Skip to content

Skip to table of contents

Luku bunu ku taku mati a dee lasiti daka aki

Luku bunu ku taku mati a dee lasiti daka aki

„Poipoi sëmbë ta poi bumbuu sëmbë.”​—1 KOLENTI 15:33.

KANDA: 73, 119

1. Na un pisiten u ta libi nöunöu?

U TA libi a „wan tumisi hogi ten”. Di libi ko möön hogi seei sensi di jaa 1914 di „dee lasiti daka u di goonliba aki” bigi (2 Timoteo 3:1-5). Nöö u dë seiki taa di goonliba aki o ko möön hogi seei, biga di Bëibel taki taa: „Dee takusëmbëma ku dee sëmbë ta ganjan sëmbë taa de dë leima dë, nöö de o ta hogi nango fesi nöömö.”​—2 Timoteo 3:13.

2. Un pei fasi u mbei piizii sëmbë lobi a di ten aki? (Luku di peentje a bigi u di woto.)

2 A di ten aki, sömëni sëmbë ta mbei piizii a peipei fasi. De ta luku nasö de ta du soni di nama ku fanafiti libi a di së u manu ku mujëë, di nama ku obia wooko nasö soni di nama ku taku jeje. Söseei de ta luku soni di nama ku feti, nöö de ta du hogihati soni tu. Dee soni dee ta dë u si a Internet, a teefei, a fëlön, ku buku ta mbei sëmbë ta si hogidu ku fanafiti libi a di së u manu ku mujëë kuma soni di an hogi. Söseei soni di sëmbë an bi ta du fosufosu, hën ko dë soni di lanti u so köndë ta da sëmbë pasi u du a di ten aki. Ma di soni dë an kë taki taa dee lö fasi u libi dë ta kai ku Jehovah.​—Lesi Loomë 1:28-32.

3. Unfa sömëni sëmbë ta pakisei u dee sëmbë dee ta hoi deseei a dee wëti u Gadu?

 3 Dee sëmbë u di fosu jaahöndö seei bi ta luku soni ka feti bi ta feti nasö soni di bi nama ku fanafiti libi a di së u manu ku mujëë. Ma dee bakama u Jesosi an bi ta luku dee soni dë, u di de bi ta hoi deseei a dee wëti u Gadu. Di soni aki bi „bigi seei” da dee sëmbë dee bi ta libi a de mindi. Andi bi ko pasa? Wë de bi ta mbei dee Keesitu sëmbë fa, nöö de bi ta du ku de tu (1 Petuisi 4:4). A di ten aki seei sömëni sëmbë an ta fusutan dee sëmbë dee ta hoi deseei a dee wëti u Gadu. Ma kumafa u sabi, nöö di Bëibel ta piki u taa dee sëmbë dee ta waka a Jesosi Keesitu baka o „feni sitaafu a libisëmbë maun nöömö”.​—2 Timoteo 3:12.

„POIPOI SËMBË TA POI BUMBUU SËMBË”

4. Faandi mbei wa musu lobi di goonliba aki?

4 Wa sa lobi „[di goonliba nasö] dee soni u di goonliba aki”, ee u kë du di kë u Gadu. (Lesi 1 Johanisi 2:15, 16.) Saatan „hën dee sëmbë u goonliba ta tei kuma gadu u de de ta dini, nöö hën ta abi taki a di goonliba aki”. A ta ganjan de ku dee poipoi keiki, dee tiima, dee seisonima ku dee soni kuma teefei, ladio ku Internet (2 Kolenti 4:4; 1 Johanisi 5:19). U di wa kë go ta du soni kuma dee sëmbë u di goonliba aki, mbei u musu luku bunu ambë u ta tei kuma mati. Di Bëibel ta piki u taa: „Na mbei sëmbë ganjan unu seei. Poipoi sëmbë ta poi bumbuu sëmbë.”​—1 Kolenti 15:33.

5, 6. Ambë wa musu hulu, nöö faandi mbei?

5 Ee u kë fuu ku Jehovah dë mati u nöömö, nöö wa musu hulu sëmbë di ta du hogi soni. Söseei wa musu hulu sëmbë di ta taki taa de ta dini Jehovah, ma tökuseei de ta pasa Jehovah buka. Ee dee lö sëmbë aki du wan gaan zöndu, nöö de an kë lei taa de ta tjali u di soni di de du, nöö wa musu hulu de möön.​—Loomë 16:17, 18.

