Go na content

Go na table of contents

Yehovah Kotoigi

Tongo Sranantongo

1 Kownu 16:1-34

16  Now Yehovah seni Yehu,+ a manpikin fu Hanani,+ fu go taigi Bayesa:  „Yu no ben de noti.+ Toku mi meki yu tiri mi pipel Israel.+ Ma yu sondu neleki Yerobeyam+ èn na so yu meki taki mi pipel Israel go du sondu+ tu, so taki mi ati bron nanga den.  Dati meki Bayesa, mi o puru yu nanga a heri famiri fu yu na pasi, teleki nowan fu unu tan abra. A srefi sani di mi du nanga Nebat en manpikin Yerobeyam èn nanga a famiri fu en, na dati mi o du nanga yu èn nanga a famiri fu yu.+  Efu wan sma fu a famiri fu yu dede na ini a foto, dan den dagu o nyan en. Efu wan fu den dede na dorosei fu a foto, dan den fowru di e frei na loktu o nyan en.”+  Ala tra sani di abi fu du nanga Bayesa, den sani di a du èn a fasi fa a sori a makti fu en, skrifi na ini a buku+ di e taki fu den tori fu den kownu fu Israel.  Te fu kaba Bayesa go rostu neleki den afo fu en èn den beri en na Tirsa.+ Dan en manpikin Ela bigin tiri leki kownu.  Yehovah ben seni a profeiti Yehu, a manpikin fu Hanani, fu go taigi Bayesa nanga en famiri+ san ben o pasa nanga den. Yehu ben musu du disi, fu di Bayesa du furu ogri di meki taki Yehovah ati kon bron+ nanga en. Gado ben o meki den srefi sani di pasa nanga na osofamiri fu Yerobeyam, pasa nanga a famiri fu Bayesa tu. Boiti dati, a ben o strafu Bayesa sosrefi, fu di a ben kiri+ Nadab.  Na ini a di fu tutenti na siksi yari di Asa ben de kownu fu Yuda, Ela, a manpikin fu Bayesa, tron kownu fu Israel na a foto Tirsa. A tiri Israel tu yari langa.  Wan dei Ela ben de na Tirsa. A ben e dringi sopi+ te fu drungu na ini na oso fu Arsa. A man disi ben abi a frantwortu fu sorgu taki sani waka bun na ini na oso+ fu Kownu na Tirsa. Disiten Ela en futuboi Simri,+ di ben de edeman fu afu fu den sma di ben e rèi asiwagi, span anu makandra nanga tra sma fu kiri Ela. 10  Ne Simri go na ini na oso fu Arsa, dan a kiri Ela.+ A ben de na ini a di fu tutenti na seibi yari di Asa ben e tiri leki kownu fu Yuda. Baka Ela, Simri bigin tiri leki kownu. 11  Di Simri bigin tiri leki kownu, dan wantewante a kiri a heri famiri fu Bayesa. Simri no meki nowan mansma na ini Bayesa famiri tan na libi,+ nowan famiriman di ben abi a reti fu kiri+ a sma di kiri Bayesa èn nowan mati fu Bayesa. 12  Na so Simri kiri a heri famiri fu Bayesa.+ A pasa soleki fa Yehovah+ ben meki a profeiti Yehu taigi Bayesa,+ 13  fu di Bayesa nanga en manpikin Ela+ du furu sondu. Yehovah, a Gado fu Israel, ati ben kon bron nanga Israel, fu di den du den sondu di Bayesa nanga Ela du èn den go dini falsi gado+ di no man du noti. 14  Ala tra sani di abi fu du nanga Ela èn ala sani di a du, skrifi na ini a buku+ di e taki fu den tori fu den kownu fu Israel. 15  Na ini a di fu tutenti na seibi yari di Asa ben de kownu fu Yuda, Simri tron kownu fu Israel. Simri ben e tan na Tirsa èn a tiri seibi dei+ nomo. Na a ten dati den srudati fu Israel ben seti kampu na Gibeton,+ wan foto fu den Filisteasma. 