Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Amos 3:1-15

3  „Un Israelsma, arki san mi, Yehovah, taki fu unu,+ a pipel di mi tyari komoto na Egepte:+  ’Fu ala den pipel na grontapu,+ na unu wawan mi ben sabi.+ Dati meki mi o aksi unu frantwortu fu ala den sondu di unu du.+  Nowan sma o waka nanga wan trawan, efu a no meki mofo fu waka nanga en, a no so?+  Wan lew o bari na ini busi efu a no kisi wan meti?+ Wan yongu lew o bari komoto fu en tanpe efu a no kisi nowan meti?  Sma kan kisi wan fowru efu den no poti wan trapu gi en?+ Wan krafana e tapu efu nowan meti go na ini?  Te sma e bro wan tutu na ini a foto, dan ala sma e beifi, a no so?+ Efu rampu pasa na ini wan foto, dan a no Yehovah du wan sani?  Ma a Moro Hei Masra Yehovah no sa du noti, fosi a tyari den kibritori fu en kon na krin gi den futuboi fu en, den profeiti.+  Wan lew bari!+ Suma no sa frede? A Moro Hei Masra Yehovah taki! Sortu profeiti no o taki san Gado taki?’+  ’Go taigi ala sma di e tan na den toren fu a foto Asdod èn na den toren fu a kondre Egepte:+ „Un kon makandra na den bergi fu Samaria.+ Luku den bruya sani di sma e du drape èn a bedrigi di den e bedrigi makandra na ini a foto dati.+ 10  Sma e du furu ogri.+ Na ini den toren pe den e tan den e kibri den sani di den fufuru nanga tranga.+ Den no sabi fa fu du san reti”’, na so Yehovah taki. 11  Fu dati ede a Moro Hei Masra Yehovah taki: ’Wan feanti o lontu a kondre,+ èn a o puru a makti di unu abi. Nanga tranga a o fufuru den sani na ini den toren pe unu e tan.’+ 12  Yehovah taki: ’Te wan lew kisi wan skapu, dan nofo tron a skapuman e hari wan pisi yesi noso tu bowtu puru na a mofo fu a lew.+ Na so o pasa tu nanga den Israelsma di e tan na Samaria èn di e sidon tapu den moi bangi+ nanga den langa bangi fu Damaskus. Soso wan tu fu den o tan abra.’+ 13  ’Un arki èn un warskow+ den sma fu Yakob’, na so a Moro Hei Masra Yehovah, a Gado di e tiri den legre taki. 14  ’Bika mi o aksi Israel frantwortu,+ fu di a opo ensrefi. A dei dati mi o broko den altari fu Betel tu.+ Mi o broko den tutu fu ibri altari, meki den fadon na gron.+ 15  Mi o broko den oso pe den Israelsma e tan na a kowru ten fu a yari,+ èn den oso pe den e tan na a waran ten fu a yari.’+ ’Den oso fu den di lai nanga ivoor o broko.+ Furu oso fu den o fadon broko’,+ na so Yehovah taki.”

Futuwortu