Go na content

Go na a tra menu

Yehovah Kotoigi

Sranantongo

YONGUSMA E AKSI

Mi kan hori kaba nanga wan sma?

Mi kan hori kaba nanga wan sma?
  • O ten wi kan taki dati wan sma e hori nanga wan trawan?

  • Fu san ede sma e hori nanga makandra?

  • Mi owru nofo fu hori nanga wan sma?

  • Fu san ede mi musu wakti?

O ten wi kan taki dati wan sma e hori nanga wan trawan?

  • Kande yu na wan boi di gwenti go koiri nanga a srefi meisje, noso yu na wan meisje di gwenti go koiri nanga a srefi boi. Na hori unu e hori nanga makandra?

  • Kande yu na wan boi di e firi gi wan meisje, noso yu na wan meisje di e firi gi wan boi. Omeni leisi wan dei yu e seni sms noso app gi en, noso unu e taki na telefon. Na hori unu e hori nanga makandra?

  • Ibri leisi te yu e go koiri nanga den mati fu yu, dan moro furu yu e taki nanga a srefi sma. Na hori unu e hori nanga makandra?

Kande a no ben muilek gi yu fu piki a fosi aksi. Ma kande yu ben e tweifri fu piki den tu tra aksi. O ten wi kan taki dati wan sma e hori nanga wan trawan?

Te wan boi nanga meisje gwenti du furu sani nanga makandra fu di wán fu den noso ala tu abi firi gi a trawan, dan yu kan taki dati den e hori nanga makandra.

Sobun, a piki tapu den dri aksi na iya. Awinsi na telefon unu e taki noso unu e miti makandra, awinsi tra sma de noso unu e du en kibrikibri, efu yu leki boi noso meisje sori taki unu abi firi gi makandra èn unu e taki furu nanga makandra, dan na hori unu e hori nanga makandra.

Fu san ede sma e hori nanga makandra?

A no somaar tu sma musu hori nanga makandra. Te wan yongu man nanga wan yongu uma e hori nanga makandra, dan den musu du dati fu kon sabi efu den wani trow nanga makandra.

A tru taki son yonguwan e si en leki wan gewoon sani fu hori nanga wan trawan. Kande na lobi den lobi de nanga wan meisje noso wan boi fu di den e si en leki en mati, aladi den no e prakseri fu trow nanga makandra. Son yonguwan e si sowan mati leki wan beiker di den wini, noso leki wan moimoi sani di den wani meki sma si, soso fu kisi a firi taki den de prenspari.

Ma furu tron den no e tan mati langa. Wan meisje di nen Heather e taki: „Furu yonguwan di e hori nanga makandra, e prati baka wán noso tu wiki. Den e si en leki wan sani di musu de gi wan syatu ten nomo. Ma eigenlijk a e sreka den nomo fu broko wan trow, na presi taki a e sreka den gi a trowlibi.”

Iya, te yu e hori nanga wan sma, dan disi abi fu du nanga den firi fu en. Dati meki yu musu sabi fu san ede yu e hori nanga wan sma èn yu musu abi wan bun reide.Lukas 6:31.

Efu yu e hori nanga wan sma, ma yu no e prakseri fu trow, dan yu de leki wan pikin di e prei nanga wan nyun preisani, ma bakaten a no wani en moro

Denki a sani disi: Yu ben o lobi te wan sma e prei nanga den firi fu yu? Fa yu ben o feni en efu a ben o si yu leki wan preisani fu wan pikin-nengre? A pikin-nengre e prei nanga en wan syatu ten nomo, ma baka ten a no e luku en srefisrefi moro. Efu yu no ben o lobi te wan sma du sowan sani nanga yu, dan yu no musu du en tu nanga wan tra sma! Bijbel e taki dati lobi „no e tyari ensrefi na wan fasi di no fiti”.1 Korentesma 13:4, 5.

Wan meisje di nen Chelsea e taki: „Son leisi mi e denki na misrefi taki a ben o leuk fu hori nanga wan sma. Ma a no leuk srefisrefi te a wan sma e si en leki wan seryusu sani, ma a trawan no e du dati.”

San yu kan du: Efu yu wani hori nanga wan sma èn yu wani trow, dan leisi 2 Petrus 1:5-7 fosi. Luku sortuwan fu den fasi disi yu musu meki muiti fu abi. Baka wan mun, dan luku o furu yu kon sabi fu a fasi disi èn efu yu e sori a fasi dati kaba.

Mi owru nofo fu hori nanga wan sma?

