Go na content

Go na table of contents

Yehovah Kotoigi

Tongo Sranantongo

1 Samuel 21:1-15

21  Bakaten, David go na Priester Akimeilek na ini a foto Nob.+ Di Akimeilek+ si David, a bigin beifi. A aksi David: „Fu san ede yu de dyaso yu wawan? Fu san ede tra sma no de nanga yu?”+  Ne David piki Priester Akimeilek: „Kownu srefi aksi mi fu go du wan sani gi en.+ A taigi mi: ’No fruteri nowan sma san mi e seni yu go du èn no taigi den san mi taigi yu.’ Mi meki mofo nanga den yonkuman fu miti mi na so-so-so wan presi.  Sobun, efu yu abi feifi brede, dan yu kan gi mi den. Noso kande yu abi wan tra sani fu gi mi.”+  Ma a priester taigi David: „Mi no abi tra brede, boiti a santa brede.+ Efu den yonkuman no didon nanga uma,+ dan den kan teki a brede disi.”  Dan David piki a priester: „Wi no didon nanga uma. Wi du soleki fa wi ben gwenti du te mi ben e go feti.+ Te den yonkuman disi e go feti, dan a skin fu den de santa. Sobun, now di den musu go du wan spesrutu wroko, a skin fu den de moro santa srefi.”  Ne a priester gi David a santa brede,+ fu di nowan tra brede ben de drape, boiti a brede di a ben tyari leki ofrandi gi Gado. A priester ben puru na owru brede kaba na fesi Yehovah+ èn a srefi dei dati a ben poti tra brede.  Ma a dei dati, wan fu den futuboi fu Saul ben de drape, fu di a ben abi fu tan na fesi+ Yehovah na ini a tabernakel. A man disi ben de wan Edomsma.+ A ben nen Dowek+ èn a ben de na edeman fu den skapuman fu Saul.+  David taigi Akimeilek: „Yu no abi wan fetisani fu gi mi, kande wan lansri noso wan feti-owru? Mi no tyari mi feti-owru noso den tra fetisani fu mi, bika mi ben musu hasti misrefi fu go du a sani di Kownu seni mi go du.”  Ne a priester taigi David: „A feti-owru fu a Filistea man Goliat+ di yu kiri na ini Ela-lagipresi,+ de dyaso. A domru na ini wan dyakti èn a de na baka a fesikoki+ fu den priester. Efu yu wani en, dan yu kan teki en, bika na a feti-owru dati nomo mi abi.” David taki: „Nowan tra feti-owru de leki a wan disi. Gi mi en.” 10  A dei dati, David lowe gowe moro fara,+ fu di a ben frede Saul. Te fu kaba, a doro na Kownu Akes fu a foto Gat.+ 11  Ne den futuboi fu Akes taigi en: „A no a man disi na David? A no en na a kownu fu a kondre?+ Na gi a man disi sma ben e dansi+ èn singi:’Saul kiri dusundusun sma,Ma David kiri someni tenti dusun sma.’”+ 12  Di David yere san den man taki, a kon frede+ Kownu Akes fu Gat srefisrefi. 13  Dati meki a bigin du leki+ en edesei no e wroko bun, fu di a ben wani meki den prakseri taki a law.+ A ben e meki pikin kroisi na tapu den doro fu a portu èn a ben e meki baba lon na en barba. 14  Te fu kaba Akes taigi den futuboi fu en: „Unu no e si taki a man law? Fu san ede unu tyari en kon gi mi? 15  Fu san ede meki unu tyari a lawman disi kon gi mi, leki na lawman mi abi fanowdu? San a man disi kon du na ini mi oso?”

Futuwortu