Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

1 Korentesma 6:1-20

6  Kon meki wi taki dati wan fu unu abi wan kesekese+ nanga wan trawan. A sma dati ben o abi a deki-ati fu tyari a trawan go na fesi sma di no de na bribi fu krutu a tori,+ na presi fu tyari en go na fesi den santawan?+  Unu no sabi taki na den santawan o krutu+ grontapu?+ We, efu na unu o krutu grontapu, dan fu san ede unu no man krutu pikinpikin afersi?+  Unu no sabi taki wi o krutu den engel?+ We, dan wi musu man krutu den afersi fu a libi disi tu, a no so?  Efu unu musu krutu den afersi fu a libi disi,+ dan fu san ede unu e meki sma di a gemeente no feni bun, tron un krutuman?+  Mi e taki disi fu meki unu firi syen.+ Nowan koni man+ no de na un mindri di man krutu afersi gi en brada?  Toku a wan brada e tyari a trawan go na fesi krutu, so taki sma di no de na bribi kan koti krutu gi den!+  Fu tru, efu unu e tyari makandra go na fesi krutu,+ dan unu o kisi syen. Fu san ede unu no e libi a trawan fu du kruktu sani nanga unu?+ Fu san ede unu no e libi a trawan fu bedrigi unu?+  Na presi fu dati, na unu e du trawan ogri èn na unu e bedrigi trawan, èn unu e du dati nanga un brada srefi.+  Unu no sabi taki ogri sma no o kisi a Kownukondre fu Gado?+ No kori unsrefi. Sma di e huru,+ sma di e anbegi falsi gado,+ sma di e du sutadu,+ mansma di e poti densrefi fu tra mansma abi seks nanga den,+ mansma di e didon nanga tra mansma,+ 10  fufuruman, gridiman,+ drunguman,+ sma di e kosi trawan, nanga sma di e puru sani na tra sma anu nanga tranga no o kisi a Kownukondre fu Gado.+ 11  Toku sonwan fu unu ben de den sortu sma dati.+ Ma Gado wasi unu kon krin,+ a meki unu kon santa+ èn a e si unu leki reti-ati sma+ na ini a nen fu wi Masra Yesus Krestes+ èn nanga a yeye fu Gado.+ 12  Mi kan du ala sani, ma a no ala sani bun fu du.+ Mi kan du ala sani,+ ma mi no o meki nowan sani basi mi.+ 13  Nyanyan de fu a bere èn a bere de fu a nyanyan,+ ma Gado o meki ala tu kon tron noti.+ A skin a no fu du hurudu, ma na fu du Masra wroko,+ èn Masra e sorgu a skin.+ 14  Gado ben gi Masra wan opobaka+ èn a sa gi wi wan opobaka+ tu nanga yepi fu a krakti fu en.+ 15  Unu no sabi taki un skin na wan pisi fu a skin+ fu Krestes?+ We, mi sa puru den pisi fu Krestes skin fu meki den tron pisi fu a skin fu wan huru-uma?+ Kwetikweti! 16  Unu no sabi taki a sma di e du hurudu nanga wan huru-uma, de wán skin nanga en? Bika „den tu sma dati o de wán skin”,+ na so Gado taki. 17  Ma a sma di de wán nanga Masra,+ abi a srefi denki leki en.+ 18  Lowe gi hurudu.+ Ibri tra sondu di wan sma kan du, a no wan sondu teige en skin. Ma a sma di e du hurudu, e sondu teige en eigi skin.+ 19  Unu no sabi taki a skin fu unu na a tempel+ fu a santa yeye di de na ini unu+ èn di unu kisi fu Gado? Boiti dati, unu no de fu unsrefi,+ 20  bika Gado pai gi unu di a bai unu.+ Dati meki un musu gi Gado glori+ nanga un skin.+

Futuwortu