Skip to content

Skip to table of contents

Andi di Könuköndë u Gadu o du?

Andi di Könuköndë u Gadu o du?

Jesosi bi lei dee bakama fëën u de begi u di Könuköndë u Gadu ko. A bi sabi taa Gadu an bi kë taa dee hogi soni dee ta pasa a goonliba aki bi musu ta pasa, söseei taa di Könuköndë u Gadu da di wan kodo tii di sa mbei taa soni ko ta waka bunu baka a goonliba. Andi di Könuköndë u Gadu o du?

DEE SONI DEE DI KÖNUKÖNDË U GADU DU KAA

A di woto ufö disi, u bi luku dee maaka dee Jesosi bi taki taa u bi o si. Dee soni dë bi lei taa di Könuköndë u Gadu seti a liba ala kaa, nöö Jesosi Keesitu da di Könu fëën.

Di Bëibel ta taki taa te Jesosi bi o toon könu, nöö a bi o vinde Saatan ku dee taku jeje fëën puu a liba ala. A goonliba aki nöö de bi o sa du hogi. Fëën mbei soni ko hogi sö sensi di jaa 1914.​—Akoalimbo 12:7, 9.

Hii fa soni ta ko möön hogi a di goonliba aki, tökuseei Jesosi di dë di Könu u di Könuköndë u Gadu, ta du soni u heepi sëmbë u hii së u goonliba. Di peleikiwooko di Jesosi bi taki taa bi o ta du a hii së u goonliba, heepi sömëni sëmbë u ko sabi soni u Bëibel, söseei a heepi de u de ta du dee soni di dee mama wëti u Bëibel ta taki (Jesaaja 2:2-4). Milionmilion sëmbë ko abi wan piizii wosudendu libi u di de lei taa di wooko u de nasö gudu an dë di möön fanöudu soni a de libi. Dee sëmbë aki ta feni wini nöunöu kaa, söseei de ta lei u ko dë di pei sëmbë di Gadu kë a di Könuköndë fëën.

 ANDI DI KÖNUKÖNDË U GADU O DU ABITI MÖÖN?

Hii fa Jesosi ta tii a liba ala kaa, tökuseei libisëmbë ta tii di goonliba jeti. Ma, Gadu bi piki Jesosi taa: „Go a dee felantima fii dendu, nöö buta de a i basu” (Psalöm 110:2). An fika longi möön, nöö Jesosi o kii hii dee felantima fëën tuu puu, nöö a o tja bööböö libi ko da dee sëmbë dee ta haika Gadu.

Abiti möön, di Könuköndë u Gadu o du dee soni aki

  • A o puu poipoi biibi. Dee poipoi biibi ta mindi soni da Gadu, nöö dee soni dë ta mbei di libi ko möön taanga da sëmbë. Dee poipoi biibi an o dë möön. Di Bëibel ta tei poipoi biibi maaka ku wan mötjö mujëë. Sömëni sëmbë o panta seei te de si taa Gadu mbei sëmbë poi dee poipoi biibi.​—Akoalimbo 17:15, 16.

  • Libisëmbë an o tii möön. Di Könuköndë u Gadu o puu di tii di libisëmbë ta tii.​—Akoalimbo 19:15, 17, 18.

  • Hogihati sëmbë an o dë möön. Andi o pasa ku dee sëmbë dee ta kë ta du hogi, söseei dee an ta haika Gadu? „De o kii dee hogihati sëmbë puu a goonliba.”​—Nöngö 2:22.

  • Saatan ku dee taku jeje fëën an o dë möön. Saatan ku dee taku jeje fëën an o sa „ta ganjan dee nasiönnasiön sëmbë u goonliba möön”.​—Akoalimbo 20:3, 10.

Unfa soni o dë da dee sëmbë dee tei di së u di Könuköndë u Gadu?

 ANDI DI KÖNUKÖNDË U GADU O DU DA LIBISËMBË?

Jesosi o dë ta tii kuma Könu a liba ala, nöö a o du soni di dee tiima an bi sa du. A o tii makandi ku 144.000 sëmbë di Gadu bai tei a gooonliba aki (Akoalimbo 5:9, 10; 14:1, 3). A o mbei di kë u Gadu pasa a goonliba aki. Andi di Könuköndë u Gadu o du da dee sëmbë dee ta libi a goonliba?

  • Siki ku dëdë an o dë möön. „Na wan hojo sëmbë di ta libi a di köndë o taki taa: ’Mi suwaki.’” Söseei „dëdë an o dë möön”.​—Jesaaja 33:24; Akoalimbo 21:4, NW.

  • Woo ta dë bööböö ta libi fiifii. „Hii soni o waka bunu da de”, söseei „hiniwan sëmbë o sindo nëën doloifi ku hën figa pau basu. Na wan sëmbë o mbei de fëëë”.​—Jesaaja 54:13; Mika 4:4.

  • Wooko o dë di ta da sëmbë piizii. „Dee sëmbë dee mi tei, o feni wini u di wooko u de. De an o wooko taanga u sösö.”​—Jesaaja 65:22, 23.

  • Di goonliba o ko dë bunu baka. „Di sabana ku dee kamian dee an abi wata o bai u di de ta wai. Di dëëdëë sabana o wai seei, nöö folo o fuu nëën.”​—Jesaaja 35:1.

  • Lei sëmbë andi de musu du u de sa libi u teego. „Andi da di libi u teego? Hën da u de ko sabi i, di wan kodo tuutuu Gadu u mundu ku mi, Jesosi Keesitu, di i manda ko a goonliba aki.”​—Johanisi 17:3.

Gadu kë fii feni dee gaan bunu aki (Jesaaja 48:18). A di woto di ta ko woo taki andi i sa du fii seei sa feni dee gaan bunu aki.