Skip to content

Skip to table of contents

Na un ten di Könuköndë u Gadu o tii di goonliba?

Na un ten di Könuköndë u Gadu o tii di goonliba?

Wantu u dee bakama u Jesosi dee bi ta hoi deseei nëën bi kë sabi ee na un ten di Könuköndë u Gadu bi o bigi tii. Jesosi bi piki de taa de an o sabi di ten di a o bigi tii di goonliba (Tjabukama 1:6, 7). Ma, ufö a piki de di soni dë a bi piki de taa te dee bakama fëën bi o ta si wanlö soni ta pasa, nöö de bi o „sabi taa di Könuköndë u Gadu zuntu”, söseei taa di juu dou faa tii di goonliba.​—Lukasi 21:31, NW.

ANDI JESOSI BI TAKI TAA BI O TA PASA?

Jesosi bi taki taa: „Wan könu o ta suku di otowan a toobi ta feti ku ën tee a bigi. Nöö söseei wan köndë o hopo ta suku di oto köndë a toobi, de o ta feti te a bigi. Nöö di juu dë, goon o ta seki ta latja a sömëni kamian u di goonliba ta kii sëmbë. Gaan hangi o ta ko tee soni seei an o ta dë u njan. Nöö taku siki o ko a mundu ta kii piki mii ku gaan sëmbë tuu” (Lukasi 21:10, 11). Te hii dee soni aki bi o ta pasa a di wan seei ten, nöö a bi o dë wan maaka di ta lei taa „di Könuköndë u Gadu dë zuntu”. Dee soni aki ta pasa a di wan seei ten u? De ta pasa a hii së u goonliba u? Luku wantu soni dee ta lei taa soni dë sö tuu.

1. GAAN FETI

A di jaa 1914, wan gaan feti bi bigi di tja fuka ko miti sömëni sëmbë a sömëni kamian a goonliba möön hii dee feti dee bi dë ufö di dë. Sëmbë di ta öndösuku soni u di ten di pasa ta kai di jaa 1914 wan jaa di tooka libisëmbë, u di a di jaa dë di fösu goonliba feti bi bigi. A di feti dë de bi tei peipei soni u feti di de an bi tei u feti wan daka. De feti ku fetiwagi, ku bömu di de bi ta suti go kii sëmbë a longi kamian, ku göni di ta suti nöömö, ku wan pei ventu di bi ta kii sëmbë, söseei ku woto pei soni u kii sëmbë. Baka di dë, di u tu goonliba feti bi ko, ka de bi feti ku di soni de kai atoom bömu u di fosu pasi. Sensi di jaa 1914 hën feti ta dë a peipei kamian a goonliba, nöö milionmilion sëmbë dëdë a dee feti aki.

2. GOON O TA SEKI TA LATJA KAMIAN

Hiniwan jaa söwan 100 pasi goon ta seki. Di buku Britannica Academic ta taki taa te goon ta seki, nöö a ta hebi tee taa a sa „booko gaangaan kamian”. Wan ölganisaasi de kai United States Geological Survey taki taa kumafa de öndösuku wan hii pisiten kaa (sensi di pisiten u 1900), nöö hiniwan jaa de ta hoi taa söwan 16 pasi goon o seki gaanfa seei. So sëmbë ta taki taa goon an ta seki möön hia, ma taa feni libisëmbë ko feni fasi u maaka luku di mëni pasi di goon ta seki. Tökuseei dee sömëni pasi di goon ta seki gaanfa a hii së u goonliba ta mbei taa sömëni sëmbë tja fuka, söseei sömëni sëmbë ta lasi de libi.

