Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

1 Korentesma 9:1-27

9  Mi a no wan fri sma?+ Mi a no wan apostel?+ Mi no si wi Masra Yesus?+ Unu na a bakapisi fu a wroko di mi du gi Masra, a no so?  Awansi mi no de wan apostel gi tra sma, toku mi de wan apostel gi unu, bika unu de leki wan stampu di e sori+ taki mi na wan apostel fu Masra.  Disi na san mi e piki den sma di e krutu mi:+  Wi abi a reti fu nyan+ èn fu dringi, a no so?  A no tru taki wi abi a reti fu meki wi wefi di de na bribi, go nanga wi?+ Dati na san den tra apostel, den brada fu Masra+ nanga Seifas+ e du, a no so?  Noso a de so, taki mi nanga Barnabas+ wawan no abi a reti fu libi wi grontapuwroko?+  Sortu srudati e pai en eigi kostu? Suma e prani droifibon na ini en gron èn a no e nyan den froktu fu den?+ Noso, suma e kweki meti èn a no e dringi pikinso fu a merki fu den meti?+  Den sani disi di mi e taki, na libisma prakseri?+ A Wèt+ e taki den sani disi tu, a no so?  Bika na ini a wèt di Gado ben gi Moses skrifi: „Yu no musu tai a mofo fu wan mankaw te a e masi aleisi.”+ Na broko Gado e broko en ede nanga mankaw? 10  Noso na fu wi ede a e taki dati? Iya, na fu wi ede a sani dati ben skrifi,+ bika a sma di e drai a doti èn a sma di e masi aleisi musu du dati nanga a howpu taki den o kisi aleisi.+ 11  Efu wi sai sani di abi fu du nanga Gado,+ na un mindri, dan a de so wan bigi sani taki wi e kisi fu unu san wi abi fanowdu?+ 12  Efu tra sma abi a reti fu aksi unu den sani dati,+ dan wi no abi moro reti fu du dati? Toku wi no gebroiki a reti disi,+ ma wi e horidoro awinsi san e pasa, fu di wi no wani du nowan sani fu tapu sma fu yere a bun nyunsu+ fu Krestes. 13  Unu no sabi taki den man di e du santa wroko e nyan+ den sani fu a tempel, èn taki den wan di e wroko doronomo+ na a altari e nyan fu den sani fu na altari? 14  Na so Masra ben seti sani tu,+ taki den sma di e preiki a bun nyunsu musu libi fu den sani di den e kisi, fu di den e preiki a bun nyunsu.+ 15  Ma mi no gebroiki nowan fu den seti disi.+ Fu tru, mi no skrifi den sani disi fu meki unu go du sani gi mi. A moro betre mi dede. Nowan sma o tapu mi fu meki bigi!+ 16  We, efu mi e preiki a bun nyunsu,+ dan dati no wani taki dati mi musu meki bigi, bika mi de fruplekti+ fu preiki. Iya, helu+ fu mi efu mi no preiki a bun nyunsu! 17  Efu mi e du dati fu di misrefi wani,+ dan mi o kisi pai.+ Ma efu mi e du dati aladi mi no wani, toku a frantwortu+ de na mi tapu fu du a wroko. 18  San na a pai di mi o kisi dan? A pai di mi o kisi, na taki mi e preiki a bun nyunsu sondro fu aksi wan sani baka.+ Na so mi no sa gebroiki a reti di mi abi fu preiki a bun nyunsu, na wan fasi di no fiti. 19  Aladi mi no abi nowan plekti na nowan sma, toku mi meki misrefi tron a srafu+ fu ala sma, so taki mi kan yepi+ moro nanga moro sma fu tron bakaman fu Krestes. 20  Dati meki gi den Dyu, mi kon de leki wan Dyu,+ so taki mi kan yepi den Dyu. Gi den sma di e gi yesi na a Wèt, mi kon de leki wan sma di e gi yesi na a Wèt,+ aladi misrefi no abi fu gi yesi na a Wèt.+ Na so mi kan yepi den sma di e gi yesi na a Wèt. 21  Gi den sma di no abi wèt,+ mi kon de leki wan sma di no abi wèt,+ aladi mi no e libi sondro a wèt fu Gado èn mi e gi yesi na a wèt+ fu Krestes.+ Na so mi kan yepi den sma di no abi wèt. 22  Gi den swakiwan, mi kon de leki wan sma di swaki, so taki mi kan yepi den swakiwan.+ Mi tron ala sani gi ala sortu sma,+ iya, mi du ala san de fanowdu fu frulusu sma, awinsi na wan tu nomo. 23  Ma mi e du ala sani fu a bun nyunsu ede, so taki mi kan prati+ en nanga trawan. 24  Unu no sabi taki ala den sma di e teki prati na wan streilon e lon,+ ma na wán nomo e wini?+ Lon+ na so wan fasi taki unu kan wini.+ 25  Boiti dati, ibri sma di e teki prati na wan strei e dwengi ensrefi+ na ini ala sani. A no de fu taki dati den e du dati fu kisi wan kroon di e pori,+ ma wi e du dati fu kisi wan di no e pori.+ 26  Fu dati ede, mi no e lon+ bruyabruya. Mi e naki kofu na so wan fasi taki mi no e naki winti.+ 27  Ma mi e naki mi skin+ nanga kofu èn mi e basi en neleki a de wan srafu, so taki a no sa de so, taki na wan noso tra fasi, baka te mi preiki gi tra sma, Gado no feni mi bun+ moro.

Futuwortu