Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

1 Samuel 8:1-22

8  Di Samuel kon owru, a poti+ den manpikin fu en leki krutuman na ini Israel.  A fosi manpikin fu en ben nen Yoèl+ èn a di fu tu ben nen Abia.+ Den ben e koti krutu gi den sma na Berseiba.  Den manpikin fu Samuel no ben de leki den papa.+ Den ben gwenti bedrigi sma fu kisi wini gi densrefi,+ den ben e teki tyuku+ èn den ben e krutu sani na wan kruktu fasi.+  Baka wan pisi ten, ala den owru man fu Israel+ kon makandra, dan den go na Samuel na Rama.  Den taki: „Luku, yu kon owru kaba èn den manpikin fu yu no de leki fa yu de. Dati meki mi e begi yu, poti wan kownu gi wi,+ neleki fa ala den tra pipel abi den eigi kownu, dan en o koti krutu gi wi.”  Ma Samuel no ben feni en bun di den taki: „Poti wan kownu fu koti krutu gi wi.” Dati meki Samuel begi Yehovah.+  Ne Yehovah taigi Samuel:+ „Du ala san a pipel e taigi yu fu du,+ bika a no yu den no wani moro, ma na mi den no wani leki kownu+ fu den.  Den sani di den e du nanga yu, na den srefi sani di den e du nanga mi sensi a ten di den komoto na Egepte+ teleki a dei fu tide. Te now ete den abi a gwenti fu gowe libi mi+ fu go dini tra gado.+  Sobun, du san den e taki. Ma yu musu warskow den san o pasa. Taigi den krin san na den reti fu a kownu di o tiri den.”+ 10  Sobun, Samuel go taki nanga a pipel di ben wani a poti wan kownu gi den. A fruteri den ala den sani di Yehovah taigi en. 11  A taki: „Disi na den reti+ fu a kownu di o tiri unu: a o teki un manpikin+ poti na ini den asiwagi fu en,+ a o meki den rèi asi+ gi en èn sonwan fu den o abi fu lon na fesi den asiwagi+ fu en. 12  A o meki un manpikin tron edeman fu dusun sma,+ èn edeman fu feifitenti sma.+ A o meki sonwan fu den plugu+ gron gi en èn a o meki den koti nyanyan+ na den difrenti gron fu en. Boiti dati, den o abi fu meki fetisani+ nanga asiwagi+ gi en. 13  A o poti un umapikin fu meki difrenti sortu salfu. A o meki den bori gi en èn den o abi fu baka sani gi en.+ 14  A o teki den moro bun gron pe unu e prani droifi,+ olèif,+ nanga tra sani èn a o gi dati na den futuboi fu en. 15  A o teki wan di fu tin pisi fu den sani di unu prani na den droifidyari èn na den tra gron fu unu,+ dan a o gi dati na den heihei man+ nanga den futuboi fu en. 16  A o teki den man nanga den uma di e wroko leki futuboi gi unu, a o teki den moro bun kaw fu unu èn a o teki den buriki fu unu. Dan a o meki den du a wroko fu en.+ 17  A o teki wán fu ibri tin skapu nanga krabita+ fu unu èn un alamala o tron futuboi fu en. 18  Wan ten o kon taki unu o bari, fu di un kownu e du den sani disi nanga unu.+ Ma na unu srefi ben wani wan kownu. Sobun, Yehovah no o arki unu na a ten dati.”+ 19  Toku a pipel no ben wani arki Samuel.+ Den taki: „Wi no wani yere noti fu dati. Na wan kownu musu tiri wi. 20  Wi musu kon de neleki ala den tra pipel.+ A kownu fu wi musu koti krutu gi wi èn na en musu hari go na wi fesi te wi musu go feti.” 21  Sobun, Samuel arki ala san a pipel taigi en, dan a go fruteri Yehovah.+ 22  Ne Yehovah taigi Samuel: „Du san den e taigi yu èn poti wan kownu fu tiri den.”+ Dati meki Samuel taigi den owru man fu Israel: „Ibriwan fu unu kan drai go baka na en foto.”

Futuwortu