6 Sëmbë lo’ u du soni di ta kai ku dee mati u de, u di de kë u dee mati u de lobi de. Fëën mbei ee u ta hulu sëmbë di an ta piki Gadu buka, nöö a sa pasa taa u go ta du dee soni di de ta du. Wë ee u bi o ta hulu sëmbë di ta libi fanafiti a di së u manu ku mujëë, nöö u sa ko dë kuma dee sëmbë dë. Di soni aki hën pasa ku so u dee baaa ku sisa fuu. Nöö de puu dee baaa ku sisa dee an bi tjali u dee zöndu u de a di kemeente (1 Kolenti 5:11-13). Ee de an tjali u di zöndu u de, nöö de sa ko dë kuma dee sëmbë di Petuisi bi taki u de.​—Lesi 2 Petuisi 2:20-22.

7. Ambë u musu ta tei kuma gaan mati?

7 Hii fa u kë lei taa u abi sutifasi da hii sëmbë, tökuseei wa musu ko dë gaan mati ku dee sëmbë dee an ta piki Gadu buka. An bi o dë wan bunu soni seepiseepi u wan Jehovah Kotoigi mbei buka u toou ku wan sëmbë di an dë wan dopudopu Kotoigi di ta dini Jehovah ku hii hën hati. A möön bunu u Jehovah feni u bunu, ka u sëmbë di an lobi Jehovah feni u bunu. Ku dee sëmbë dee ta du di kë u Gadu nöö u musu dë gaan mati. Jesosi taki taa: „Un dee sëmbë aki dee ta du kumafa Gadu kë, nöö unu wë da mi mama ku mi baaa ku mi sisa e.”​—Maikusi 3:35.

8. Andi bi pasa ku dee Isaëli sëmbë di de tei taku mati?

8 Taku mati sa tja i go kaba a sösö. Luku andi bi pasa ku dee Isaëli sëmbë. Ufö de bi dou a di Paamusi Köndë, Jehovah bi bai de taa de bi musu luku bunu ku dee sëmbë dee bi ta libi a di köndë kaa. A bi taa: „Wan musu tjökö kini a goon begi dee gadu u de, nöö wan musu mbei sëmbë ganjan unu u go dini de. Wan musu mbei soni di ta djei dee gadu u de. Un musu booko de puu, nöö un musu naki dee santa posu u de booko pisipisi. Un musu dini Jehovah unu Gadu” (Ëkisodesi 23:24, 25). Ma gaansë u dee Isaëli sëmbë an bi piki Gadu buka, nöö fëën mbei de an bi ta dini Gadu ku hii de hati möön (Psalöm 106:35-39). Andi bi ko pasa ku de? Wë bakaten Jehovah an bi kë dee Isaëli sëmbë kuma sëmbë fëën möön, hën a tei di kemeente u  Keesitu sëmbë a de kamian.​—Mateosi 23:38; Tjabukama 2:1-4.

KÖNI KU DEE SONI I TA LUKU SÖSEEI KU DEE SONI I TA LESI

9. Faandi mbei dee soni dee ta dë u si a teefei, a Internet nasö a buku sa tja hogi ko miti u?

9 Gaansë u dee soni dee ta dë u si a teefei, a Internet nasö a buku sa mbei u ku Jehovah an dë mati möön. Dee lö soni aki an ta heepi Keesitu sëmbë u abi biibi a Jehovah ku dee soni dee a paamusi u. Ma de ta da sëmbë taanga u buta futoou a di hogi goonliba u Saatan. Fëën mbei u musu ta köni u na luku soni, u na lesi soni, söseei u na haika soni di sa mbei u ’hangi u feni dee soni u di goonliba aki’.​—Titusi 2:12.

10. Andi o pasa ku hii dee soni u di goonliba u Saatan dee ta poi sëmbë pakisei?

10 Abiti möön Gadu o poi di goonliba u Saatan ku hii dee soni fëën dee ta poi sëmbë pakisei. Di Bëibel taa: „A a’ wan daka di goonliba aki o kaba ku hii dee lö libi dë tuu fia. Ma dee sëmbë dee ta piki Masa Gadu buka, de, de an o kaba möönsö, ma de o dë u teego” (1 Johanisi 2:17). Di psalöm sikifima seei bi kanda taa: „De o kii dee hogidu sëmbë puu.” Söseei a bi kanda taa: „Ma dee sakafasi sëmbë o feni goonliba, nöö de o piizii seei biga bööböö libi o dë pasa maaka.” Un longi de o dë sö? „Dee sëmbë dee ta libi a wan leti fasi, de o feni di goonliba, nöö naandë de o ta libi u teego.”​—Psalöm 37:9, 11, 29.

