Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

Esekièl 42:1-20

42  Na so a man tyari mi go+ na dorosei, na a bigi tempel-dyari. A meki mi waka a pasi di e go na noordsei.+ Dan a tyari mi go na a oso pe den nyanyan-kamra+ ben de na noordsei. Den ben de na sei na opo presi+ èn na sei a bigi oso.  A skotu fu na oso di ben abi den nyanyan-kamra ben langa feifitenti na wán meter nanga aititenti centimeter èn a ben bradi tutenti na feifi meter nanga neigitenti centimeter. Wan doro ben de na noordsei fu na oso pe den nyanyan-kamra ben de.  Na mindri na opo presi fu a pikin tempel-dyari+ nanga a ston-gron+ fu a bigi tempel-dyari, yu ben abi tu oso di ben abi nyanyan-kamra nanga balkon.+ Den tu oso ben de abrasei fu makandra èn ibriwan fu den ben abi tu sodro. Na opo presi ben bradi tin meter nanga dritenti na siksi centimeter.  Wan pasi ben de fu waka na mindri den tu oso di ben abi den nyanyan-kamra. A pasi ben bradi feifi meter nanga tina-aiti centimeter èn a ben langa feifitenti na tu meter.+ Den doro fu den nyanyan-kamra ben e sori go na noordsei.  Fu di den nyanyan-kamra na ini na oso na a di fu tu sodro nanga a fosi sodro ben abi balkon, meki den ben moro smara leki den nyanyan-kamra na gron.  Den oso di ben abi den nyanyan-kamra, ben abi tu sodro.+ Den oso no ben abi pilari leki den wan na den tempel-dyari. Fu dati ede den nyanyan-kamra na a di fu tu sodro ben moro smara leki den nyanyan-kamra na gron èn leki den wan na a fosi sodro.  A ston skotu na dorosei ben de krosibei fu den nyanyan-kamra na a sei fu a bigi tempel-dyari, na fesisei fu den tra nyanyan-kamra. A skotu ben langa tutenti na feifi meter nanga neigitenti centimeter.  A skotu fu na oso pe den nyanyan-kamra ben de, na a sei fu a bigi tempel-dyari, ben langa tutenti na feifi meter nanga neigitenti centimeter. Ma na a sei fu a tempel a skotu ben langa feifitenti na wán meter nanga aititenti centimeter.  Na gron pe den nyanyan-kamra ben de, yu ben abi wan doro na owstusei fu na oso. Te wan sma ben komoto na a bigi tempel-dyari fu go na ini den nyanyan-kamra, dan a ben kan waka na a doro dati. 10  Na zuidsei yu ben abi nyanyan-kamra+ tu na baka a ston skotu di de na owstusei. Den ben de na sei na opo presi+ èn na sei a bigi oso. 11  A pasi di ben de na mindri den tu oso pe den nyanyan-kamra na zuidsei ben de, ben gersi a pasi di ben de na mindri den tu oso pe den nyanyan-kamra na noordsei+ ben de. Den nyanyan-kamra na zuidsei ben bigi a srefi leki den wan na noordsei. Den ben langa a srefi èn den ben bradi a srefi. Den portu ben de a srefi leki den wan na noordsei. A fasi fa den nyanyan-kamra na zuidsei nanga den doro fu den kamra disi meki, ben de a srefi leki den wan na noordsei. 12  Den doro fu den nyanyan-kamra na zuidsei ben de a srefi leki den doro di ben de na a bigin fu a pasi. Dati na a pasi di de na fesi a ston skotu na owstusei, na a presi pe sma e waka kon na inisei fu go na den nyanyan-kamra.+ 13  Ne a man taigi mi: „Den nyanyan-kamra na noordsei nanga den nyanyan-kamra na zuidsei di de na sei na opo presi,+ na santa nyanyan-kamra. Na drape den priester di e kon na fesi+ Yehovah e go fu nyan den moro santa ofrandi.+ Na drape den e poti den moro santa ofrandi, sosrefi den nyanyan-ofrandi, den sondu-ofrandi, nanga den pardon-ofrandi, fu di a presi dyaso na wan santa presi.+ 14  Efu den priester de na ini a Santa Presi èn den wani go na a bigi tempel-dyari, dan den no musu waka langalanga na ini a Santa Presi fu go na dorosei. Ma den musu puru den krosi di den gwenti weri fu du a wroko fu den,+ fu di den krosi dati na santa krosi. Te den weri tra krosi+ kaba, dan fosi den kan go na den presi pe tra sma de.” 15  Baka di a man kaba marki ala sani na tapu a tempel-dyari, a meki mi waka na wan portu fu go na dorosei. A fesisei fu a portu dati ben e sori go na owstusei.+ Dan a marki ala sani drape. 16  Nanga wan markitiki, a marki a heri skotu na owstusei. Di a marki en nanga a markitiki, a kon si taki a heri skotu lontu ben langa wán dusun feifi hondro feifitenti na feifi meter.+ 17  A marki a skotu na noordsei. Di a marki en nanga a markitiki, a kon si taki a heri skotu lontu ben langa wán dusun feifi hondro feifitenti na feifi meter. 18  A marki a skotu na zuidsei. Di a marki en nanga a markitiki, a kon si taki a pisi dati fu a skotu ben langa wán dusun feifi hondro feifitenti na feifi meter. 19  Dan a waka go na a skotu na west-sei. Nanga a markitiki, a marki wán dusun feifi hondro feifitenti na feifi meter. 20  A marki ala fo sei fu a tempel-dyari. Wan skotu ben de lontu a dyari.+ A skotu ben langa wán dusun feifi hondro feifitenti na feifi meter èn a ben bradi wán dusun feifi hondro feifitenti na feifi meter.+ A skotu ben musu prati a santa pisi fu a dyari fu a pisi di no ben santa.+

Futuwortu