  •  San yu denki? O owru wan yonguwan musu de fu bigin hori nanga wan sma?

  •  Baka dati, aksi yu papa noso mama a srefi sani disi.

A kan taki a piki fu yu nanga a piki fu yu papa nanga mama no o de a srefi. Of kande den de eens nanga yu! Kande yu na wan fu den furu yonguwan di teki a koni bosroiti fu bigin hori nanga wan sma te den owru nofo noso te den sabi den srefi moro bun.

Na dati Danielle di abi 17 yari bosroiti fu du. A e taki: „Tu yari pasa mi ben denki heri tra fasi fa mi ben wani taki mi trowpatna musu de. Ma now mi kon kenki. Èn srefi nownow mi no denki taki mi lepi nofo fu teki sowan bosroiti. Baka wan tu yari te mi sabi san mi wani, dan mi o luku baka efu mi wani bigin hori nanga wan sma.”

Ma ete wan reide de fu san ede a de wan koni sani fu wakti. Te Bijbel e taki dati wan sma „yongu tumusi”, dan disi wani taki dati den seksfiri nanga den lobifiri fu en tranga tumusi ete (1 Korentesma 7:36). Te yu leki boi noso meisje abi den firi disi èn yu gwenti taki furu nanga a srefi sma nomo, dan dati kan meki den firi fu yu kon moro tranga. A kan meki srefi taki unu go du wan sani di no bun.

A tru taki kande den tra yonguwan no e span nanga a sani dati srefisrefi. Furu fu den no kan wakti srefi fu abi seks. Ma yu kan sori taki yu koni moro den. Iya, yu musu sori taki yu koni moro den! (Romesma 12:2) Wi sabi taki Bijbel e gi yu deki-ati fu „lowe gi hurudu” (1 Korentesma 6:18). Te yu e wakti teleki yu pasa den yongu yari fu yu, dan yu kan „wai pasi gi ogri”.Preikiman 11:10.

Fu san ede mi musu wakti?

Te sma e dwengi yu fu bigin hori nanga wan trawan aladi yu no kaba gi dati ete, dan a de neleki te sma ben o dwengi yu fu meki eksame, aladi yu no bigin leri den les fu yu ete. Yu kan frustan taki sani no ben o waka bun gi yu! Yu abi ten fanowdu fu leri a les so taki yu sabi fa yu kan piki den aksi fu na eksame.

Na so a de tu te yu wani hori nanga wan sma.

Fu hori nanga wan sma na wan seryusu sani. Sobun, fosi yu e bigin hori nanga wan sma, teki yu ten fu ondrosuku wan prenspari sani: Fa yu kan tron wan mati fu wan trawan?

Baka ten te yu miti a yoisti sma, yu o man de wan moro bun patna. No frigiti taki wan trowlibi o bun te den tu sma de bun mati fu makandra.

Te yu e wakti fosi yu bigin hori nanga wan sma, dan dati no o tapu yu fu du san yu wani. Juist a o gi yu moro ten fu ’prisiri te yu yongu ete’ (Preikiman 11:9). Yu o abi moro ten tu fu leri fa fu abi moro bun fasi. Ma a moro prenspari sani na taki yu o leri fu de wan moro bun mati fu Gado.Sari singi 3:27.

A tru taki yu musu wakti, ma a no wani taki dati yu leki boi no o man de mati nanga wan meisje, noso taki yu leki meisje no o man de mati nanga wan boi. San na a moro bun fasi fa yu kan du dati? Te unu de na makandra, sorgu taki tra boi nanga meisje de nanga unu èn sosrefi bigisma. Wan meisje di nen Tammy taki: „Mi feni taki mi e prisiri moro te tra sma de tu. A moro bun fu abi furu mati.” Na so Monica e denki tu. A e taki: „A de wan bun sani fu de nanga moro sma, fu di yu e leri sabi difrenti sma.”

Ma te yu e bigin poti prakseri yonguyongu kaba na a srefi sma nomo, dan a kans bigi taki yu o poti yusrefi na ini problema. Sobun, no lon go hori nanga wan sma. Gebroiki a ten disi fu leri sabi fa yu kan feni mati èn fa yu nanga den kan tan de bun mati. Baka ten, te yu bosroiti fu hori nanga wan sma, dan yu o sabi yusrefi moro bun èn yu o sabi fa yu wani taki yu trowpatna musu de.

 

Kon sabi moro

YONGUSMA E AKSI

A sma disi o de wan bun trowpatna?

Fa yu kan sabi fa yu mati de trutru?