11. Unfa Gadu ta heepi u fuu sa hoi useei nëën?

11 Di ölganisaasi u Jehovah an dë kuma di goonliba u Saatan, u di a ta heepi sëmbë u libi a wan fasi di o mbei de feni di libi u teego. Di Jesosi bi begi Jehovah, a bi taki taa: „Andi da di libi u teego? Hën da u de ko sabi i, di wan kodo tuutuu Gadu u mundu ku mi, Jesosi Keesitu, di i manda ko a goonliba aki” (Johanisi 17:3). Jehovah ta wooko ku di ölganisaasi fëën u da u hii soni di u abi fanöudu fuu sa ko sabi ën. U abi sömëni buku, fëlön, ku soni a Internet di ta heepi u fuu sa ta dini Gadu. Boiti di dë, di ölganisaasi fëën seti soni a sö wan fasi taa sëmbë u dee möön leki 110.000 kemeente a hii së u goonliba sa nango a komakandi hii juu. Dee soni dee u ta lei a Bëibel a dee komakandi dë, söseei a dee möön gaan komakandi ta mbei di biibi fuu ko möön taanga a Jehovah ku dee soni dee a paamusi u.​—Hebelejën 10:24, 25.

TOOU KU WAN SËMBË DI DË „WAN BIIBIMA TU”

12. Konda andi di Bëibel kë taki, te a ta piki u taa u musu toou ku wan sëmbë di dë „wan biibima tu”.

12 Keesitu sëmbë di kë toou musu luku bunu ambë da di sëmbë di de o tei u toou. Di Wöutu u Gadu ta bai u taa: „Wan musu fiti buka ku dee sëmbë na ta biibi Gadu, fu un tai unu seei a wan bondji e. Kwetikweti. Biga wan sëmbë di ta libi bunu a Gadu wojo ku wan sëmbë di an ta libi bunu a Gadu wojo, unfa de o sa fii ku deseei? Luku fa dungu ku limbo sai dë, de an sa mökisi möönsö. Goonliba an mbei sö” (2 Kolenti 6:14). Di Bëibel ta piki dee dinima u Gadu taa de musu toou ku wan sëmbë di dë „wan biibima tu”. Hën da de musu toou ku wan sëmbë di dopu, nöö di sëmbë dë musu ta libi kumafa dee wëti u Jehovah ta taki” (1 Kolenti 7:39). Te i toou ku wan sëmbë di lobi Jehovah, nöö di sëmbë dë o heepi i fii sa hoi iseei a Gadu nöömö.

13. Un wëti Gadu bi da dee Isaëli sëmbë te de bi o tei sëmbë u toou?

13 Jehovah sabi andi möön bunu da u, nöö an dë wan njunjun soni te a ta piki u taa u musu toou ku wan sëmbë di dë „wan biibima tu”. Luku andi Jehovah bi piki dee Isaëli sëmbë, u dee sëmbë dee an bi ta dini ën. A bi mbei Mosesi piki de taa: „Wan musu toou ku de. Wan musu tei dee mujëë mii fuunu da dee womi mii u de, söseei wan musu tei dee mujëë mii u de da dee womi mii fuunu. Biga de o mbei dee mii fuunu disa Gadu u dini go dini dee woto gadu. Nöö Jehovah hati o boonu ku unu, nöö a o kii unu hesihesi puu.”​—Detolonomi 7:3, 4.

14, 15. Andi bi pasa ku Salumon di a pasa di wëti u Jehovah?

 14 Kölö sö baka di Salumon bi toon könu u Isaëli, a bi hakisi Jehovah faa dëën köni, hën Jehovah piki di begi fëën. Salumon bi ko toon wan nëbai tiima, nöö a bi abi köni u tii dee Isaëli sëmbë a wan bunu fasi. Di soni aki bi foondo di mujëë könu u di köndë Seiba seei, tee a taa: „I köni, nöö i gudu möön fa sëmbë bi piki mi” (1 Könu 10:7). Ma di woto u Salumon ta lei u andi sa pasa ku wan sëmbë di an ta hoi di wëti u Gadu, nöö a go toou ku wan sëmbë di an ta dini Jehovah.​—Peleikima 4:13.

15 Hii fa Jehovah bi mbei soni waka bunu da Salumon, tökuseei a bi pasa di wëti u Gadu di bi dë gbelingbelin u fusutan. Salumon „bi lobi woto köndë mujëë” di an bi ta dini Jehovah, nöö te u kaba fëën a bi toou ku 700 mujëë, nöö a bi abi 300 waka mujëë tu. Andi bi ko pasa ku ën? Wë di Salumon bi ko gaandi, hën dee mujëë fëën „mbei a go dini woto gadu . . . nöö Salumon bi du soni di Jehovah an feni bunu” (1 Könu 11:1-6). Di nama di a bi go nama ku sëmbë di bi ta dini woto gadu bi mbei an dini Jehovah möön. Ee sö wan soni bi sa pasa ku Salumon, nöö a sa pasa ku hiniwan fuu tu. Fëën mbei an musu ko a u pakisei seepiseepi u kë toou ku wan sëmbë di an ta dini Jehovah!

