Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Amos 6:1-14

6  „Helu fu den sma di e libi sondro broko-ede+ na Sion èn den sma na Samaria-bergi di no e frede! Den na den prenspari sma fu a moro prenspari pipel di de. Na den sma disi den Israelsma kon.  Un hari go na Kalne, dan un luku lontu. Fu Kalne un musu hari go na Hamat+ pe furu sma e tan, dan un musu saka go na a foto Gat+ fu den Filisteasma. Unu si taki wan fu den presi disi bun moro den tu kownukondre fu unu? Unu si taki a kontren fu den bigi moro a di fu unu?+  Na prakseri unu no wani prakseri a dei te rampu o kon?+ Na ogridu unu e tyari kon na un mindri?+  Unu e didon na tapu bangi di abi moimoi sani fu ivoor+ èn unu e bradi unsrefi e didon na tapu langa bangi. Na den moro bun manskapu fu na ipi unu e nyan èn fu den fatu pikin kaw unu e teki den manwan.+  Unu e meki ala sortu nyun poku nanga den pokusani di gersi harpu.+ Neleki David, unu meki nyun pokusani tu fu meki singi.+  Na ini koba unu e dringi win.+ Unu e lobi den moro diri oli gi un skin.+ Unu no kon siki fu a rampu fu Yosef.+  Dati meki now unu o de den fosiwan di o go na ini katibo.+ Den sma di e didon na tapu den langa bangi no o hori den bigi fesa fu den moro pe den e nyan èn dringi pasa marki.  Yehovah, a Gado di e tiri den legre taki: ’A Moro Hei Masra Yehovah sweri na en eigi libi:+ „Mi o meki sma teki un foto abra nanga ala sani di de na ini,+ bika mi e tegu gi a bigifasi fu Yakob+ èn mi no lobi den toren fu en pe sma e tan.+  Efu tin man tan abra na ini wan oso, dan densrefi o dede tu.+ 10  A brada fu a papa fu wan fu den o tyari den wan-fru-wan kon na doro èn a o bron den wan-fru-wan.+ Na dati a musu du fu puru den bonyo na ini na oso. Efu wan sma de na ini na oso ete, dan a o aksi a sma: ’Moro sma de nanga yu?’ Dan a sma o taki: ’Nowan sma de dya!’ Dan a o taki: ’Tapu yu mofo! Now a no a ten fu kari a nen fu Yehovah.’”+ 11  Bika te Yehovah gi a komando,+ dan bigi oso o broko na pisipisi èn pikin oso o tron wan ipi broko ston.+ 12  Wan asi man lon na tapu wan stonbergi, noso wan sma man tyari en kaw go plugu drape? Unu meki retidu kon de leki wan bon di abi vergif,+ èn unu meki a froktu fu retifasi kon bita. 13  Unu e prisiri nanga wan sani di no de.+ Unu taki: „Na fu di wi tranga meki wi kisi makti,* a no so?”+ 14  Iya, mi o meki wan pipel+ kon feti nanga un Israelsma’, na so Yehovah, a Gado di e tiri den legre taki. ’A pipel disi o kwinsi unu na ini a heri kontren di de na fesi Hamat+ te go miti Araba-lagipresi.’”

Futuwortu

Hebrewtongo: „tutu.” Nofo tron Bijbel e agersi krakti noso makti nanga wan tutu.