Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

1 Timoteyus 5:1-25

5  No taki grofu nanga wan man di owru kaba.+ Ma gi en rai na wan lespeki fasi neleki na yu eigi papa. Gi yongu man rai neleki na yu eigi brada.  Gi den owru uma+ rai na wan lespeki fasi neleki na yu eigi mama èn yongu uma neleki na yu eigi sisa.+ Du dati nanga wan krin ati.  Lespeki èn sorgu den uma di den masra dede kaba èn di de na nowtu trutru.+  Ma efu so wan uma abi pikin noso granpikin, dan meki den pikin disi leri fosi fu sori na ini den eigi osofamiri+ taki den e dini Gado fayafaya. Meki den leri fu gi den papa nanga mama+ èn den granpapa nanga granmama san den abi reti na tapu, bika na dati Gado feni bun.+  We, na uma di en masra dede kaba èn di no abi nowan sma fu yepi en èn di kon pôti,+ e frutrow tapu Gado+ èn a e tan begi fayafaya dei nanga neti.+  Ma efu a e libi soso fu meki prisiri,+ dan a dede+ aladi a de na libi.  Fu dati ede, tan gi sma den komando disi,+ so taki den kan de sma di trawan no man feni fowtu+ na den tapu.  Fu tru, efu wan sma no e sorgu gi den sma fu en,+ spesrutu den sma fu en osofamiri,+ dan a drai en baka+ gi a bribi+ èn a takru moro wan sma di no abi bribi.  Efu wan uma masra dede kaba, dan den kan skrifi en nen, so taki a kan kisi yepi. Skrifi en nen efu a pasa siksitenti yari, efu a de a wefi fu wán masra,+ 10  efu sma sabi en leki wan uma di gwenti du bun,+ efu a kweki pikin na wan bun fasi,+ efu a ben gwenti teki sma na ini oso,+ efu a ben gwenti wasi den futu* fu den santa sma,+ efu a ben e yepi sma di ben de na nowtu,+ noso efu a ben e du furu muiti fu du ala sortu bun sani.+ 11  Na a tra sei, no skrifi a nen fu yongu uma di masra dede kaba èn di wani trow. Te den seks firi fu den e tapu den fu du a wroko fu Krestes,+ 12  den o kisi krutu, fu di den no e du moro san den ben pramisi fu du.+ 13  Boiti dati, den e tron sma di no abi noti e du èn den e go fu a wan oso na a trawan. Ma boiti taki den no abi noti e du, den e tron konkruman tu èn den e bumui nanga tra sma tori,+ fu di den e taki sani di den no musu taki. 14  Fu dati ede mi wani taki yongu uma di masra dede kaba, musu trow,+ den musu kisi pikin+ èn den musu sorgu gi wan osofamiri. Den no musu gi feanti na okasi fu taki ogri fu wi.+ 15  Fu taki en leti, wan tu fu den uma disi komoto na a bun pasi fu go waka na Satan baka. 16  Efu wan uma di de na bribi abi umasma na ini en famiri di masra dede kaba, dan meki a yepi den,+ so taki den no tron wan hebi gi a gemeente. Dan a gemeente kan yepi den wan di de na nowtu trutru.+ 17  Meki sma gi moro lespeki+ na den owru man di e teki fesi+ na wan bun fasi, spesrutu den wan di e wroko tranga fu taki fu a wortu fu Gado èn fu leri sma a wortu dati,+ 18  bika Gado Buku e taki: „Yu no musu tai a mofo fu wan mankaw te a e masi aleisi.”+ Gado Buku e taki tu: „A wrokoman warti fu kisi pai gi a wroko fu en.”+ 19  No bribi den ogri di wan sma taki fu wan owru man, boiti te tu, noso dri kotoigi+ e taki dati den sani dati tru. 20  Leti na fesi ala sma yu musu piri-ai+ gi den wan di abi a gwenti fu du sondu,+ so taki a kan de wan warskow gi den trawan.+ 21  Na wan seryusu fasi mi e taigi yu na fesi Gado èn na fesi Krestes Yesus+ nanga den engel di Gado poti fu du spesrutu wroko, taki yu musu gi yesi na den rai disi. Du dati sondro fu teki bosroiti bifo yu kon sabi a fini fu wan tori èn sondro fu teki sma sei.+ 22  Noiti yu musu gaw fu poti yu anu+ na tapu wan man fu poti en na wroko.+ No teki prati tu na den sondu fu tra sma.+ Tan libi wan krin libi.+ 23  No dringi watra nomo, ma dringi pikinso win+ gi yu bere èn gi a siki di yu e siki ala yuru. 24  Den sondu fu son sma de krin fu si+ èn wantewante den e kisi a strafu fu den, ma den sondu fu tra sma e kon na krin bakaten.+ 25  Na so a de tu taki den bun sani di sma e du de krin fu si,+ ma srefi te den no de krin fu si, sma no o man tan kibri den.+

Futuwortu

Te wan sma ben e wasi den futu fu wan fisitiman na ini Bijbel ten, dan a ben e sori switifasi èn a ben e du bun gi en.