16  Baka wan pisi ten den srudati na ini a kampu, kisi fu yere taki Simri span anu makandra nanga tra sma fu kiri Kownu Ela èn na dati a du tu. Dati meki ala den srudati fu Israel di ben de na ini a kampu, poti a legre-edeman Omri+ leki kownu fu Israel a dei dati. 17  Ne Omri nanga ala den srudati fu Israel komoto fu Gibeton. Den go na Tirsa èn den lontu+ a foto disi. 18  Di Simri si taki den teki a foto abra, a lowe go na ini a toren fu Kownu oso. Ne a sutu faya gi na oso, di a ben de na ini na oso ete. Na so Simri dede,+ 19  fu di a ben du furu sondu. A tan du sani di Yehovah no feni bun.+ Den srefi sani di Yerobeyam du, na dati a du tu. Na den sondu fu Simri, meki taki Israel go du sondu tu.+ 20  Ala tra sani di abi fu du nanga Simri èn a fasi fa a span anu makandra nanga tra sma fu kiri Kownu Ela, skrifi na ini a buku+ di e taki fu den tori fu den kownu fu Israel. 21  Bakaten a pipel fu Israel prati na ini tu grupu.+ Wán grupu teki a sei fu Tibni, a manpikin fu Ginat, fu poti en leki kownu. A tra grupu teki a sei fu Omri. 22  Te fu kaba den sma di ben e horibaka gi Omri, wini den sma di ben e horibaka gi Tibni, a manpikin fu Ginat. Na so Tibni kon dede èn Omri bigin tiri leki kownu. 23  Na ini a di fu dritenti na wán yari di Asa ben de kownu fu Yuda, Omri tron kownu fu Israel. A tiri twarfu yari langa. Siksi fu den yari disi a tiri na Tirsa. 24  Baka dati Omri bai Samaria-bergi fu Seimer èn a pai Seimer siksitenti na aiti kilo nanga fo hondro gran solfru. Dan Omri bow wan foto na tapu a bergi èn a kari a foto dati Samaria.+ A puru a nen disi fu a nen fu Seimer, a man di ben abi a bergi fosi. 25  Omri ben e du sani di Yehovah no feni bun. A du moro bigi ogri leki den kownu di ben de fosi en.+ 26  Den srefi sani di Nebat en manpikin Yerobeyam+ du, na dati Omri du tu. Na den sondu fu Omri, meki taki Israel go du sondu tu èn taki den go dini falsi gado+ di no man du noti. Dati meki Yehovah, a Gado fu Israel, ati bron nanga den. 27  Ala tra sani di abi fu du nanga Omri, den sani di a du èn a fasi fa a sori a makti fu en, skrifi na ini a buku+ di e taki fu den tori fu den kownu fu Israel. 28  Te fu kaba Omri go rostu neleki den afo fu en èn den beri en na Samaria. Dan en manpikin Akab+ bigin tiri leki kownu. 29  Na ini a di fu dritenti na aiti yari di Asa ben de kownu fu Yuda, Akab, a manpikin fu Omri, tron kownu fu Israel. Akab ben e tan na Samaria+ èn a tiri Israel tutenti na tu yari langa. 30  Den Kownu di ben de fosi Akab, ben du sani di Yehovah no feni bun. Ma Akab du moro bigi ogri leki den.+ 31  Akab du den srefi sondu di Yerobeyam,+ a manpikin fu Nebat, du. Efu dati no ben ogri+ nofo, dan a trow+ nanga Iseibel,+ na umapikin fu Kownu Etbâal fu den Sidonsma.+ Na so Akab go dini Bâal+ èn a boigi gi en. 32  Boiti dati, a meki wan altari gi Bâal na Samaria, na ini a tempel+ fu Bâal. 33  Baka dati Akab meki wan santa postu.+ Den sani di a du, meki Yehovah, a Gado fu Israel, kisi bigi atibron.+ Te fu kaba a du moro ogri leki ala den kownu fu Israel di ben de fosi en. 34  Na a ten dati Hiyel, wan man fu Betel, bigin bow a foto Yerikow baka. Di a bigin seti a fondamenti fu a foto, en fosi pikin Abiram dede. Di a bigin meki den portu fu a foto, Seigub, a moro yongu pikin fu en dede. Disi ben pasa soleki fa Yehovah ben taigi Yosua, a manpikin fu Nun.+

Futuwortu