Go na content

Go na a tra menu

Yehovah Kotoigi

Sranantongo

A prenspari fu de wan memre fu wan kerki?

A prenspari fu de wan memre fu wan kerki?

A piki fu Bijbel

Iya, fu di Gado wani taki sma kon makandra fu anbegi en. Bijbel e taki: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra.”​—Hebrewsma 10:24, 25.

Yesus ben taki dati den bakaman fu en ben o de wan grupu di orga. A taigi den: „Na a fasi disi ala sma o sabi taki unu na mi disipel, te unu lobi makandra” (Yohanes 13:35). Wan prenspari fasi fa den bakaman fu Kresten ben o sori a lobi disi, na taki den ben o kon makandra nanga tra futuboi fu Gado. Den ben o orga na ini gemeente di ben o abi a gwenti fu konmakandra fu anbegi Gado (1 Korentesma 16:19). Den ben de wan bigi grupu fu brada nanga sisa na heri grontapu.​—1 Petrus 2:17.

A no sari fu de na ini wan kerki nomo

Aladi Bijbel e sori taki sma ben musu kon makandra fu anbegi Gado, toku a no e taki dati wan sma kan plisi Gado soso fu di a de na ini wan kerki. Efu wan sma wani taki Gado feni en bun, dan a bribi fu en musu abi krakti tapu a heri libi fu en. Bijbel e taki fu eksempre: „A fasi fu anbegi di wi Gado nanga Tata e si leki wan sani di krin èn di de sondro flaka, na disi: fu sorgu gi pikin di no abi papa nanga mama moro èn gi uma di den masra dede kaba, te den sortu sma disi de na nowtu. Boiti dati, un no musu meki grontapu flaka unu.”​—Yakobus 1:27.