 3. GAAN HANGI

Gaan hangi ta dë a hii së u goonliba u di feti ta dë, u di sëmbë ta bai woto sëmbë ku möni, u di möni fuka dë a so köndë, u di de an sa’ u wooko goon bunu, söseei u di de an ta luku bunu tjika fa di wei dë. Wan ölganisaasi bi taki taa: „A hii së u goonliba, 821 milion sëmbë an ta abi soni u njan, nöö 124 milion ta pena gaanfa seei” (The World Food Programme’s “2018 Year in Review”). U di so miii an ta njan kumafa de bi musu ta njan, mbei söwan 3,1 milion mii ta lasi libi hiniwan jaa. Bëina hafu u dee mii dee lasi libi a di jaa 2011 a hii së u goonliba, dëdë u di de an bi ta njan bumbuu.

4. SIKI DI O TA KISI HIAHIA SËMBË

Di ölganisaasi di ta luku soni di nama ku gösöntu a hii goonliba bi taki taa: „Sömëni taku siki bi kisi hiahia sëmbë sensi di jaa 2001. Siki di bi ta kisi sëmbë kaa kuma cholera, ku woto pei siki, toona ta kisi sëmbë baka, nöö njunjun siki bigi kisi sëmbë tu, kuma SARS, Ebola, Zika ku woto pei siki jeti” (World Health Organization). Hii fa dee öndösukuma ku dee data ko sabi sömëni soni u dee siki dee ta kisi sëmbë, tökuseei de an feni deesi da hii de tuu.

5. DI PELEIKIWOOKO DI TA DU A HII SË U GOONLIBA

Jesosi bi taki u wan woto soni di bi o ta pasa tu, di a taa: „Di bunu buka u di Könuköndë musu paaja te dou hii goonliba e, be hii sëmbë jei. Nöö baka u di dë ufö di ten u dë aki o kaba” (Mateosi 24:14, NW). Hii fa sömëni hogi soni ta pasa a hii së u goonliba, tökuseei möön leki 8 milion sëmbë u hii nasion, söseei u hii së u goonliba ta paaja di bunu buka u di Könuköndë u Gadu a söwan 240 köndë, nöö de ta paaja di buka aki a möön leki 1000 töngö. Di soni aki an bi pasa wan daka jeti.

 FAANDI MBEI U MUSU BUTA PAKISEI A DEE MAAKA AKI?

Dee soni Jesosi bi taki taa bi o ta pasa, ta pasa a di ten fuu aki. Faandi mbei u musu buta pakisei a dee soni dë? Wë, u di Jesosi bi taki taa: „Te un si taa hii dee soni aki ta pasa, nöö un musu sabi taa di Könuköndë u Gadu zuntu.”​—Lukasi 21:31, NW.

Abiti möön, nöö di Könuköndë u Gadu o mbei taa di kë u Gadu pasa a goonliba

Te u öndösuku dee soni dee Jesosi bi taki taa bi o ta pasa, ku woto soni di di Bëibel bi taki, nöö u ta si taa Gadu seti di Könuköndë fëën a di jaa 1914. * A di ten dë, a buta di Wömi Mii fëën, Jesosi Keesitu, kuma Könu (Psalöm 2:2, 4, 6-9). Abiti möön di Könuköndë u Gadu o tii di goonliba, nöö a o puu hii dee woto könuköndë tuu, nöö a o mbei di goonliba ko toon wan paladëisi da libisëmbë u de libi u teego.

An fika longi möön, nöö dee soni dee Jesosi bi taki a di nëbai begi fëën o pasa tuutuu. A bi taki taa: „Be di Könuköndë fii ko. Be di kë fii pasa a goonliba aki leti kumafa a ta pasa a liba ala” (Mateosi 6:10, NW). Andi di Könuköndë u Gadu ta du sensi di a bigi tii a di jaa 1914? Söseei andi o pasa te di Könuköndë u Gadu o tii hii di goonliba?

^ pal. 17 Ee i kë sabi möön soni u di jaa 1914, nöö luku bladsëidë 246-249 u di buku Andi di Bëibel ta lei u tuutuu?, di dee Jehovah Kotoigi tja ko a döö.