a kondre di Yehovah un Gado gi unu fu tan na ini.+

Futuwortu