16. Un lai di Bëibel ta da wan sëmbë di bi toou kaa ufö a ko toon wan Kotoigi, ee di sëmbë di hën ku ën toou an ta dini Jehovah?

16 Boo taa wan sëmbë bi toou kaa, hën bakaten a ko toon wan dinima u Jehovah. Ma di sëmbë di hën ku ën toou an ta dini Jehovah. Wë andi sö wan sëmbë musu du? Di Bëibel ta taki taa: „Un dee mujëë dë ku manu . . . be un ta saka  unu seei a dee manu fuunu basu e. Nöö ee wan fuunu sai dë hën manu an piki di buka u Gadu eti, nöö a o bia piki ën söndö i fan ku ën (1 Petuisi 3:1). Dee soni dee sikifi a di tëkisi aki dë da wan womi di abi wan mujëë di an ta dini Jehovah tu. Di Wöutu u Gadu ta lei u gbelingbelin taa wan womi nasö wan mujëë di toou musu libi bunu ku di sëmbë di hën ku ën toou, nöö a musu libi a di fasi fa Gadu kë taa sëmbë di toou musu libi. Nöö te di sëmbë di i ku ën toou si taa i ko ta libi möön bunu ku ën, nöö kandë hënseei o kë dini Jehovah tu. Di soni aki sömëni sëmbë di toou ko si.

NAMA KU SËMBË DI LOBI JEHOVAH

17, 18. Andi heepi Noa faa bi sa pasa di Gaan Wata libilibi? Nöö andi heepi dee Keesitu sëmbë u di fosu jaahöndö u de an dëdë di dee sodati u Loomë bi ko booko Jelusalen?

17 Taku mati sa mbei i pasa Jehovah buka, ma bumbuu mati sa heepi i fii hoi iseei a Jehovah. Noa da wan sëmbë di u sa djeesi. A bi libi a wan pisiten ka „libisëmbë bi ta du gaan hogi a goonliba seei”, nöö „hii juu hogi wanwan tö de bi ta pakisei a de hati” (Kenesesi 6:5). Dee sëmbë bi ta libi hogi sö tee taa Jehovah kii hii dee hogi sëmbë puu a goonliba. Ma Noa an bi dë kuma de. Di Bëibel ta taki taa Noa bi dë „wan womi di bi ta libi bunu a Gadu wojo, nöö „a bi ta waka ku di tuutuu Gadu.”​—Kenesesi 6:7-9.

18 Noa an bi ta hulu sëmbë di an bi lobi Jehovah. Noa ku hën wosudendu bi mbei di ark, nöö a bi ta „konda da dee sëmbë u di ten dë fa u de musu libi bunu a Gadu wojo” (2 Petuisi 2:5). Noa ku hën mujëë, ku dee dii womi mii fëën ku dee mujëë u de, bi ta da deseei taanga u dini Gadu a wan fasi di ta kai ku ën. Te u kaba fëën, hii de tuu bi pasa di Gaan Wata libilibi. Hii u tuu da bakamii u de, nöö fëën mbei u musu wai taa Noa ku hën wosudendu bi piki Jehovah buka, u di de an bi tei hogihati sëmbë kuma mati. A di wan seei fasi dee Keesitu sëmbë u di fosu jaahöndö an bi ta hulu sëmbë di an bi lobi Jehovah. De bi piki hën buka, nöö de an bi dëdë di dee sodati u Loomë bi ko booko Jelusalen a di jaa 70.​—Lukasi 21:20-22.

Te u ta nama ku sëmbë di lobi Jehovah, nöö woo sa si nöunöu kaa fa di libi o dë a di njunjun goonliba (Luku palaklafu 19)

19. Andi o heepi u fuu sa hoi useei a Jehovah?

19 Leti kumafa Noa ku hën wosudendu, ku dee Keesitu sëmbë u di fosu jaahöndö an bi ta hulu sëmbë di an bi lobi Jehovah, sö nöö useei an ta hulu sëmbë di an lobi Jehovah tu. U abi milionmilion baaa ku sisa di ta dini Jehovah ku hii de hati, di u sa tei kuma mati. De o heepi u fuu sa „dë gingin a di biibi” a dee taanga ten aki (1 Kolenti 16:13; Nöngö 13:20). Pakisei fa a o dë wan piizii soni u pasa di kaba u di hogi goonliba aki libilibi, söseei u libi a di njunjun goonliba u Jehovah! A dë wan fanöudu soni seei u na tei taku mati!