Go na content

Go na table of contents

Yehovah Kotoigi

Tongo Sranantongo

2 Petrus 2:1-22

2  Ma neleki fa falsi profeiti ben kon de tu na mindri a pipel Israel, na so falsi leriman o de tu na un mindri.+ Sondro fu unu sabi, den sma disi o kon nanga falsi leri di o pori a bribi fu unu. Den o sori srefi taki den no wani sabi a sma di bai den.+ Na so fasi den srefi o meki taki heri esi den lasi den libi.  Boiti dati, furu sma o teki na eksempre+ fu den èn den o du ogri sondro fu syen.+ A bakapisi o de taki sma o taki ogri fu a tru leri.+  Gridi o meki tu taki den taki lei fu kori unu soso fu man kisi wini gi densrefi.+ Ma sensi owruten+ Gado ben taki sortu strafu den o kisi èn a strafu dati de na pasi e kon. Iya, a no abi misi taki den o kisi pori.+  Gado no libi den engel+ di ben sondu, sondro fu strafu den, ma a trowe den go na ini Tartarus.*+ A poti den na ini peti pe deki dungru de. Na drape den o tan teleki a krutu den.+  Boiti dati, a no ben libi den sma fu a ten fu Noa sondro fu strafu den. Ma di a tyari wan bigi frudu+ kon na tapu wan ogri grontapu,+ a kibri Noa di ben de wan preikiman fu retidu.+ A kibri en makandra nanga seibi tra sma.+  A meki den foto Sodom nanga Gomora tron asisi tu. Na so a strafu den+ èn a meki den tron wan eksempre gi den ogri sma fu sori den san o pasa nanga den te fu kaba.+  A frulusu a reti-ati man Lot+ di ben abi furu broko-ede, fu di den sma di ben e trangayesi a wèt, ben e du ogri sondro fu syen.+  Den ogri di a reti-ati man dati ben e si èn ben e yere di a ben e libi na den mindri, ben e pina en ibri dei.  Sobun, te tesi miti den sma di e dini Gado fayafaya, dan Yehovah sabi fa fu frulusu den,+ ma a sabi tu fa fu libi ogri sma gi a krutudei te a o kiri den.+ 10  A o du dati spesrutu nanga den wan di e suku fu abi seks nanga trawan fu doti den skin+ èn di no abi lespeki gi den wan di e tiri den.+ Fu di den sma disi no abi bisi nanga trawan èn den e du nomo san den wani, meki den no e frede fu taki ogri fu den wan di kisi glori.+ 11  Toku den engel di tranga moro den sma disi èn di abi makti moro den, no e kosi den,+ fu di den abi lespeki gi Yehovah.+ 12  Ma den man disi e taki ogri fu sani di den no sabi.+ Den e tyari densrefi leki meti di no man denki èn di meki fu sma fanga den èn kiri den. Den ogri di den e du, o meki taki den o kisi pori. 13  Iya, den o pina fu den ogri di densrefi du.+ A wan-enkri sani di den wani na fu kowru den lostu fu den, srefi na deiten.+ Na dati e gi den prisiri. Te den de na wan fesa makandra nanga unu, den de nomonomo fu kori trawan nanga den falsi leri fu den. Na so den de leki flaka èn leki takru marki gi unu.+ 14  Den e suku fasi nomo fu du sutadu*+ èn den no man tapu fu du sondu.+ Den e kori den sma di swaki. Soso gridi de na ini den ati.+ Na dati den leri densrefi. Den na frufruktu pikin.+ 15  Fu di den gowe libi a reti pasi, meki sma kori den. Den waka a pasi fu Bileam,+ a manpikin fu Beor, di ben angri fu kisi pai gi na ogri di a ben o du.+ 16  Ma a kisi piri-ai fu di a no ben e du san bun.+ Buriki no gwenti taki. Toku na wan buriki ben taki nanga a profeiti nanga wan libisma sten+ fu pruberi fu tapu en fu du a don di a ben wani du.+ 17  Den sma disi de leki peti sondro watra+ èn den de leki wolku di wan tranga winti e wai gowe. A moro bigi dungru e wakti den,+ 18  bika den e taki wan lo kefalek sani, ma den sani dati no wani taki noti. Fu di den abi tranga lostu+ èn den e du ogri sondro fu syen, meki den e kori+ den sma di no so langa ete lowe komoto+ na mindri den wan di e du ogri. 19  Den e pramisi den sma disi taki den o kon fri,+ ma densrefi na srafu fu sondu,+ bika iniwan sma di e meki wan trawan basi en, na wan srafu fu a sma dati.+ 20  Fu tru, efu den finifini tori di den kon sabi fu a Masra nanga Frulusuman Yesus Krestes, yepi den fu lowe komoto na ini a morsu libi fu grontapu,+ ma baka dati den e fadon go baka na ini den trapu fu den srefi sani dati, so taki den sani dati e basi den,+ dan a fasi fa den de now, moro ogri leki fa den ben de fosi,+ 21  bika a ben o moro betre gi den efu den no ben kon sabi fa fu libi bun.+ Iya, a ben o moro betre efu den no ben kisi den santa komando, leki fu sabi den èn baka dati drai baka gi den.+ 22  A sani di pasa nanga den, de soifri leki fa na odo e taki: „A dagu+ drai go baka fu nyan en eigi brâk èn na agu di ben wasi kaba, go lolo baka na ini a tokotoko.”+

Futuwortu

Luku „Moro sani”, nr. 24.
Noso: „Den ai fu den furu nanga sutadu.”