Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

2 Samuel 6:1-23

6  Ete wan leisi David tyari den moro bun srudati fu Israel+ kon na wán. Ala nanga ala, den ben de dritenti dusun.  Ne David nanga ala den sma di ben de nanga en, opo go na Bale-Yuda+ fu go teki a santa kisi+ fu a tru Gado. Na a santa kisi disi e tyari a nen+ fu Yehovah di e tiri den legre,+ di e sidon na tapu den kerub-engel.+  Ma di den go teki a santa kisi fu a tru Gado na ini na oso fu Abinadab+ na tapu a pikin bergi, den poti en na tapu wan nyun wagi+ èn Usa nanga Ahio,+ den manpikin fu Abinadab, ben e tyari a nyun wagi disi.  Sobun, den puru a santa kisi fu a tru Gado na ini na oso fu Abinadab. Na oso disi ben de na tapu a pikin bergi. Ahio ben e waka na fesi a santa kisi.  Disiten David nanga ala den sma fu Israel ben e meki prisiri na fesi Yehovah. Den ben e prei ala sortu pokusani di meki fu yaneifer-udu, sosrefi harpu,+ pokusani di gersi harpu,+ tyengretyengre,+ gengen, nanga tra pokusani.+  Baka wan pisi ten den doro krosibei fu Nakon na wan presi pe sma e masi aleisi. Di Usa+ si taki den kaw ben o meki a santa kisi fu a tru Gado kanti, dan a langa en anu èn a grabu a santa kisi hori.+  Ne Yehovah ati kon bron+ srefisrefi nanga Usa. Dati meki a tru Gado kiri+ Usa drape, fu di Usa no ben sori lespeki gi en. Na so Usa dede leti drape krosibei fu a santa kisi fu a tru Gado.+  Di David si taki Yehovah kiri Usa nanga bigi atibron, a mandi. Dati meki sma e kari a presi dati Peres-Usa te na a dei fu tide.+  A dei dati David kon frede Yehovah.+ A taki: „Fa a santa kisi fu Yehovah o doro pe mi e tan?”+ 10  Dati meki David no ben wani tyari a santa kisi fu Yehovah go na a Foto fu David+ pe a ben e tan. Sobun, a koti komoto na a pasi, dan a tyari a santa kisi go na a oso fu Obed-Edom,+ wan man fu Gat.+ 11  Dri mun langa a santa kisi fu Yehovah tan na a oso fu Obed-Edom, a man fu Gat. A heri pisi ten dati, Yehovah blesi+ Obed-Edom nanga en heri osofamiri.+ 12  Te fu kaba sma kon taigi Kownu David: „Yehovah blesi na osofamiri fu Obed-Edom nanga ala den sani di a abi, fu di a santa kisi fu a tru Gado de drape.” Ne David go na a oso fu Obed-Edom, dan a teki a santa kisi fu a tru Gado tyari go na a Foto fu David èn a ben e meki prisiri.+ 13  Ne den sma di ben e tyari+ a santa kisi fu Yehovah, waka siksi stap èn wantewante David tyari wan mankaw nanga wan tra fatu meti leki ofrandi.+ 14  Nanga en heri ati David ben e dansi. A ben e dyompo èn drai lontu na fesi Yehovah. Disiten a ben e weri wan fesikoki+ fu linnen krosi. 15  Na so David nanga a heri pipel fu Israel tyari a santa kisi+ fu Yehovah gowe. Den ben e bari fu prisiri+ èn den ben e bro tutu.+ 16  Di a santa kisi fu Yehovah doro na ini a Foto fu David, dan Saul umapikin Mikal+ ben de na a sodro fu na oso. A ben tanapu na a fensre e luku go na gron. Dan a si fa Kownu David e dyompodyompo, e dansi èn e drai lontu na fesi Yehovah. Ne Mikal bigin wisiwasi+ David na ini en ati.+ 17  Na so den tyari a santa kisi fu Yehovah kon na ini a foto èn den poti en na wan spesrutu presi na ini a tenti di David ben meki gi a santa kisi.+ Baka dati David tyari bron-ofrandi+ nanga freide-ofrandi+ gi Yehovah. 18  Di David kaba tyari den bron-ofrandi nanga den freide-ofrandi, a blesi+ a pipel na ini a nen fu Yehovah+ di e tiri den legre. 19  Dan a gi ala sma, iya, a heri pipel+ fu Israel, ibri man nanga uma wan lingakuku, wan dadel-kuku,+ nanga wan korentikuku. Ne ala den sma go na oso. 20  Di David go na oso fu blesi en eigi osofamiri,+ Saul umapikin Mikal+ kon na doro fu miti en. Ne Mikal taki: „Luku, tide a kownu fu Israel kisi glori fu tru!+ Neleki wan lawman di puru ala krosi na en skin, na so Kownu puru en krosi na fesi den umasrafu fu den futuboi fu en.”+ 21  David taigi Mikal: „Na gi Yehovah mi ben e meki prisiri. Yehovah poti mi leki fesiman+ fu tiri en pipel Israel, na presi fu poti yu papa noso iniwan tra famiri fu en. Mi musu fu meki prisiri gi Yehovah.+ 22  We, mi o meki taki sma wisiwasi mi moro+ èn mi o lagi misrefi moro, bika den srefi umasrafu di yu ben taki fu den, na den o gi mi glori.”+ 23  Fu dati ede Saul umapikin Mikal+ no kisi nowan pikin teleki a dede.

Futuwortu