Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

2 Korentesma 7:1-16

7  Fu dati ede, lobiwan, fu di wi abi den pramisi disi,+ dan meki wi krin+ wisrefi fu ibri sani di kan doti wi skin nanga wi denki,+ èn meki a lespeki di wi abi gi Gado meki taki wi kon santa dorodoro.+  Gi wi wan presi na ini un ati.+ Wi no du nowan sma ogri, wi no pori nowan sma libi èn wi no bedrigi nowan sma fu kisi wini gi wisrefi.+  Mi no e taki disi fu krutu unu. Bika mi ben taki kaba taki unu de na ini wi ati. Sobun, unu de nanga wi awansi wi de na libi, noso awansi wi dede.+  Mi man taki fri nanga unu. Mi e meki bigi srefisrefi fu unu.+ Mi feni furu trowstu+ èn mi e prisiri srefisrefi aladi furu pina e miti wi.+  Fu taki en leti, di wi doro na Masedonia,+ a ben hebi gi wi+ fu di wi ben e kisi kwinsi+ na ala fasi. Iya, feti ben de na dorosei fu a gemeente èn frede ben de na inisei.  Ma Gado di e trowstu+ den sma di e firi brokosaka, trowstu wi nanga yepi fu Titus di de dya.  Wi no kisi trowstu soso fu di a de dya, ma wi kisi trowstu tu fu di ensrefi ben kisi trowstu fu unu ede. A fruteri+ wi fa unu e angri fu si mi, fa unu e firi sari èn fa unu e broko un ede trutru nanga mi. A sani dati gi mi moro prisiri.  Fu dati ede, awinsi a brifi fu mi meki unu firi sari,+ toku a no e hati mi taki mi skrifi en. (Mi si taki a brifi dati meki unu firi sari, ma a ben de fu wan syatu pisi ten nomo.) Ma srefi efu a ben hati mi na a bigin,  toku mi breiti now. Mi no breiti fu di unu firi sari, ma fu di a sari fu unu meki taki unu kisi berow.+ Ma Gado feni en bun taki unu sari na so wan fasi,+ so taki unu no lasi fu wi ede. 10  Bika te wan sma e firi sari na a fasi di Gado feni bun, dan a sma o kisi berow èn disi o tyari frulusu kon gi en. A sani disi no o hati en srefisrefi.+ Ma a fasi fa grontapusma e sari, e tyari dede kon.+ 11  Luku omeni muiti unu du fu di unu sari na wan fasi di Gado feni bun:+ Unu meki unsrefi kon krin, unu ati bron fu na ogri di pasa, unu e lespeki Gado, unu ben angri fu lusu a problema èn unu ben de fayafaya fu du dati. Iya, unu poti sani kon reti baka!+ Na ala fasi unu sori taki unu du sani bun na ini na afersi disi. 12  Di mi skrifi unu, mi no du dati fu a sma ede di ben du na ogri,+ noso fu a sma ede di a trawan du ogri. Ma mi skrifi unu, so taki unu kan sori na fesi Gado omeni muiti unu du fu gi yesi na san wi taki. 13  Na dati meki wi kisi trowstu. Ma boiti a trowstu, wi kisi moro prisiri, fu di Titus ben breiti di un alamala gi en krakti baka.+ 14  Di mi ben meki bigi gi unu, unu no meki mi fesi fadon. Ala sani di wi taigi unu de tru, èn a no fu soso wi meki bigi+ gi unu na Titus. 15  Boiti dati, a kon lobi unu moro, fu di a e prakseri fa un alamala gi yesi,+ fa unu gi en wan switikon èn fa unu abi bigi lespeki gi en. 16  Mi breiti bika ala den sani di unu e du, e gi mi deki-ati.+

Futuwortu