Go na content

Go na a tra menu

Go na table of contents

Yehovah Kotoigi

Sranantongo

Bijbel tapu Internet | BIJBEL—NYUN-GRONTAPUVERTALING

1 Korentesma 1:1-31

1  Disi na wan brifi fu Paulus di kisi wan kari fu de wan apostel+ fu Yesus Krestes fu di Gado wani.+ Wi brada Sostenes+ de nanga mi tu.  Wi e seni a brifi disi gi unu na ini a gemeente fu Gado na Korente.+ Gado meki unu kon santa+ èn unu de wán nanga Krestes Yesus. Gado kari unu fu de santa sma+ makandra nanga ala den sma di e kari a nen+ fu wi Masra Yesus Krestes na ala presi, fu di en na a Masra fu den èn fu wi:+  Meki Gado, wi Tata èn Masra Yesus Krestes sori unu bun-ati,+ èn meki den sorgu taki sani waka bun gi unu.+  Ala ten mi e taki Gado tangi gi unu, fu di a sori unu furu bun-ati+ nanga yepi fu Krestes Yesus.+  Bika unu kon gudu na ala fasi,+ fu di unu de wán nanga en. Iya, unu sabi heri bun fa fu taki èn unu abi furu sabi,+  fu di a nyunsu fu Krestes+ meki unu kon tranga.  Dati meki unu no e mankeri nowan sani+ aladi unu e wakti fayafaya o ten wi Masra Yesus Krestes o sori ensrefi.+  Boiti dati, Gado sa meki unu tanapu kánkan+ te na a kaba, so taki nowan sma o man taki takru fu unu+ na a dei+ fu wi Masra Yesus Krestes.+  Ala ten Gado e du san a e taki,+ èn na en kari unu so taki unu kan tron wán+ nanga en Manpikin Yesus Krestes, wi Masra. 10  Brada, na ini a nen+ fu wi Masra Yesus Krestes mi e gi unu deki-ati+ fu de wán na ini a fasi fa unu e taki.+ No meki pratifasi+ de na un mindri. Un musu de wán na ini a fasi fa unu e denki èn e prakseri.+ 11  Mi brada, son sma na ini na oso fu Klowe fruteri+ mi taki trobi de na un mindri. 12  San mi wani taki, na taki ibriwan fu unu e taki wan tra sani. Sonwan e taki: „Mi na fu Paulus”, noso „mi na fu Apolos”.+ Trawan e taki: „Mi na fu Seifas”, noso „mi na fu Krestes.” 13  Dati wani taki dati a gemeente fu Krestes prati.+ Na Paulus ben dede na wan postu gi unu? Noso a de so, taki unu ben teki dopu+ na ini a nen fu Paulus? 14  Mi e taki Gado tangi taki mi no dopu nowan fu unu, boiti Krespus+ nanga Gayus,+ 15  so taki nowan fu unu kan taki dati unu dopu na ini mi nen. 16  Iya, mi dopu na osofamiri fu Stefanas+ tu. Mi no sabi efu mi dopu ete wan tra sma. 17  Krestes no seni mi+ fu dopu sma, ma fu fruteri a bun nyunsu. Mi no musu du dati nanga wortu fu koniman,+ bika dati sa meki taki Krestes dede na wan pinapostu fu soso. 18  Bika a tori fu a pinapostu na wan don sani+ gi den sma di o dede.+ Ma gi wi di o kisi frulusu,+ a de wan sani di e sori a krakti fu Gado.+ 19  Bika Gado Buku taki: „Mi o meki a koni fu den koniman lasi gowe,+ èn mi no o poti prakseri na a koni fu den sabiman.”+ 20  Pe den koniman de? Pe den leriman fu Wèt de?+ Pe a sma de di lobi haritaki+ na ini a grontapu disi?+ Gado meki a koni fu grontapu kon tron wan don sani,+ a no so? 21  Grontapu nanga ala en koni+ no kon sabi Gado.+ Den e si den sani di wi e preiki leki don sani, ma fu di Gado koni, meki a gebroiki den don sani+ dati fu frulusu den wan di e bribi. 22  Bika den Dyu wani si spesrutu marki+ èn den Grikisma e suku koni.+ 23  Ma wi e preiki fu Krestes di sma spikri na wan postu.+ Disi na wan sani di e meki den Dyu fadon+ èn gi den sma di no de Dyu, a de wan don sani.+ 24  Ma gi den wan di Gado kari, awinsi na Dyu noso Grikisma, Krestes na a sma di e sori a krakti+ nanga a koni+ fu Gado. 25  Bika wan don sani fu Gado, koni moro libisma èn wan swaki sani fu Gado, tranga moro libisma.+ 26  Brada, unu srefi e si taki furu fu unu di Gado kari+ a no sma di libisma e si leki koniman.+ Furu fu unu a no sma di abi makti+ noso sma fu wan prenspari famiri. 27  Ma Gado teki den don sani fu grontapu+ fu meki den koni sma kisi syen. Gado teki den swaki sani fu grontapu fu meki den tranga sani kisi syen.+ 28  Gado teki den sani di no prenspari na ini grontapu nanga den sani di sma e si leki soso sani, sobun den sani di sma e si leki noti,+ fu meki den sani di prenspari, tron noti.+ 29  Na so nowan sma kan meki bigi+ na fesi Gado. 30  Tangi fu en meki unu de wán nanga Krestes Yesus. Nanga yepi fu Yesus wi kon sabi a koni+ fu Gado èn wi tron reti-ati sma.+ A meki wi kon santa+ èn a frulusu wi nanga yepi fu a lusu-paiman.+ 31  Dan a o de soleki fa Gado Buku taki: „Meki a sma di e meki bigi, du dati gi Yehovah.”+

Futuwortu