Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Deuteronomium 12:1-32

12  Ala ten un musu gi yesi+ na den wèt+ nanga den krutubosroiti+ disi te unu de na ini a kondre di Yehovah, a Gado fu den afo fu unu, sa meki unu teki abra. Solanga unu de na grontapu un musu hori den wèt disi.+  Den pipel di unu o yagi gowe e anbegi den gado fu den na tapu den hei bergi nanga den pikin bergi, èn na ondro ibri bigi bon di abi furu wiwiri.+ Un no musu draidrai fu pori+ ala den presi pe den e anbegi den gado fu den.  Broko den altari fu den+ èn naki den santa pilari fu den panya.+ Bron den santa postu fu den+ èn koti den popki trowe+ di den e anbegi leki gado. No libi nowan sani di e memre sma na den gado disi.+  Un no musu anbegi Yehovah un Gado leki fa den pipel e anbegi den gado fu den.+  Na ini a heri kontren pe ala den lo fu unu o tan, Yehovah un Gado o sori unu wan presi di musu tyari en nen. Na a presi dati un musu go fu anbegi en.+  Na drape un musu tyari un bron-ofrandi,+ un srakti-ofrandi, a di fu tin pisi fu den sani di unu abi,+ nanga den tra sani di unu wani tyari kon.+ Na drape un musu tyari den ofrandi tu te unu meki wan sweri,+ èn te unu firi fu tyari wan ofrandi.+ Na a srefi presi dati un musu tyari den fosi pikin fu den kaw nanga den skapu fu unu.+  Drape unu nanga un osofamiri musu nyan na fesi Yehovah un Gado,+ èn un musu prisiri nanga ala sani di unu du,+ bika Yehovah un Gado blesi unu.  Te unu de na ini a kondre un no musu du sani soleki fa wi gwenti du nownow. Bika now ibriwan sma e du san a feni bun.+  Unu no kon ete na a presi pe unu o tan+ èn unu no de ete na ini a kondre di Yehovah un Gado gi unu. 10  Ma te unu abra Yordan-liba+ èn unu e tan na ini a kondre di Yehovah un Gado gi unu,+ dan a sa sorgu taki nowan feanti na un lontu o suku fu feti nanga unu èn sani sa waka bun gi unu trutru.+ 11  Te Yehovah un Gado sori unu a presi+ di musu tyari en nen, dan na drape un musu tyari ala sani di mi e taigi unu fu tyari. Na drape un musu tyari un bron-ofrandi,+ un srakti-ofrandi, a di fu tin pisi fu den sani di unu abi,+ nanga den tra sani di unu wani tyari kon.+ Na drape un musu tyari ala sani di unu wani gi leki ofrandi te unu sweri+ Yehovah wan sani. 12  Te unu e kon na fesi Yehovah un Gado fu anbegi en, dan un musu prisiri+ makandra nanga un manpikin, un umapikin, nanga den man nanga uma di e wroko gi unu leki srafu. Un musu prisiri tu nanga den Leifisma di de na ini den foto fu unu, bika den no o kisi wan pisi fu a kondre èn den no o kisi wan famirigudu neleki di fu unu.+ 13  Luku bun taki unu no tyari bron-ofrandi na iniwan tra presi di unu si.+ 14  Na ini a kontren fu wan fu den lo fu unu, Yehovah o sori unu wan presi pe unu musu tyari bron-ofrandi. Na drape un musu du ala den sani di mi taigi unu.+ 15  Ma te unu de na ini wan foto èn unu lostu fu nyan meti, dan unu kan srakti+ wan meti èn nyan en drape. Un kan nyan someni meti leki Yehovah un Gado gi unu. Awinsi wan sma krin noso a no krin,+ toku a kan nyan a meti neleki fa a kan nyan dia.+ 16  Na a brudu wawan un no musu nyan.+ Neleki watra un musu trowe en na gron.+ 17  Na ini un foto unu no o kisi primisi fu gebroiki a di fu tin pisi+ di un musu puru fu un aleisi, un nyun win, nanga un oli. Drape un no musu nyan a fosi pikin fu un kaw nanga skapu,+ iniwan ofrandi di un musu tyari fu di unu meki wan sweri noso fu di unu firi fu tyari wan ofrandi,+ èn iniwan tra sani di unu wani gi.+ 18  Ma na a presi di Yehovah un Gado sori unu,+ na drape un musu nyan den sani disi na fesi Yehovah un Gado, makandra nanga un manpikin, un umapikin, den man nanga uma di e wroko gi unu leki srafu, nanga den Leifisma di de na ini den foto fu unu. Awinsi san unu e du, un musu prisiri+ na fesi Yehovah un Gado. 19  Sorgu taki unu memre den Leifisma+ ala ten, solanga unu de na libi. 20  Bakaten te unu de na ini a kondre èn Yehovah un Gado meki a kondre kon moro bigi,+ soleki fa a pramisi unu,+ dan kande wan dei unu o wani nyan meti fu di unu e lostu en trutru.+ 21  Efu a presi pe un musu kari Yehovah en nen,+ de tumusi fara fu unu, dan un musu srakti wan kaw, wan skapu, noso wan tra meti di Yehovah un Gado gi unu. Un musu srakti en soleki fa mi taigi unu. Un kan nyan en na ini un foto te unu lostu a meti trutru.+ 22  Awinsi wan sma krin noso a no krin,+ toku a kan nyan a meti neleki fa a kan nyan dia.+ 23  A wan-enkri sani di un musu hori na prakseri, na taki noiti un musu nyan brudu,+ bika a brudu na a libi*+ fu a meti. Sobun, un no musu nyan a meti te a abi brudu na ini. 24  Un no musu nyan a brudu. Neleki watra un musu trowe en na gron.+ 25  Efu unu wani taki sani waka bun gi unu nanga den bakapikin fu unu,+ dan unu no musu nyan brudu. Na so unu o du san Yehovah feni bun.+ 26  Na soso den santa sani+ èn den ofrandi di un musu tyari te unu meki wan sweri,+ un musu tyari go na a presi di Yehovah sa sori unu.+ 27  Na tapu na altari fu Yehovah un Gado un musu bron a meti nanga a brudu+ fu den meti di unu tyari leki bron-ofrandi.+ Un musu trowe a brudu fu den srakti-ofrandi na a altari fu Yehovah+ un Gado, ma a meti unu kan nyan. 28  Sorgu taki unu du ala den sani di mi e taigi unu fu du.+ Dan ala ten sani o waka bun nanga unu èn den bakapikin fu unu,+ fu di unu du san Yehovah un Gado wani èn san a feni bun.+ 29  Te Yehovah un Gado kiri den pipel na ini a kondre di unu o teki abra,+ dan a kondre o de fu unu èn un musu go tan na ini.+ 30  Te Gado figi den pipel disi puru, dan un musu luku bun taki tesi no miti unu+ fu di unu o go aksi unsrefi: ’Fa den pipel disi ben e anbegi den gado fu den? Kande wi srefi kan du dati tu.’ 31  Un no musu anbegi Yehovah un Gado na a fasi dati,+ bika den pipel disi e anbegi den gado fu den na wan fasi di Yehovah no lobi kwetikweti. Srefi den manpikin nanga den umapikin fu den, den gwenti bron na ini faya gi den gado fu den.+ 32  Un musu du ala sani finifini soleki fa mi taigi unu.+ Un no musu poti moro komando gi unsrefi èn un no musu puru nowan fu den tu.+

Futuwortu

Hebrew wortu: nefesj. Luku „Moro sani”, nr. 8.